ବ୍ରହ୍ମପୁର,୨୮।୨: କେନ୍ଦ୍ର ସରକାରଙ୍କ ପକ୍ଷରୁ ଗତ ୨୦୧୯ ସେପ୍ଟେମ୍ବର ୧ରେ ସାରା ଭାରତରେ ନୂଆ ମୋଟର ଯାନ ଆଇନ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ ହୋଇଥିଲା । ବିଭିନ୍ନ କାରଣରୁ ଲୋକମାନଙ୍କୁ ସେମାନଙ୍କ ଯାନବାହନର କାଗଜପତ୍ର ପ୍ରସ୍ତୁତ ପାଇଁ ରାଜ୍ୟ ସରକାର ୨ଟି ପର୍ଯ୍ୟାୟରେ ୬ ମାସ ସମୟ ଦେଇଥିଲେ। ତେବେ ମାର୍ଚ୍ଚ ୧ରୁ ଏହି ନୂତନ ଟ୍ରାଫିକ ନିୟମ କଡ଼ାକଡ଼ି ଭାବେ ପାଳନ ହେବ। ଏନେଇ ଟ୍ରାଫିକ ଡିଏସ୍ପି ସାର୍ଥକ ରାୟ ଓ ଥାନାଧିକାରୀ ସୁନିଲ ବେହେରା ଶୁକ୍ରବାର ଲୋକମାନଙ୍କୁ କମାପଲ୍ଲୀ ଛକରେ ସଚେତନ କରିଛନ୍ତି। ପ୍ରତ୍ୟେକ ଗାଡ଼ିଚାଳକ ସେମାନଙ୍କ ଗାଡ଼ିର ଆବଶ୍ୟକ କାଗଜପତ୍ର ଓ ଡ୍ରାଇଭିଂ ଲାଇସେନ୍ସ ଠିକ୍ ରଖିବାକୁ ପରାମର୍ଶ ଦେଇଛନ୍ତି। କମାପଲ୍ଲୀ ଛକରେ ଶୁକ୍ରବାର ପୂର୍ବାହ୍ନରୁ ମଧ୍ୟାହ୍ନ ପର୍ଯ୍ୟନ୍ତ ଟ୍ରାଫିକ ପୋଲିସ, ଷ୍ଟୁଡେଣ୍ଟ ଟ୍ରାଫିକ, ଖଲ୍ଲିକୋଟ କଲେଜର ଏନ୍ସିସି ଛାତ୍ରମାନେ ରାସ୍ତା କଡ଼ରେ ଛିଡା ହୋଇ ଲୋକଙ୍କୁ ସଚେତନ କରାଇଥିଲେ। ଗାଡ଼ି ଚଳାଇବା ବେଳେ ହେଲମେଟ୍ ପରିଧାନ କରିବା ସହ ଟ୍ରିପଲ ରାଇଡିଂରେ ଗାଡ଼ି ନ ଚଳାଇବାକୁ ସେମାନେ ପରାମର୍ଶ ଦେଇଥିଲେ। ଏପରିକି ଟ୍ରାଫିକ ନିୟମ ମାନିବା ସହ ଗାଡ଼ି ଚଳାଇବା ବେଳେ ଫୋନରେ କଥାବାର୍ତ୍ତା ନ ହେବାକୁ ମଧ୍ୟ ପରାମର୍ଶ ଦିଆଯାଇଛି । ୪ ଚକିଆ ଗାଡ଼ି ଚାଳକମାନେ ସିଟ୍ ବେଲ୍ଟ ବାନ୍ଧିବା ସହ ଗାଡ଼ି ଆଗରେ ବସିଥିବା ବ୍ୟକ୍ତି ମଧ୍ୟ ସିଟ୍ ବେଲ୍ଟ ବ୍ୟବହାର କରାଯିବାକୁ କୁହାଯାଇଛି। ମାର୍ଚ୍ଚ ପହିଲାରୁ ଯେଉଁ ଗାଡ଼ିଚାଳକମାନେ ଟ୍ରାଫିକ ନିୟମ ପାଳନ ନ କରିବେ ସେମାନଙ୍କୁ ନୂତନ ଟ୍ରାଫିକ ଆଇନ ଅନୁସାରେ ମୋଟା ଅଙ୍କର ଜରିମାନା ଦେବାକୁ ପଡ଼ିବ ବୋଲି ପୋଲିସ ସୂଚନା ଦେଇଛି।
