ମିର୍ଜାପୁର,୧୮।୬: ଉତ୍ତରପ୍ରଦେଶର ମିର୍ଜାପୁରରେ ଏକ ଆଶ୍ଚର୍ଯ୍ୟକର ଘଟଣା ଦେଖିବାକୁ ମିଳିଛି। କଟରାର କୋତବାଲି ନିକଟସ୍ଥ ହଥିଆ ଫାଟକ ମହଲାରେ ଅବସରପ୍ରାପ୍ତ କନଷ୍ଟେବଳ ଦିଲାବର ଖାଁ ଓ ତାଙ୍କର ପରିବାର ରୁହନ୍ତି। ଗତ ୩ବର୍ଷ ଧରି ୨ ପୁଅ ବାହାରେ ରହୁଥିବା ବେଳେ ଉକ୍ତ ଘରେ ଅର୍ଦ୍ଧ ପାଗଳ ଝିଅ ଓ ପତ୍ନୀଙ୍କ ସହ ଦିଲାବର ରହୁଥିଲେ। ମାସେ ପୂର୍ବରୁ କୌଣସି କାରଣରୁ ଝିଅଟିର ମୃତ୍ୟୁ ହୋଇଥିଲା। ତେବେ କନଷ୍ଟେବଳ ଜଣଙ୍କ ଝିଅ ଜୀବିତ ଥିବା ଭାବି ମୃତଦେହର ଅନ୍ତିମ ସଂସ୍କାର ନ କରି ନିଜ ଘରେ ମାସେ ପର୍ଯ୍ୟନ୍ତ ରଖିଥିଲେ। ପୂର୍ବରୁ ଘରୁ ଦୁର୍ଗନ୍ଧ ବାହାରିବାରୁ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ହେଲେ ପୋଲିସ ଘଟଣାସ୍ଥଳରେ ପହଞ୍ଚିଥିବା ବେଳେ ଦିଲାବର ତାଙ୍କୁ ଘରେ ପଶିବାକୁ ଦେଇ ନ ଥିଲେ। ରବିବାର ତାଙ୍କର ୨ ପୁଅ ଘରକୁ ଆସିଥିବା ବେଳେ ଭଉଣୀର ମୃତଦେହ ଘରେ ପଡ଼ିଥିବା ଦେଖିବାକୁ ପାଇଥିଲେ। ସୋମବାର ମୃତଦେହକୁ ପରିବାରେ ଲୋକେ ପୋତିବା ପାଇଁ ନେଉଥିବା ବେଳେ ପୋଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ କରାଇଛି। ଏଥିସହ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
