ଢେଙ୍କାନାଳ ଅଫିସ, ୨୦।୧୧-ମହିମା ଧର୍ମର ମହାନ ବାର୍ତ୍ତା ପ୍ରଚାର କରିବାକୁ ଆସନ୍ତା ମାର୍ଚ୍ଚ ୧୪ରେ ମହିମା ଜ୍ୟୋତି ପରିକ୍ରମାରେ ବାହାରିବ। ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକର ଗୁଣ୍ଡିଚାପଡ଼ା ମହିମାଟୁଙ୍ଗୀରୁ ଏହାର ଶୁଭାରମ୍ଭ କରାଯିବ। ଜିଲାର ବିଭିନ୍ନ ସ୍ଥାନ ପରିକ୍ରମା କରିବା ପରେ ମାର୍ଚ୍ଚ ୧୫ ଅପରାହ୍ନରେ କପିଳାସସ୍ଥିତ ତପୋପନ ପୀଠକୁ ପବିତ୍ର ଜ୍ୟୋତି ପ୍ରତ୍ୟାବର୍ତ୍ତନ କରିବାକୁ କାର୍ଯ୍ୟକ୍ରମ ସ୍ଥିରୀକୃତ ହୋଇଛି। ଜ୍ୟୋତିଯାତ୍ରା ପରିଚାଳନା ପରିଷଦ ବୈଠକରେ ଏ ନେଇ ଚୂଡ଼ାନ୍ତ ନିଷ୍ପତ୍ତି ନିଆଯାଇଛି।
୧୩ତାରିଖ ସନ୍ଧ୍ୟାରେ ତପୋବନ ମହିମା ପୀଠରେ ବ୍ରହ୍ମଜ୍ୟୋତିକୁ ଜାଗ୍ରତ କରାଯାଇ ରାତିରେ ଯୋରନ୍ଦାସ୍ଥିତ ମହିମାଗାଦିକୁ ଅଣାଯିବ। ୧୪ତାରିଖ ପୂର୍ବାହ୍ନ ୮ଟା ସୁଦ୍ଧା ସେଠାରୁ ବ୍ରହ୍ମଜ୍ୟୋତି ବାହାରି ଓଡ଼ାପଡ଼ା ବ୍ଲକ୍ ଗୁଣ୍ଡିଚାପଡ଼ା ଟୁଙ୍ଗୀରେ ପହଞ୍ଚତ୍ବ। ସେଠାରେ ଅତିଥିମାନେ ଆନୁଷ୍ଠାନିକ ଭାବେ ଏହାର ଶୁଭାରମ୍ଭ କରିବେ। ଏହାପରେ ପର୍ଯ୍ୟାୟକ୍ରମେ ଶଙ୍କରପ୍ରତାପପୁର ଶାସନ ବେରବ, ସୋରତ, ବାବନ୍ଧ, ବେଡ଼ାପଡ଼ା, ଖଣ୍ଡିତିରି ଏବଂ ରଞ୍ଜାଗୋଳ ଟୁଙ୍ଗୀ ପରିକ୍ରମା କରିବା ପରେ ଗାଲପଡ଼ାରେ ରାତ୍ରରହଣି ବ୍ୟବସ୍ଥା କରାଯାଇଛି। ମାର୍ଚ୍ଚ ୧୫ ପୂର୍ବାହ୍ନ ୯ଟା ସୁଦ୍ଧା ମହିମାଜ୍ୟୋତି ଗାଲପଡ଼ା ଛାଡ଼ି ଭାନୁପଡ଼ା ଅଭିମୁଖେ ବାହାରିବ। ସେଠାରୁ ଖଳିବେରଣା, ଗାଙ୍ଗିଯୋଡ଼ି, ଶିରିଡ଼ିହି ଗ୍ରାମ ପରିକ୍ରମା ସାରି ତପୋବନ ପୀଠକୁ ପ୍ରତ୍ୟାବର୍ତ୍ତନ କରିବ। ଜ୍ୟୋତିଯାତ୍ରାକୁ ଶୃଙ୍ଖଳିତ ଭାବେ ଶେଷ କରିବାକୁ ରବିବାର କୌପିନଧାରୀ ମହିମା ସମାଜର ସଭାପତି ଶ୍ରୀମଦ୍ ରଘୁନାଥ ବାବା, ଜ୍ୟୋତିଯାତ୍ରାର ମୁଖ୍ୟ ସଂଯୋଜକ ପ୍ରଦ୍ୟୁମ୍ନ ରଥ, ଆବାହକ ପ୍ରଶାନ୍ତ ମହାପାତ୍ର, ଶତ୍ରୁଘ୍ନ ସାହୁ, ସୁନନ୍ଦ ସାହୁ, ଲକ୍ଷ୍ମୀଧର ସାହୁ ପ୍ରମୁଖ ବିଭିନ୍ନ ପୀଠ ବୁଲି ସମୀକ୍ଷା କରିଛନ୍ତି।
ଜ୍ୟୋତିଯାତ୍ରାକୁ ସୁରୁଖୁରୁରେ ସାରିବାକୁ ଗୁଣ୍ଡିଚାପଡ଼ାର ମୀନକେତନ ସାହୁ, ଗୁମାନୀ ସାହୁ, ବିଜୟ ଦାସ, ବାବନ୍ଧର ବାବା ଶ୍ରୀଧର ଦାସ, ଗ୍ରାମସଭାପତି ରାଜକିଶୋର ସାହୁ, ରଞ୍ଜାଗୋଳ ଟୁଙ୍ଗୀର ସରୋଜ ବିଶ୍ୱାଳ, ଗାଲପଡ଼ା ଗ୍ରାମସଭାପତି ଶିଶିର ଦଳେଇ, କୋଠାଳୁ ଗ୍ରାମସଭାପତି ଗଙ୍ଗାଧର ଦାସ, ଭାନୁପଡ଼ାର ସନାତନ ସାହୁ ପ୍ରମୁଖଙ୍କ ସମେତ ସମ୍ପୃକ୍ତ ଗ୍ରାମର ମାନ୍ୟଗଣ୍ୟ ବ୍ୟକ୍ତିଙ୍କ ସହ ବିଭିନ୍ନ ବିଷୟରେ ଆଲୋଚନା କରାଯାଇଛି।