ଚମ୍ପୁଆ/ଝୁମ୍ପୁରା/ପାଟଣା,୧।୬(ଡି.ଏନ.ଏ/ସ୍ବ.ପ୍ର.)-ଚମ୍ପୁଆ ଉପଖଣ୍ଡ ଅନ୍ତର୍ଗତ ଝୁମ୍ପୁରା ବ୍ଲକ ଟୁକୁଡିହା ପଞ୍ଚାୟତ ଅଧୀନ ରସବନ୍ତଳା ଗ୍ରାମରୁ ପୁରାତନ କାଳରେ ବ୍ୟବହାର ହେଉଥିବା ସୌଖୀନଯୁକ୍ତ କାରୁକାର୍ଯ୍ୟ ସମ୍ପନ୍ନ ଏକ ଦୀପଷ୍ଟାଣ୍ଡ ମାଟି ତଳୁ ଉଦ୍ଧାର କରାଯାଇଛି। ଏହା ରାଜା ରାଜରାଜୁଡ଼ା ସମୟରେ ବ୍ୟବହାର କରାଯାଉଥିଲା ବୋଲି ଅନୁମାନ କରାଯାଇଛି। ସୋମବାର ସକାଳୁ ରସବନ୍ତଳା ଗ୍ରାମର ଯୁବ ସାମାଜିକ କର୍ମୀ ଇଂ ବିନୋଦ କୁମାର ନାଏକ ତାଙ୍କ ବାଡିରେ ହଳ କରୁଥିବା ସମୟରେ କୌଣସି ଏକ ଜିନିଷ ତାଙ୍କ ଲଙ୍ଗଳରେ ଲାଗୁଥିବା ଅନୁମାନ କରିଥିଲେ। ପରେ ତାହା ଖୋଳିବାରୁ ଏହା ଏକ ପୁରାତନ ଦୀପଷ୍ଟାଣ୍ଡ ବୋଲି ଜାଣିବାକୁ ପାଇଥିଲେ। ଏହି ଦୀପଷ୍ଟାଣ୍ଡର ରଙ୍ଗ ରୂପାର ରଙ୍ଗ ହୋଇଥିବା ବେଳେ ଏହାର ଓଜନ ପ୍ରାୟ ୩ .କି.ଗ୍ରାରୁ ଊର୍ଦ୍ଧ୍ୱ ହେବ ବୋଲି ଅନୁମାନ କରାଯାଇଛି। ସୂଚନାଯୋଗ୍ୟ, ବହୁ ବର୍ଷ ପୂର୍ବରୁ ଅସନପାଟ ଅଞ୍ଚଳରେ ଶିବଙ୍କ ଏକ ନଟରାଜ ମୂର୍ତ୍ତି ଉଦ୍ଧାର ହୋଇ ତାହା ଏବେ ସଂଗ୍ରହାଳୟରେ ଶୋଭା ବର୍ଦ୍ଧନ କରୁଛି। ତେଣୁ ସ୍ଥାନୀୟ ଅଞ୍ଚଳରେ ବହୁ ପୁରାତନ କୀର୍ତ୍ତିରାଜି ଭୂମିଷ୍ଠ ଅବସ୍ଥାରେ ରହିଥିବା ସ୍ଥାନୀୟ ଲୋକେ ମତ ଦେଇଛନ୍ତି। ଏଣୁ ସରକାରଙ୍କ ପକ୍ଷରୁ ଅସନପାଟଠାରେ ଏକ ସଂଗ୍ରହାଳୟ ପ୍ରତିଷ୍ଠା କରିବା ଏବଂ କେନ୍ଦୁଝର ଜିଲାରୁ ମିଳୁଥିବା ପ୍ରତ୍ନତତ୍ତ୍ୱ ସାମଗ୍ରୀର ରକ୍ଷଣାବେକ୍ଷଣ କରିବାକୁ ସଂଗ୍ରାହକ ଭଣ୍ଡା ସଞ୍ଜିବନୀ ସାହିତ୍ୟ ସଂସଦ ସମ୍ପାଦକ ଡମ୍ବରୁ ମହାନ୍ତ ଦାବି କରିଛନ୍ତି।