ବାଲେଶ୍ୱର ଅଫିସ, ୭।୬-ବାଲେଶ୍ୱର ଜିଲା ବାଲିଆପାଳ ବ୍ଲକ ବଡ଼ାସ ପଞ୍ଚାୟତର ଯୋଗାଇ ପୋଷ୍ଟ ଅଫିସ୍ର ପିଅନଙ୍କ ଘର ପୋଖରୀ ଆଡ଼ିରେ ପୋତା ହୋଇଥିବା ଶହ ଶହ ଆଧାରକାର୍ଡ଼ ଶନିବାର ଉଦ୍ଧାର କରାଯାଇଛି। ଏହାକୁ ନେଇ ଉକ୍ତ ଗ୍ରାମରେ ଉତ୍ତେଜନା ସୃଷ୍ଟି ହୋଇଛି। ଆଧାରକାର୍ଡ଼କୁ ନ ବାଣ୍ଟି ପୋଖରି ଆଡ଼ିରେ ପୋତିଦିଆଯିବା ଭୁଲ୍ ବୋଲି ପିଅନ ବାଞ୍ଛାନିଧି ପରିଡ଼ା ସ୍ବୀକାର କରିଛନ୍ତି।
ଶନିବାର ମୋ ପୋଖରୀ ଯୋଜନାରେ ଉକ୍ତ ପୋଖରୀକୁ ଜେସିବି ଯୋଗେ ମାଟି ଖୋଳାଯାଉଥିବା ବେଳେ ଉକ୍ତ ଆଡ଼ିରୁ ଶତାଧିକ ଆଧାରକାର୍ଡ଼ ସହ ବହୁ ମୂଲ୍ୟବାନ କାଗଜପତ୍ର ଦେଖିବାକୁ ମିଳିଥିଲା। ପରେ ସ୍ଥାନୀୟ ଲୋକେ ସେଠାରେ ଏକାଠି ହୋଇଥିଲେ। ଉକ୍ତ ଗ୍ରାମର ବହୁ ଲୋକ ତଥା ପାଠ ପଢୁଥିବା ଛୋଟବଡ଼ ପିଲାଙ୍କର ଆଧାରକାର୍ଡ଼ ଚିହ୍ନଟ କରିଥିଲେ। ଆଧାରକାର୍ଡ଼ଗୁଡ଼ିକ ପୋଷ୍ଟ ଅଫିସ୍କୁ ଆସିବା ପରେ ପିଅନ ଏହାକୁ ବାଣ୍ଟିବାକୁ ନ ଯାଇ ମାଟି ତଳେ ପୋତିଦେଇଥିଲେ। ଫଳରେ ଉକ୍ତ ଅଞ୍ଚଳର ଲୋକମାନଙ୍କର ବ୍ୟାଙ୍କ ଟ୍ରାଞ୍ଜାକଶନ, କେୱାଇସି ହୋଇପାରୁ ନ ଥିବା, ପିଲାମାନଙ୍କର ଆଧାରକାର୍ଡ଼ ସ୍କୁଲରେ ଆବଶ୍ୟକତା ଥିବା ବେଳେ ଦେଇପାରୁ ନ ଥିବା, ବିଭିନ୍ନ ସରକାରୀ କାର୍ଯ୍ୟକ୍ରମରେ ଆଧାରକାର୍ଡ଼ ଏକ ମୁଖ୍ୟ ଡକ୍ୟୁମେଣ୍ଟ ହୋଇଥିବା କାରଣରୁ ବିଭିନ୍ନ କାର୍ଯ୍ୟରେ ଅସୁବିଧାର ସମ୍ମୁଖୀନ ହେଉଥିବା ଗ୍ରାମବାସୀ ଦୁର୍ଜୟ ମାଝୀଙ୍କ ସହ ଅନେକେ ଅଭିଯୋଗ କରିଛନ୍ତି। ଏହାର ବିଧିବଦ୍ଧ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି ହୋଇଛି।