ନୂଆଦିଲ୍ଲୀ,୨୫-୪: ଦେଶର ସର୍ବବୃହତ କାର୍ ନିର୍ମାତା କମ୍ପାନୀ ମାରୁତି ସୁଜୁକି ଆସନ୍ତାବର୍ଷ ଏପ୍ରିଲ ପହିଲାରୁ ଡିଜେଲ ଇଞ୍ଜିନ କାର୍ ଉତ୍ପାଦନ ବନ୍ଦ କରିଦେବ। ବର୍ତ୍ତମାନ କମ୍ପାନୀ ୨୩% ଡିଜେଲ ଇଞ୍ଜିନ କାର ବିକୁଛି। ଉଲ୍ଲେଖଥାଉ କି, ୨୦୨୦ ଏପ୍ରିଲରୁ ବିଏସ୍ ୬ ନିୟମ ଲାଗୁ ହେବାକୁ ଯାଉଛି। ବାୟୁ ପ୍ରଦୂଷଣକୁ ହ୍ରାସ କରିବା ନେଇ ଏହି ମାନଦଣ୍ଡ ଧାର୍ଯ୍ୟ ହୋଇଛି। କମ୍ପାନୀ ଅଧ୍ୟକ୍ଷ ଆର୍.ସି.ଭାର୍ଗବ କହିଛନ୍ତି ଯେ, ଅଧିକ ଚାହିଦା ହେଲେ କମ୍ପାନୀ ୧୫୦୦ସିସିର ଡିଜେଲ ଇଞ୍ଜିନଯୁକ୍ତ କାର୍ ତିଆରି କରିବ। ତେବେ ଏସମ୍ପର୍କରେ ସେତେବେଳେ ନିଷ୍ପତ୍ତି ନିଆଯିବ। ସୂଚନାଯୋଗ୍ୟ ଯେ, ମାରୁତିର ନୂଆ କାର୍ ବିଏସ୍ ୬ ଇଞ୍ଜିନ ସହିତ ବଜାରକୁ ଆସୁଛି। ନିକଟରେ ଏହା ବିଏସ୍ ୬ ଇଞ୍ଜିନଯୁକ୍ତ ବଲେନୋ ଲଞ୍ଚ କରିଛି। ଆଗାମୀ ଦିନରେ ବିଏସ୍ ୬ର ଅଲ୍ଟୋ ବଜାରକୁ ଆସିଯିବ। ଏହି ମାନଦଣ୍ଡ ସହିତ ତାଳ ଦେଇ ଡିଜେଲ ଇଞ୍ଜିନକୁ ନବୀକରଣ କରିବା ମହଙ୍ଗା ହେଉଥିବାରୁ କମ୍ପାନୀ ଏହାର ଉତ୍ପାଦନ ବନ୍ଦ କରିବାକୁ ନିଷ୍ପତ୍ତି ନେଇଛି ବୋଲି ଯୁକ୍ତି ଦର୍ଶାଯାଉଛି। ବିଏସ୍ ୬ ଇଞ୍ଜିନର ପେଟ୍ରୋଲ ଓ ସିଏନ୍ଜି କାର୍ ଉପଲବ୍ଧ ହେବ ବୋଲି ଭାର୍ଗବ କହିଛନ୍ତି।