ନୂଆଦିଲ୍ଲୀ, ୩-୯: ଘରୋଇ ବଜାରର ବିଭିନ୍ନ କ୍ଷେତ୍ର ଉପରେ ମାନ୍ଦାବସ୍ଥା ପ୍ରଭାବ ପଡିଛି। ଏବେ ବିନିର୍ମାଣ କ୍ଷେତ୍ରରେ ଏଭଳି ସ୍ଥିତି ଦେଖାଯାଇଛି। ଏଥି ଯୋଗୁ ଦେଶର ମାନୁଫାକଚରିଂ ଅଭିବୃଦ୍ଧି ୧୫ ମାସର ସର୍ବନିମ୍ନ ସ୍ତରକୁ ଖସି ଆସିଛି। ଆଇଏଚ୍ଏସ୍ ମାର୍କିଟ ଇଣ୍ଡିଆ ପକ୍ଷରୁ ପ୍ରକାଶିତ ମାନୁଫାକଚରିଂ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ (ପିଏମ୍ଆଇ) ଜୁଲାଇର ୫୨.୫% ଥିବା ବେଳେ ଏହା ହ୍ରାସ ଘଟି ଅଗଷ୍ଟ ମାସରେ ୫୧.୪% ରହିଛି। ଏହା ୨୦୧୮ ମେ ପରଠାରୁ ସର୍ବନିମ୍ନ ସ୍ତର। ୪୦୦ ଉତ୍ପାଦନକାରୀଙ୍କୁ ନେଇ ଏହି ସର୍ଭେ କରାଯାଇଥିବା ବେଳେ ଏଥିରେ ନୂଆ ଅର୍ଡର, ଉତ୍ପାଦନ, ନିଯୁକ୍ତି, ଯୋଗାଣକାରୀଙ୍କ ସାମଗ୍ରୀ ଡେଲିଭରି ଅବଧି, କ୍ରୟ ଷ୍ଟକ ଭଳି ପ୍ରମୁଖ ବିଷୟଗୁଡିକୁ ବିଚାର କରାଯାଇଛି। ଏହି ସମୟରେ ବିକ୍ରି ଅଭିବୃଦ୍ଧି ୧୫ ମାସର ସର୍ବନିମ୍ନ ସ୍ତରରେ ରହିଛି। ଏହାବାଦ ଉତ୍ପାଦନ ଏବଂ ନିଯୁକ୍ତି ସୃଷ୍ଟି ବିଶେଷ ଭାବେ କ୍ଷତିଗ୍ରସ୍ତ ହୋଇଛି। ସେହିଭଳି ଉତ୍ପାଦନ ୟୁନିଟ୍ଗୁଡିକର ଇନ୍ପୁଟ କ୍ରୟ ନିମ୍ନ ସ୍ତରକୁ ଖସିଆସିଥିବା ରିପୋର୍ଟରେ ପ୍ରକାଶ ପାଇଛି।
ସର୍ଭେରେ କୁହାଯାଇଛି ଯେ, ଆଲୋଚ୍ୟ ସମୟରେ ଇନ୍ପୁଟ ଖର୍ଚ୍ଚ ବୃଦ୍ଧି ଏବଂ ବାଣିଜ୍ୟ ପାଇଁ ଆତ୍ମବିଶ୍ୱାସରେ ଉନ୍ନତି ପରିଲକ୍ଷିତ ହୋଇଛି। ଯାହା ୧୬ ମାସର ସବୁଠାରୁ ସର୍ବୋଚ୍ଚ ସ୍ତର। ଏହାବାଦ ଶିଳ୍ପ ସଂସ୍ଥାଗୁଡିକ ଉପରେ ପ୍ରତିଯୋଗିତା ଚାପ ଏବଂ ବଜାରରେ ସ୍ଥିତି ଆହ୍ବାନପୂର୍ଣ୍ଣ ରହିବା ଯୋଗୁ ମାନୁଫାକଚରିଂ ଅଭିବୃଦ୍ଧିକୁ ଏହା ପ୍ରଭାବିତ କରିଛି। ବିଦେଶରୁ ଅର୍ଡର ଅଭିବୃଦ୍ଧି ଏହି ସମୟରେ କମିଛି। ୨୦୧୮ ଏପ୍ରିଲ ପରଠାରୁ ଉକ୍ତ କ୍ଷେତ୍ରରେ ଏହା ସର୍ବନିମ୍ନ ସ୍ତର।
ଜୁନ ତ୍ରୈମାସରେ ଭାରତର ଅର୍ଥନୈତିକ ଅଭିବୃଦ୍ଧି ୬ ବର୍ଷର ସର୍ବନିମ୍ନ ସ୍ତର ୫%କୁ ଖସି ଆସିଛି। ଏହି ସମୟରେ ମାନୁଫାକଚରିଂ କ୍ଷେତ୍ର ଧିମା ରହିଥିବା ରିପୋର୍ଟ ବଜାରର ପ୍ରକୃତ ସ୍ଥିତିକୁ ଦେଖାଉଛି। ଅର୍ଥନୈତିକ ମାନ୍ଦାବସ୍ଥା ବିରୋଧରେ ଲଢିବା ଲାଗି ସରକାର ବିଭିନ୍ନ ପଦକ୍ଷେପ ନେଉଥିବା କହୁଛନ୍ତି। ଏହି ସମୟରେ ସରକାରୀ ନିବେଶରେ ବୃଦ୍ଧି, ରାଷ୍ଟ୍ରାୟତ୍ତ ବ୍ୟାଙ୍କଗୁଡିକରେ ନୂଆ ପୁଞ୍ଜି ଯୋଗାଣ, ଏଫ୍ଡିଆଇ ନିୟମ, ବିଦେଶୀ ଓନରଶିପ ନିୟମରେ ସଂଶୋଧନ ଏବଂ ଭିତ୍ତିଭୂମି ନିବେଶକୁ ବଢାଇବା ଦିଗରେ ସରକାର ପଦକ୍ଷେପ ନେଉଛନ୍ତି। ଇତିମଧ୍ୟରେ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ଏହାର ସୁଧହାରକୁ ୪ଥର ହ୍ରାସ କରିବା ସହ ଏହା ଅଗଷ୍ଟରେ ୫.୪%କୁ ଖସିଛି।
୮ ପ୍ରମୁଖ କ୍ଷେତ୍ର ଅଭିବୃଦ୍ଧି ୨.୧ ହ୍ରାସ
ଦେଶର ୮ ପ୍ରମୁଖ କ୍ଷେତ୍ର ଶିଳ୍ପ କ୍ଷେତ୍ର ଅଭିବୃଦ୍ଧି ଜୁଲାଇରେ ୨.୧%କୁ ଖସିଛି। କୋଇଲା, ଅଶୋଧିତ ତୈଳ, ପ୍ରାକୃତିକ ବାଷ୍ପ ଏବଂ ରିଫାଇନେରୀ ପ୍ରଡକ୍ଟ କ୍ଷେତ୍ରରେ କାର୍ଯ୍ୟଧାରା ହ୍ରାସ ହେବା ଯୋଗୁ ଏଭଳି ସ୍ଥିତି ଆସିଥିବା ସରକାରୀ ତଥ୍ୟରୁ ସାମ୍ନାକୁ ଆସିଛି। କୋଇଲା, ଅଶୋଧିତ ତୈଳ, ପ୍ରାକୃତିକ ବାଷ୍ପ, ରିଫାଇନେରୀ ପ୍ରଡକ୍ଟ, ସାର, ଇସ୍ପାତ,ସିମେଣ୍ଟ ଏବଂ ଇଲେକ୍ଟ୍ରିସିଟି ଭଳି କ୍ଷେତ୍ର ଗତ ବର୍ଷ ଜୁଲାଇରେ ଭଲ ପ୍ରଦର୍ଶନ କରିବା ସହ ଅଭିବୃଦ୍ଧି ୭.୩% ରହିଥିଲା। ସୋମବାର ସରକାରଙ୍କ ପକ୍ଷରୁ ଜାରି କରାଯାଇଥିବା ତଥ୍ୟ ମୁତାବକ ଜୁଲାଇରେ କୋଇଲା, ପ୍ରାକୃତିକ ବାଷ୍ପ, ଅଶୋଧିତ ତୈଳ କ୍ଷେତ୍ରରେ ଅଭିବୃଦ୍ଧି ନକାରାତ୍ମକ ରହିଛି। ଏପ୍ରିଲ-ଜୁଲାଇ ସମୟରେ ଦେଶର ୮ ପ୍ରମୁଖ କ୍ଷେତ୍ର ଅଭିବୃଦ୍ଧି ୩% ରହିଛି। ଏହା ଗତ ବର୍ଷ ସମାନ ସମୟରେ ୫.୯% ରହିଥିଲା।