ଅନୁଗୋଳ ଅଫିସ, ୧୭।୧୨
ଷ୍ଟାର ପ୍ଲସର ରିଏଲିଟି ଶୋ’ ମାଷ୍ଟର୍ସ ସେଫ୍ର ଶ୍ରେଷ୍ଠ ୧୫ ଜଣଙ୍କ ମଧ୍ୟରେ ସ୍ଥାନ ପାଇଛନ୍ତି ଅନୁଗୋଳର ଲଳନା ସ୍ମୃତିଶ୍ରୀ ସିଂହ (୨୬)। ଭୁବନେଶ୍ୱରରେ ଅନୁଷ୍ଠିତ ‘ମାଷ୍ଟର୍ସ ସେଫ୍ ସିଜନ୍-୬’ର ଅଡିସନରେ ସ୍ମୃତିଶ୍ରୀ ୫୦ ପ୍ରତିଯୋଗୀ ବିଶିଷ୍ଟ ମେଗା ଅଡିସନକୁ ଉନ୍ନୀତ ହୋଇଥିଲେ। ମାଷ୍ଟର୍ସ ସେଫ୍ର ପ୍ରଥମ ପର୍ଯ୍ୟାୟରେ ଶ୍ରେଷ୍ଠ ୧୦ ପ୍ରତିଯୋଗୀ ଚୟନ ହୋଇଥିବା ବେଳେ ଦ୍ୱିତୀୟ ପର୍ଯ୍ୟାୟରେ ଆଉ ୫ ଜଣ ଚୟନ ହୋଇଥିଲେ। ଦ୍ୱିତୀୟ ପର୍ଯ୍ୟାୟ ପ୍ରତିଯୋଗିତାରେ ସ୍ମୃତିଶ୍ରୀଙ୍କୁ ସାମିଲ କରାଯାଇଥିଲା। ମେଗା ଅଡିସନରେ ସ୍ମୃତିଶ୍ରୀ ‘କୁଟ୍ଟୁ-ଏ-ପାସ୍ତା’ ନାମକ ଏକ ସ୍ବାସ୍ଥ୍ୟକର ଡିସ୍ ପ୍ରସ୍ତୁତ କରିଥିଲେ। ଏହି ଡିସ୍ ବିଚାରକଙ୍କ ପସନ୍ଦ ଆସିଥିଲା। ଶନିବାର ପ୍ରସାରିତ ଶୋ’ରେ ୧୧ ପ୍ରତିଯୋଗୀଙ୍କ ମଧ୍ୟରେ ସ୍ମୃତିଶ୍ରୀ ତାଙ୍କ ଡିସ୍ ପ୍ରସ୍ତୁତ କରିଥିଲେ। ଏକ ଘଣ୍ଟାର ସମୟ ମଧ୍ୟରେ ତାଙ୍କ ଦ୍ୱାରା ଇଣ୍ଡିଆନ୍ ଇଟାଲିଆନ୍ ଡିସ୍ ‘କୁଟ୍ଟୁ-ଏ-ପାସ୍ତା’ ୩ ବିଚାରକ ବିକାଶ ଖାନ୍ନା, ରଣବୀର ବ୍ରାର୍ ଓ ବିନିତ ଭାଟ୍ଟିଆଙ୍କ ମନକୁ ପାଇଥିଲା। ଅନୁଗୋଳ ସହର ଗାନ୍ଧୀମାର୍ଗରେ ସ୍ମୃତିଶ୍ରୀଙ୍କ ପରିବାର ଲୋକ ରହୁଥିବାବେଳେ ନାଲ୍କୋର ଇଞ୍ଜିନିୟର ଭାବେ ତାଙ୍କ ବାପା ରଞ୍ଜିତ ସିଂହ କାର୍ଯ୍ୟରତ। ମା ରୀତା ସିଂହ ଗୃହିଣୀ। ସ୍ମୃତିଶ୍ରୀ ବିଜ୍ଞାନରେ ସ୍ନାତକ ସାରିବା ପରେ ଭୁବନେଶ୍ୱରରେ ହୋଟେଲ୍ ମ୍ୟାନେଜମେଣ୍ଟ କୋର୍ସ କରିଛନ୍ତି। ସୁଆଦିଆ ଖାଦ୍ୟ ପ୍ରସ୍ତୁତ କରି ଓଡ଼ିଶାକୁ ସ୍ବତନ୍ତ୍ର ପରିଚୟ ଦେବାକୁ ଚାହୁଁଛନ୍ତି ବୋଲି ସେ ଏହି ପ୍ରତିଯୋଗିତାରେ ବିଚାରକଙ୍କୁ କହିଥିଲେ। ସୂଚନାଯୋଗ୍ୟ, ୨୦୧୧ରେ ସ୍ମୃତିଶ୍ରୀ ମାଷ୍ଟର୍ସ ସେଫ୍ର ଅଡିସନ୍ରେ ପ୍ରତିଯୋଗୀ ହିସାବରେ ଯୋଗ ଦେଇଥିଲେ ମଧ୍ୟ ସେ ଆଗକୁ ଯାଇପାରି ନ ଥିଲେ।
