ସୋନପୁର, ୧୦।୧୧(ନି.ପ୍ର.) ସୁବର୍ଣ୍ଣପୁର ଜିଲା ବରିଷ୍ଠ ନାଗରିକ ସମିତି ପକ୍ଷରୁ ସ୍ଥାନୀୟ ପ୍ରଭାସ ଲଜ ସଭାଗୃହରେ ଉପସଭାପତି ଆଇନଜୀବୀ ଚନ୍ଦ୍ରମଣି ଦାଶଙ୍କ ପୌରୋହିତ୍ୟରେ ଏକ ପ୍ରବଚନ ସଭା ଅନୁଷ୍ଠିତ ହୋଇଥିଲା। ଏଥିରେ ଆର୍ଟ ଅଫ ଲିଭିଂର ଶିକ୍ଷକ ହିମାଂଶୁ କୁମାର ପଣ୍ଡା ଓ ମୁକୁନ୍ଦ ସାହୁ ଯୋଗଦାନ କରି ବରିଷ୍ଠ ନାଗରିକମାନଙ୍କ ଶେଷ ଜୀବନରେ ମାନସିକ ଶାନ୍ତି ମୁହଁରେ ହସ ଫୁଟାଇବ ବୋଲି କହିଥିଲେ। ବରିଷ୍ଠମାନେ ହସଖୁସିରେ ରହିବା ଆବଶ୍ୟକ। ପରିବାରର ମାନସିକ ଯନ୍ତ୍ରଣାରୁ ମୁକ୍ତି ସକାଶେ ଶାନ୍ତି ଅପରିହାର୍ଯ୍ୟ। ତେଣୁ ବରିଷ୍ଠ ନାଗରିକମାନେ ନିଜର ସମୟକୁ ଅପଚୟ ନକରି ସେବା କାର୍ଯ୍ୟରେ ନିୟୋଜିତ କରିବା ପାଇଁ ଆର୍ଟ ଅଫ ଲିଭିଂର କର୍ମକର୍ତ୍ତା ଆହ୍ବାନ ଦେଇଥିଲେ। ବରିଷ୍ଠ ନାଗରିକ ସମିତିର ସଦସ୍ୟ ଆଇନଜୀବୀ ବ୍ୟୋମକେଶ ଦାଶ ଅତିଥିଙ୍କ ପରିଚୟ ପ୍ରଦାନ କରିଥିଲେ। ସମିତି ସମ୍ପାଦକ ତଥା ଅଧ୍ୟାପକ ନାରାୟଣ ପ୍ରସାଦ ରାୟଗୁରୁ ସଂଘ ପକ୍ଷରୁ ବିଭିନ୍ନ ସମୟରେ କରାଯାଉଥିବା କାର୍ଯ୍ୟକ୍ରମ ସମ୍ପର୍କରେ ବର୍ଣ୍ଣନା କରିଥିଲେ ।