ପୁରୀ ଅଫିସ, ୨୯ା୧୨: ପୁରୀ ଚକ୍ରତୀର୍ଥ ରୋଡରେ ରହିଛି ବିଶ୍ୱକବି ରବୀନ୍ଦ୍ରନାଥ ଟାଗୋରଙ୍କ ଐତିହାସିକ ପାଥେରପୁରୀ। କୁହାଯାଏ ଏହି ସ୍ଥାନରେ ରହି ଟାଗୋର ‘ଗୀତାଞ୍ଜଳି’ ରଚନା କରିଥିଲେ। ଏହି ଐତିହାସିକ ସ୍ଥଳ ଏବେ ମାଟିରେ ମିଶିବାକୁ ଯାଉଛି। ପୌର ପ୍ରଶାସନ ପକ୍ଷରୁ ଏହାକୁ ଉଚ୍ଛେଦ କରାଯିବା ଲାଗି ପ୍ରକ୍ରିୟା ଆରମ୍ଭ ହୋଇଛି। ଏ ନେଇ ସାମନ୍ତ ଚନ୍ଦ୍ରଶେଖର ସ୍ବୟଂଶାସିତ ମହାବିଦ୍ୟାଳୟର ଉପାଧ୍ୟକ୍ଷ ଡ. ଶଙ୍କର୍ଷଣ ଦାଶ କହିଛନ୍ତି, ପାଥେରପୁରୀ କୋଠା ବିପଦସଙ୍କୁଳ ରହିଥିବାରୁ ଏହାକୁ ଉଚ୍ଛେଦ ଲାଗି ପୌର ପ୍ରଶାସନ ପକ୍ଷରୁ ଚିଠି ଆସିଥିଲା। ତେବେ ଏଠାରେ ରବୀନ୍ଦ୍ରନାଥଙ୍କ ସ୍ମୃତି ଜଡ଼ିିତ ରହିଥିବାରୁ ଏହି ସ୍ଥାନରେ ଅତ୍ୟାଧୁନିକ କୋଠା, ଟାଗୋରଙ୍କ ଐତିହାସିକ ସଂଗ୍ରହାଳୟ ଏବଂ ପାଠାଗାର ନିର୍ମାଣ ଲାଗି ପୂର୍ତ୍ତ ବିଭାଗକୁ ଚିଠି ଲେଖାଯାଇ ଅନୁରୋଧ କରାଯାଇଥିଲା। ସେହିପରି ଉପଜିଲାପାଳ ଭବତାରଣ ସାହୁ କହିଛନ୍ତି, ଏହି କୋଠା ସମ୍ପୂର୍ଣ୍ଣ ଭାବେ ଭାଙ୍ଗି ନଷ୍ଟ ହୋଇ ପରିତ୍ୟକ୍ତ ଅବସ୍ଥାରେ ରହିଛି। ଏହାକୁ ଉଚ୍ଛେଦ ଲାଗି ପୌର ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ କରାଯାଇଛି।
ଅନ୍ୟପକ୍ଷରେ ପାଥେରପୁରୀରେ ଟାଗୋରଙ୍କ ବହୁ ସ୍ମୃତି ଚିହ୍ନ ରହିଛି। ସେ ବ୍ୟବହାର କରୁଥିବା ବହୁ ପ୍ରାଚୀନ ସାମଗ୍ରୀ, ନଥିପତ୍ର ଆଜି ବି ସେଠାରେ ରହିଛି। କେତେକ ନଥିପତ୍ର ଉଇ ଖାଇଗଲାଣି, ଆଉ କିଛି ସଂରକ୍ଷିତ ରହିଛି। ପରବର୍ତ୍ତୀ ସମୟରେ ଏହି ସ୍ଥାନରେ ସାମନ୍ତ ଚନ୍ଦ୍ରଶେଖର ସ୍ବୟଂଶାସିତ ଜୁନିୟର କଲେଜର ହଷ୍ଟେଲ ଚାଲିଥିଲା। ଗତ ଫନୀ ବାତ୍ୟାରେ ଏହି କୋଠାର ଆଜବେଷ୍ଟସ ଛାତ ଉଡ଼ିିଯିବା ସହ ବ୍ୟାପକ କ୍ଷତି ଘଟିଥିଲା। ତା’ ପରଠାରୁ ଏଠାରେ ଛାତ୍ରାବାସ ବନ୍ଦ ରହିଛି। ଏହା ପରିତ୍ୟକ୍ତ ଅବସ୍ଥାରେ ପଡ଼ିରହିଥିଲା। କଲେଜ ଅଧୀନରେ ରହିଥିବା ଏହି ହଷ୍ଟେଲ କୋଠା ଉଚ୍ଛେଦ ନିଷ୍ପତ୍ତି ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି।
ପାଥେରପୁରୀର ପୁନରୁଦ୍ଧାର ପରିବର୍ତ୍ତେ ପ୍ରଶାସନର ଉଚ୍ଛେଦ ପ୍ରକ୍ରିୟାକୁ ନେଇ ବୁଦ୍ଧିଜୀବୀ ଏବଂ ପୂର୍ବତନ ଛାତ୍ରୀଛାତ୍ରମାନେ ଆପତ୍ତି ଉଠାଇଛନ୍ତି। ଶ୍ରୀଜଗନ୍ନାଥ ଭକ୍ତ ପରିଷଦର ଆବାହକ ସୂର୍ଯ୍ୟନାରାୟଣ ରଥ କହିଛନ୍ତି, ପାଥରପୁରୀ ସହିତ ଟାଗୋରଙ୍କ ସ୍ମୃତିଚିହ୍ନ ଜଡ଼ିିତ ରହିଛି। ଏହି ଐତିହ୍ୟ କୀର୍ତ୍ତିରାଜିର କିପରି ସଂରକ୍ଷଣ କରାଯାଇପାରିବ, ସେଥପ୍ରତି ପ୍ରଶାସନ ଏବଂ ସରକାର ଗୁରୁତ୍ୱ ଦେବା ଉଚିତ। ସେହିପରି ଶ୍ରୀଜଗନ୍ନାଥ ସେନା ଆବାହକ ପ୍ରିୟଦର୍ଶନ ପଟ୍ଟନାୟକ କହିଛନ୍ତି, ଶ୍ରୀକ୍ଷେତ୍ରର ବିକାଶ ଆଳରେ ପ୍ରଶାସନ ଐତିହ୍ୟର ବିନାଶ କରିବା ଉଚିତ ନୁହେଁ। ଏହି ସ୍ଥାନର ଐତିହ୍ୟ କିପରି ବଜାୟ ରହିବ ସେଥିପ୍ରତି ପ୍ରଶାସନ ଗୁରୁତ୍ୱ ଦେଲେ ଏହାର ଗାରିମା ବୃଦ୍ଧି ପାଇବ। ସାମାଜିକ କର୍ମୀ ବ୍ରଜବନ୍ଧୁ ମହାରଣା କହିଛନ୍ତି, କଲେଜ ଅଧୀନରେ ପାଥେରପୁରୀ ରହିଛି। ସରକାର ଏହି ସ୍ଥାନର ବିକାଶ ପ୍ରତି ଗୁରୁତ୍ୱ ଦେବା ଉଚିତ। ଏଠାରେ ଟାଗୋରଙ୍କ ଏକ ପୂର୍ଣ୍ଣ ଅବୟବ ମୂର୍ତ୍ତି ସ୍ଥାପନ ସହ ଅତ୍ୟାଧୁନିକ ପାଠାଗାର ନିର୍ମାଣ କରାଗଲେ ଶ୍ରୀକ୍ଷେତ୍ରର ଗୌରବ ବୃଦ୍ଧି ପାଇବ।