ଓ୍ବାଶିଂଟନ,୨୪।୧୦: ପୃଥିବୀ ଉପରେ ବିପଦ ମାଡ଼ି ଆସୁଛି। ଆଣ୍ଟାର୍କଟିକା ହିମ ପାହାଡ଼ରେ ୨୦ କିମି ଫାଟ ସୃଷ୍ଟି ହୋଇଛି। ଜଳବାୟୁ ପରିବର୍ତ୍ତନ ଏବଂ ଗ୍ଲୋବାଲ୍ ଓ୍ବାର୍ମିଂ ଯୋଗୁ ଆଣ୍ଟାର୍କଟିକାର ପଶ୍ଚିମରେ ଥିବା ପାଇନ୍ ଦ୍ୱୀପରେ ବିରାଟ ହିମ ପାହାଡ଼ରେ ଏଭଳି ହୋଇଥିବା ୟୁରୋପିଆନ୍ ମହାକାଶ ଏଜେନ୍ସି ପକ୍ଷରୁ ସୂଚନା ଦିଆଯାଇଛି। ଗତ ୨୫ ବର୍ଷ ଧରି ଏହି ଦ୍ୱୀପରୁ ସମୁଦ୍ର ମଧ୍ୟକୁ ହିମ ପ୍ରବାହ ଜାରି ରହିଛି। ସୃଷ୍ଟି ହୋଇଥିବା ଫାଟ ଯୋଗୁ ବିରାଟ ହିମଖଣ୍ଡ ପ୍ରତିଦିନ ଏହା ୧୦ ମିଟର ବେଗରେ ସମୁଦ୍ର ଆଡ଼କୁ ମାଡ଼ି ଚାଲିଛି। ସେହିପରି ଜଳବାୟୁ ପରିବର୍ତ୍ତନ ଯୋଗୁ ଏଠାରେ ୪୦ ପ୍ରତିଶତ ଅଧିକ ହିମଖଣ୍ଡ ତରଳିବାରେ ଲାଗିଛି। ଏହାଦ୍ୱାରା ସମୁଦ୍ର ଜଳସ୍ତର ବୃଦ୍ଧି ପାଇବାର ଆଶଙ୍କା ରହିଛି। ଏପରି ହେଲେ ଉପକୂଳବର୍ତ୍ତୀ ଅଞ୍ଚଳ ଗୁଡ଼ିକ ସମୁଦ୍ରରେ ବୁଡ଼ିଯିବ ବୋଲି ୟୁରୋପିଆନ୍ ମହାକାଶ ଏଜେନ୍ସି କହିଛି।