ଭୁବନେଶ୍ୱର,୨୬ା୫(ବ୍ୟୁରୋ): ରାଜଧାନୀ ସମେତ ଅନ୍ୟ କେତେକ ସ୍ଥାନରେ ସୋମବାରଠାରୁ ଅନ୍ଲାଇନ୍ ମଦ ବିକ୍ରି ଆରମ୍ଭ ହୋଇଛି। ଲକ୍ଡାଉନ୍ ସମୟରେ ସରକାର କେବଳ ଅନ୍ଲାଇନ୍ ମଦ ବିକ୍ରି ପାଇଁ ଅନୁମତି ଦେଇଥିଲେ। କିନ୍ତୁ ଦୋକାନୀ ଓ ଗ୍ରାହକ ଏହି ନିୟମକୁ ଫୁ କରି ଉଡ଼ାଇ ଦେଇଛନ୍ତି। ରାଜଧାନୀର କଟକରୋଡ୍, ବାପୁଜୀ ନଗର, ରସୁଲଗଡ଼, ବୁଦ୍ଧେଶ୍ୱରୀ କଲୋନୀ, ନୟାପଲ୍ଲୀ, ପଟିଆ ଭଳି ଅନେକ ସ୍ଥାନରେ ଥିବା ମଦ ଦୋକାନ ଅଫ୍ଲାଇନ୍ ମଦ ବିକ୍ରି କରିଛନ୍ତି। ଫଳରେ କାଉଣ୍ଟରରେ ଅସମ୍ଭାଳ ଭିଡ଼ ହେବା ସହ ଗ୍ରାହକମାନେ ପେଟି ପେଟି ମଦ ବୋହି ନେଇଛନ୍ତି। ସାମାଜିକ ଦୂରତ୍ୱକୁ ସମସ୍ତେ ଆଖି ବୁଜିଦେଇଛନ୍ତି। ଏ ସମ୍ପର୍କରେ କେତେକ ମଦ ଦୋକାନୀ ଅଦ୍ଭୁତ ସଫେଇ ଦେଇଛନ୍ତି। ଅନ୍ଲାଇନ୍ରେ ମଦ ଦିଆଯିବା ପାଇଁ କାଉଣ୍ଟର ଖୋଲି ଆଧାରକାର୍ଡ ନିଆଯାଇ ପଞ୍ଜୀକରଣ କରାଯାଉଥିବା ସେମାନେ କହିଛନ୍ତି।
ଅନ୍ୟପକ୍ଷରେ ଗଣମାଧ୍ୟମରେ ଏହି ଖବର ପ୍ରସାରିତ ହେବା ପରେ ପୋଲିସ ଏକାଧିକ ମଦ ଦୋକାନ ବନ୍ଦ କରିଛି। ପୋଲିସର ଏଭଳି କାର୍ଯ୍ୟାନୁଷ୍ଠାନ ଯୋଗୁ ମଦ ଦୋକାନୀ ମାଲିକ ସଂଘ ଡିସିପିଙ୍କୁ ଭେଟିଥିଲା। ତାଙ୍କ ସହ ବହୁ ସମୟ ଧରି ଆଲୋଚନା ପରେ ଅନ୍ଲାଇନ୍ରେ ମଦ ବିକ୍ରି ପାଇଁ ସଂଘ ରାଜି ହୋଇଥିଲା। ସକାଳ ୭ରୁ ଦିନ ଗୋଟାଏ ପର୍ଯ୍ୟନ୍ତ ଅର୍ଡର ରଖାଯିବ ଓ ଗୋଟାଏରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଡେଲିଭରି ଦେବା ପାଇଁ ଡିସିପି ଦୋକାନୀଙ୍କୁ କହିଥିଲେ। ମଦ ଦୋକାନ ଆଗରେ ପୋଲିସ ମୁତୟନ କରାଯିବ ଓ ଡେଲିଭରି ସମୟରେ ମଧ୍ୟ ପୋଲିସ ସୁରକ୍ଷା ଦେବ ବୋଲି ସେ ପ୍ରତିଶ୍ରୁତି ଦେଇଛନ୍ତି। କିନ୍ତୁ ଜୋମାଟୋ ଓ ସ୍ବିଗି ମଦ ଡେଲିଭରି କଲେ ୩.୫ ପ୍ରତିଶତ କମିଶନ ପାଇବେ। କିନ୍ତୁ ସେମାନେ ଡେଲିଭରିର ୩ ଦିନ ଭିତରେ ପାଉଣା ନେବାକୁ କହିବାରୁ ଏହାକୁ ସଂଘ ନାପସନ୍ଦ କରିଛି।