ବାର୍ସିଲୋନା,୩ା୧୨- କିମ୍ବଦନ୍ତୀ ଫୁଟବଲର ଡିଏଗୋ ମାରାଡୋନାଙ୍କ ଅକାଳ ବିୟୋଗ ପରେ ବିଶ୍ୱର ବିଭିନ୍ନ କ୍ରୀଡ଼ାବିତ୍ମାନେ ଶ୍ରଦ୍ଧାଞ୍ଜଳି ଦେଇଥିଲେ। ହେଲେ ଏହି ମହାନ ଖେଳାଳିଙ୍କୁ ଶ୍ରଦ୍ଧାଞ୍ଜଳି ଦେବା ଲିଓନେଲ ମେସି ଓ ତାଙ୍କ କ୍ଲବ ବାର୍ସିଲୋନାକୁ ମହଙ୍ଗା ପଡ଼ିଛି। ଓସାସୁନା ବିପକ୍ଷରେ ଗତ ରବିବାର ଖେଳାଯାଇଥିବା ମ୍ୟାଚ୍କୁ ବାର୍ସିଲୋନା ୪-୦ ଗୋଲରେ ଜିତି ନେଇଥିଲା। ଏହି ମୁକାବିଲାରେ ଗୋଲ କରିବା ପରେ ଆର୍ଜେଣ୍ଟିନା ତାରକା ମେସି ଦଳୀୟ ଜର୍ସି ଉପରେ ଆଉ ଏକ ଜର୍ସି ପିନ୍ଧି ମାରାଡୋନାଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ। ଏ ନେଇ ତାଙ୍କୁ ସୋସିଆଲ ମିଡିଆରେ ଖୁବ୍ ପ୍ରଶଂସା କରିଥିଲେ ଫୁଟବଲ ପ୍ରଶଂସକ। କିନ୍ତୁ ସମାନ କାରଣ ପାଇଁ ମେସି ଓ ବାର୍ସିଲୋନାକୁ ଅର୍ଥ ଦଣ୍ଡରେ ଦଣ୍ଡିତ କରାଯାଇଛି।
ମେସିଙ୍କୁ ୬୦୦ ୟୁରୋ ଓ ସ୍ପାନିଶ ଲା ଲିଗା କ୍ଲବ ମାର୍ସିଲୋନାକୁ ୧୮୦ ୟୁରୋ ଅର୍ଥ ଦଣ୍ଡାଦେଶ ଦେଇଛି ସ୍ପାନିଶ ସକର ଫେଡେରେଶନର ପ୍ରତିଯୋଗିତା କମିଟି। ଏଭଳି ଦଣ୍ଡାଦେଶକୁ ବିରୋଧ କରିଥିଲା ବାର୍ସିଲୋନା। ମେସି ଯେଉଁଭଳି ଶ୍ରଦ୍ଧାଞ୍ଜଳି ଦେଇଥିଲେ, ତାହାକୁ ଗ୍ରହଣ କରିଛି ପ୍ରତିଯୋଗିତା କମିଟି। କୌଣସି ଖେଳାଳି ଗୋଲ ସ୍କୋର କରିବା ପରେ ଉତ୍ସାହିତ ହୋଇ ଶାର୍ଟ ଖୋଲିଲେ ଦଣ୍ଡିତ କରାଯିବାର ନିୟମ ରହିଥିବା ପ୍ରତିଯୋଗିତା କମିଟି ପକ୍ଷରୁ କୁହାଯାଇଛି।
