ନୂଆଦିଲ୍ଲୀ,୧୭।୪:କୋଭିଡ୍-୧୯ ବର୍ତ୍ତମାନ ସାରା ବିଶ୍ୱକୁ କ୍ଷତିଗ୍ରସ୍ତ କରିଛି। ସାରା ବିଶ୍ୱରେ ହୋଇଥିବା ଲକ୍ଡାଉନ କାରଣରୁ ଆର୍ଥତ୍କ କାର୍ଯ୍ୟକଳାପ ଏବେ ଠପ୍ ହୋଇଛି। ବିକଶିତ କିମ୍ବା ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ହେଉ ପଛେ କୋଭିଡ୍-୧୯ର ପଞ୍ଝାରୁ କେହି ବାହାରିପାରିନାହାନ୍ତି। ଦେଶଗୁଡ଼ିକର ଅଭିବୃଦ୍ଧି ନକାରାତ୍ମକ ରହିବ ବୋଲି ପୂର୍ବାନୁମାନ କରାଯାଇଛି। ଏଭଳି ସ୍ଥିତିରେ ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) କହିଛି ଯେ, ପ୍ରମୁଖ ଅର୍ଥ ବ୍ୟବସ୍ଥାଗୁଡ଼ିକର ବିକାଶ ହାର ମାତ୍ରାଧିକ ଖସିଯିବ। ଏହି ସମୟରେ ଭାରତ ଏବଂ ଚାଇନାର ବିକାଶ ହାର ସକାରାତ୍ମକ ରହିବ। ଚାଇନା ୧.୨% ଏବଂ ଭାରତ ୧.୯%ରୁ ଅଧିକ ଅଭିବୃଦ୍ଧି କରିବା ନେଇ ଆଇଏମ୍ଏଫ୍ ଏହାର ପୂର୍ବାନୁମାନରେ ଆଶାବାଦୀ ରହିଛି। ସେହିଭଳି ୨୦୨୧ରେ ଚାଇନା ୯.୨% ଏବଂ ଭାରତ ୭.୨% ଅଭିବୃଦ୍ଧି ହାସଲ କରିବା ଦିଗରେ ସକ୍ଷମ ହେବ ବୋଲି ଏହି ଏଜେନ୍ସି ଏହାର ରିପୋର୍ଟରେ ଉଲ୍ଲେଖ କରିଛି।
ଆଇଏମ୍ଏଫ୍ର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, କରୋନା ବିରୋଧରେ ଏସୀୟ ଦେଶ ସମୂହଙ୍କ ପ୍ରଦର୍ଶନ ଉନ୍ନତ ସ୍ଥିତିରେ ରହିଛି। ବିଶ୍ୱର ଅନ୍ୟ ଦେଶଗୁଡ଼ିକ ତୁଳନାରେ ଏସୀୟ ଦେଶଗୁଡ଼ିକର ପ୍ରଦର୍ଶନ ଉନ୍ନତ ହେବା ସହ କରୋନା ପ୍ରଭାବକୁ କମ୍ କରି ଶୀଘ୍ର ସ୍ଥିିତାବସ୍ଥା ବଜାୟ ରଖିବାକୁ ସକ୍ଷମ ହେବେ। ଆଇଏମ୍ଏଫ୍ ପକ୍ଷରୁ ଏସିଆ ଏବଂ ପ୍ରଶାନ୍ତ ମହାସାଗରୀୟ ଅଞ୍ଚଳର ନିର୍ଦ୍ଦେଶକ ଚାଙ୍ଗ୍ ୟୋଙ୍ଗ୍ ରି କହିଛନ୍ତି ଯେ, କରୋନା ଭାଇରସ୍ ପ୍ରଭାବ ପ୍ରତି କ୍ଷେତ୍ରରେ ରହିଛି। ଏହା ଗମ୍ଭୀର ଏବଂ ଅପ୍ରତ୍ୟାଶିତ। ବିଶ୍ୱର ଅନ୍ୟ ସ୍ଥାନ ତୁଳନାରେ ଏସିଆ ବେଶ୍ ଭଲ ସ୍ଥିତିରେ ରହିଛି। ଏହା ଟ୍ରାକ୍କୁ ଶୀଘ୍ର ଫେରିବା ସମ୍ଭାବନା ରହିଛି। ଏସିଆର ଅଭିବୃଦ୍ଧି ହାର ବିଶ୍ୱର ଅନ୍ୟ ସ୍ଥାନ ତୁଳନାରେ ଅଧିକ ରହିଛି ବୋଲି ସେ ମତ ରଖିଛନ୍ତି।
୨୦୨୧ରେ ଏସିଆର ବିକାଶ ହାର ୭.୬% ରହିବ ବୋଲି ଅନୁମାନ କରାଯାଇଛି। ୟୋଙ୍ଗ୍ କହିଛନ୍ତି ଯେ, ଏହି ବିକାଶ ହାର ହାସଲ କରିବା ତଥା ପର୍ଫରମାନ୍ସ ସ୍ତର ଧାର୍ଯ୍ୟ ଲକ୍ଷ୍ୟ ଯାଏ ହାସଲ କରିବାକୁ ଏତେଟା ସହଜ ନୁହେଁ। ବିଶ୍ୱ ସ୍ତରରେ ଖସୁଥିବା ଅଭିବୃଦ୍ଧି ହାର ମଧ୍ୟ ଏସିଆ ବଜାରକୁ ପ୍ରଭାବିତ କରିବା ଆଶଙ୍କା ରହିଛି। ୨୦୨୧ରେ ମଧ୍ୟ ଉତ୍ପାଦନର ସ୍ତର କୋଭିଡ୍-୧୯ ସ୍ତର ତୁଳନାରେ କମ୍ ରହିପାରେ। ମାତ୍ର ଏହି ପୂର୍ବାନୁମାନ ଅନିଶ୍ଚିତ ବୋଲି ଏହା ପ୍ରକାଶ କରିଛି।
ଆଇଏମ୍ଏଫ୍ ମୁତାବକ,ଏସିଆର ୨ ବଡ଼ ବାଣିଜ୍ୟ ଭାଗୀଦାର ଦେଶ ଆମେରିକା ଏବଂ ୟୁରୋପରେ ବିକାଶ ହାର ୬ରୁ ୬.୬% ହ୍ରାସ ହେବା ଆଶଙ୍କା ଉପୁଜିଛି। ଚଳିତ ବର୍ଷ ଚାଇନା ଅଭିବୃଦ୍ଧି ୨୦୧୯ର ୬.୧% ପରିବର୍ତ୍ତେ ୧.୨%କୁ ଖସିପାରେ। କୋଭିଡ୍-୧୯ ଲାଗି ଏସିଆରେ ଉତ୍ପାଦନ ଗଭୀର ଭାବେ କ୍ଷତିଗ୍ରସ୍ତ କରିବା ଆଶଙ୍କା ରହିଛି। ରିପୋର୍ଟରେ କୁହାଯାଇଛି ଯେ, ୨୦୦୮-୦୯ର ବିଶ୍ୱ ଆର୍ଥତ୍କ ସଙ୍କଟ ବେଳେ ଚାଇନା ଏହାର ମୋଟ ଜିଡିପିର ୮% ପ୍ୟାକେଜ ଭାବେ ପ୍ରଦାନ କରିଥିଲା। ଏଥି ଯୋଗୁ ଚାଇନା ୨୦୦୯ରେ ୯.୪% ଅଭିବୃଦ୍ଧି ହାସଲ କରିବାକୁ ସକ୍ଷମ ହୋଇଥିଲା। ଚଳିତ ଥର ଏଭଳି ଆଶ୍ୱସ୍ତି ପ୍ୟାକେଜ ଆସିବା ନେଇ କହି ହେଉନାହିଁ।