ବେଙ୍ଗାଲୁରୁ, ୩।୩- ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଆଗାମୀ ତ୍ରୟୋଦଶ ସଂସ୍କରଣ ମାର୍ଚ୍ଚ ୨୯ରୁ ଆରମ୍ଭ ହେବ। ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଓ ଚେନ୍ନାଇ ସୁପର୍ କିଙ୍ଗ୍ସ ମଧ୍ୟରେ ଉଦ୍ଘାଟନୀ ମୁକାବିଲା ଖେଳାଯିବ। ବିଶ୍ୱର ଏହି ବ୍ୟୟବହୁଳ ଟି୨୦ କ୍ରିକେଟ୍ ଲାଗି ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀ ପୂର୍ବପ୍ରସ୍ତୁତି ଆରମ୍ଭ କରିଦେଇଛନ୍ତି। ସ୍ଥାନୀୟ ଏମ୍. ଚିନ୍ନାସ୍ବାମ ଷ୍ଟାଡିୟମରେ ଚାଲିଥିବା ଚେନ୍ନାଇ କ୍ୟାମ୍ପ୍ରେ ଧୋନୀ ସୋମବାର ଯୋଗ ଦେଇ ଅଭ୍ୟାସ ଆରମ୍ଭ କରିଛନ୍ତି। ଏହି ଅବସରରେ ସାଥୀ ଖେଳାଳି ସୁରେଶ ରାଇନା ଧୋନୀଙ୍କୁ ସ୍ବାଗତ କରିଥିବା ଦେଖିବାକୁ ମିଳିଥିଲା। ଧୋନୀଙ୍କ ବେକକୁ ଧରି ରାଇନା କୁଣ୍ଢାଇବା ସହ କିଛି ସମୟ କଥାବାର୍ତ୍ତା ହୋଇଥିଲେ। ଏହି ଭିଡିଓକୁ ଚେନ୍ନାଇ ସୁପର୍ କିଙ୍ଗ୍ସ ଫ୍ରାଞ୍ଚାଇଜ ଏହାର ଟୁଇଟର୍ ପୃଷ୍ଠାରେ ଶେୟାର କରିଛି। ଏହାକୁ ବହୁ ସଂଖ୍ୟାରେ କ୍ରିକେଟ୍ପ୍ରେମୀ ଲାଇକ୍ କରିଥିବାବେଳେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୋମବାର ଟ୍ରେନିଂ ସେସନରେ ଅନ୍ୟ ଚେନ୍ନାଇ ଖେଳାଳିଙ୍କ ମଧ୍ୟରେ ଅମ୍ବାତି ରାୟୁଡୁ, ମୁରଲୀ ବିଜୟ, ପିୟୂଷ ଚାଓ୍ବଲା, କର୍ନ ଶର୍ମା ପ୍ରମୁଖ ଯୋଗ ଦେଇଥିଲେ।