ନୂଆଦିଲ୍ଲୀ,୧୨-୧୦: ଦେଶରେ ସାମଗ୍ରୀ ଓ ସେବା ଟିକସ(ଜିଏସ୍ଟି) କାର୍ଯ୍ୟକାରୀ ହେବା ପରେ ଜିଡିପି ଅଭିବୃଦ୍ଧି କେତେ ପ୍ରତିଶତ ପ୍ରଭାବିତ ହୋଇଛି ତାହା ପରିସଂଖ୍ୟାନଗତ ଭାବେ କହିବା କଷ୍ଟକର ବ୍ୟାପାର। ମାତ୍ର ମାନ୍ଦାବସ୍ଥା ଲାଗି ଜିଏସ୍ଟି ଏକ ପ୍ରମୁଖ କାରଣ ବୋଲି ପ୍ରଧାନମନ୍ତ୍ରୀଙ୍କ ଅର୍ଥନୈତିକ ପରାମର୍ଶଦାତା କମିଟି ଅଧ୍ୟକ୍ଷ ବିବେକ ଦେବରୟ ଶୁକ୍ରବାର କହିଛନ୍ତି। ଏଠାରେ ଏକ କାର୍ଯ୍ୟକ୍ରମରେ ଯୋଗଦେଇ ସେ କହିଛନ୍ତି। ଜିଏସ୍ଟି ମାନ୍ଦାବସ୍ଥାର ଏକ ପ୍ରମୁଖ କାରଣ ଏବଂ ଏଥିରେ କୌଣସି ସନ୍ଦେହ ନାହିଁ। ଜିଏସ୍ଟି ହ୍ରାସ ସହ ଏ ପ୍ରସଙ୍ଗ ଉପରେ ପୁଣି ଥରେ ଚିନ୍ତା କରିବାର ଏହା ଏକ ଠିକ୍ ସମୟ। ପରୋକ୍ଷ ଟିକସ ବ୍ୟବସ୍ଥାରେ ଛାଡ ବ୍ୟବସ୍ଥାକୁ ବାଦ ଦିଆଯିବା ଆବଶ୍ୟକ ବୋଲି ସେ ମତ ଦେଇଛନ୍ତି।
ଏଭଳି ପଦକ୍ଷେପ ସରକାରଙ୍କ ଲାଗି ବିପଦ ହେବ କି ବୋଲି ଏକ ପ୍ରଶ୍ନର ଉତ୍ତରରେ ସେ କହିଛନ୍ତି, ବର୍ତ୍ତମାନ ଜିଏସ୍ଟି ସଂଗ୍ରହ ୧୯ ମାସର ନିମ୍ନ ସ୍ତରରେ ରହିଛି। ଏଣୁ ଏଭଳି ସ୍ଥିତିରେ ସରକାର ଏସଂକ୍ରାନ୍ତ ବିଭିନ୍ନ ପ୍ରସଙ୍ଗକୁ ବିଚାର କରିବା ଆବଶ୍ୟକ। ଅପରପକ୍ଷରେ ଜିଏସ୍ଟି ଯେଉଁ ଭଳି ଭାବେ କାର୍ଯ୍ୟକାରୀ କରାଗଲା ତାହା ଅର୍ଥ ବ୍ୟବସ୍ଥାରେ ମାନ୍ଦାବସ୍ଥା ଆସିବାର ପ୍ରମୁଖ କାରଣ ବୋଲି ଦେବରୟ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, ଚଳିତ ଆର୍ଥତ୍କ ବର୍ଷ ଲାଗି ସରକାର ବଜେଟରେ ଧାର୍ଯ୍ୟ କରିଥିବା ବିତ୍ତୀୟ ନିଅଣ୍ଟ ଲକ୍ଷ୍ୟ ହାସଲ କରିବାକୁ ସକ୍ଷମ ନ ହେବା ଭଳି ପ୍ରତୀୟମାନେ ହେଉଛି। ସେହିଭଳି ସରକାର ବ୍ୟକ୍ତିଗତ ଆୟକର ହାରରେ ମଧ୍ୟ ହ୍ରାସ କରିବା ନେଇ ଯୋଜନା ରହିଛି। ବଜେଟରେ ଆକଳନ ହୋଇଥିବା ଅଭିବୃଦ୍ଧି ହାର ହାସଲ ସମ୍ଭବ ହେଉ ନ ଥିବାରୁ ବିତ୍ତୀୟ ନିଅଣ୍ଟ ବଢିବା ନେଇ ସେ ଆକଳନ କରିଛନ୍ତି। ଆୟକରରେ ହ୍ରାସ ସମ୍ଭାବନା ନେଇ ସେ ମତ ରଖିଥିବା ବେଳେ କେବେ ଏହା ହେବ ସେ ନେଇ କିଛି ସ୍ପଷ୍ଟ କରି ନାହାନ୍ତି।