ଦାରିଙ୍ଗବାଡ଼ି,୭।୧୧(ଡି.ଏନ୍.ଏ): କନ୍ଧମାଳ ଜିଲା ଦାରିଙ୍ଗବାଡ଼ିଠାରେ ମାଣ୍ଡିଆ ଦିବସ ପାଳନ କରାଯିବ। ଆସନ୍ତା ମାର୍ଗଶୀର ପ୍ରଥମ ଗୁରୁବାର ରାଜ୍ୟରେ ମାଣ୍ଡିଆ ଦିବସ ପାଳନ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏହି କ୍ରମରେ ଆସନ୍ତା ଗୁରୁବାର ମାଣ୍ଡିଆ ଦିବସ ଦାରିଙ୍ଗବାଡ଼ିର ପଥପ୍ରାନ୍ତ ସେବାକେନ୍ଦ୍ର ପରିସରରେ ଧୁମ୍ଧାମ୍ରେ ପାଳନ କରାଯିବାକୁ ସ୍ଥିର କରାଯାଇଛି। ଏହାକୁ ଲୋକାଭିମୁଖି କରାଯିବା ସହିତ ବ୍ଳକର ୨୫ ପଞ୍ଚାୟତରେ ଜନସାଧାରଣଙ୍କୁ ଅବଗତ କରାଯିବା। ଏଥିସହ ମାଣ୍ଡିଆ ବ୍ୟବହାର କରିବାକୁ ସଚେତନ କରାଯିବ। କେବଳ ସେତିକି ନୁହେଁ ଏହି ଅବସରରେ ଅଧିକରୁ ଅଧିକ ଜନସାଧାରଣ ଯୋଗଦେବା ପାଇଁ ଏକ ସଚେତନତା ରଥକୁ ସୋମବାର ବ୍ଲକ କାର୍ଯ୍ୟାଳୟ ପରିସରରେ ଶୁଭାରମ୍ଭ କରାଯାଇଛି ।
କାର୍ଯ୍ୟକ୍ରମରେ ବ୍ଳକ ଅଧ୍ୟକ୍ଷ ସୁଶାନ୍ତ କୁମାର ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅନ୍ୟତମ ଅତିଥି ସ୍ଥାନୀୟ ବିଡିଓ ଗଦାଧର ପାତ୍ର ଯୋଗଦେଇ ଏହାକୁ ଉଦ୍ଘାଟନ କରିଛନ୍ତି।
ସରକାରଙ୍କ ମିଲେଟ ମିଶନ ଜରିଆରେ ଦାରିଙ୍ଗବାଡ଼ିରେ ସରକାରଙ୍କ ସହଭାଗିତା ଭାବେ ଜାଗୃତି ଏହି କ୍ଷୁଦ୍ରଦାନା ଶସ୍ୟର ପୁନରୁଉଦ୍ଧାର କାର୍ଯ୍ୟକୁ ସଫଳତାର ସହ କରିଆସିଛି। ମାଣ୍ଡିଆ ସମେତ ଅନ୍ୟ କ୍ଷୁଦ୍ରଦାନା ଶସ୍ୟ ଶରୀର ପାଇଁ ପୁଷ୍ଟିକର। ଏନେଇ ସରକାର ଏହି ଶସ୍ୟର ପୁନରୁଦ୍ଧାର କରିବାକୁ ପ୍ରୟାସ ଆରମ୍ଭ କରିଛନ୍ତି। ଏବେ ସାଧାରଣ ବଣ୍ଟନ ସାମଗ୍ରୀ ମଧ୍ୟରେ ଚାଉଳ ସହ ମାଣ୍ଡିକୁ ମଧ୍ୟ ଯୋଡ଼ିଛନ୍ତି। ଏହି ଉଦ୍ଘାଟନ ଉତ୍ସବରେ ଜାଗୃତି ସମ୍ପାଦକ କୈଳାଶ ଚନ୍ଦ୍ର ଦଣ୍ଡପାଟଙ୍କ ତତ୍ୱାଧାନରେ ମିଲେଟ ମିଶନର ପ୍ରକଳ୍ପ ସଂଯୋଜକ ମହେନ୍ଦ୍ର କୁମାର ପରିଡ଼ା, ସହ ପ୍ରକଳ୍ପ ସଂଯୋଜକ ଦେବାବନ୍ଦ ଦାସ, ରତିକାନ୍ତ ପଟ୍ଟନାୟକଙ୍କ ସହ ସମସ୍ତ କର୍ମକର୍ତ୍ତା, କୃଷି ବିଭାଗର ଟେକ୍ନିକାଲ ମ୍ୟାନେଜର ଅରୁଣ ପଟ୍ଟନାୟକ ପ୍ରମୁଖ ଯୋଗଦେଇଥିଲେ।
