ବାମରା, ୪।୬ (ସ୍ବ.ପ୍ର.)
ବାମରା ବ୍ଲକ ସଦର ମହୁକୁମା ଗୋବିନ୍ଦପୁର ପଞ୍ଚାୟତରେ ଗତ ପ୍ରାୟ ୧ମାସ ହେବ ୮ଟି ନଳକୂଅ ଅଚଳ ହୋଇପଡିଥିବାରୁ ଲୋକେ ପାଣି ପାଇଁ ଡହଳବିକଳ ହେଉଛନ୍ତି । ପାନୀୟ ଜଳ ସମସ୍ୟାର ସମାଧାନ ପାଇଁ ନା ସ୍ଥାନୀୟ ସରପଞ୍ଚ ଗୁରୁତ୍ୱ ଦେଉଛନ୍ତି ନା ବିଡିଓ ଗୁରୁତ୍ୱ ଦେଉଛନ୍ତି । ଉଭୟ ପକ୍ଷରୁ ଦୋଷ ଲଦାଲଦି ଚାଲିଛି।
ଗୋବିନ୍ଦପୁର ପଞ୍ଚାୟତରେ ପ୍ରାୟ ୫୦ ହଜାରରୁ ଅଧିକ ଲୋକେ ବସବାସ କରୁଛନ୍ତି। ବ୍ୟବସାୟିକ ଓ ଗମନାଗମନ ଦୃଷ୍ଟିକୋଣରୁ ଏହା ଏକ ଗୁରୁତ୍ୱପୂର୍ଣ୍ଣ ସ୍ଥାନ। ହେଲେ ପାନୀୟ ଜଳ ଏକ ମୁଖ୍ୟ ସମସ୍ୟା। ୫ବର୍ଷ ପୂର୍ବେ ଡ୍ରେନ ଓ ରାସ୍ତା ନିର୍ମାଣ ସମୟରେ ପାଣି ପାଇପ୍ ଫାଟିଯିବା ପରଠାରୁ ଏ ପର୍ଯ୍ୟନ୍ତ ଗୋବିନ୍ଦପୁର ଅଞ୍ଚଳର ୩ରୁ ୪ଟି ୱାର୍ଡ ଓ ବଡ ଡୁମେରମୁଣ୍ଡାର ୨ଟି ୱାର୍ଡ ସଂପୂର୍ଣ୍ଣ ପ୍ରଭାବିତ ହୋଇ ରହିଛି । ଏ ନେଇ ବାରମ୍ବାର ବିଭାଗୀୟ କର୍ତ୍ତୃପକ୍ଷ, ବ୍ଲକ ପ୍ରଶାସନ, ପୂର୍ତ୍ତବିଭାଗ ଓ ପଞ୍ଚାୟତକୁ ଦୌଡି ଦୌଡି ଲୋକେ ନିରାଶ ହୋଇ ପଡିଛନ୍ତି । ବର୍ତ୍ତମାନ ପ୍ରାୟ ୧ମାସ ହେବ ପଞ୍ଚାୟତର ଗଣେଶନଗର, ନୂଆଁଟୋଲି (ହରିପଡା), ବଡ ଡୁମେରମୁଣ୍ଡା ଅଙ୍ଗନୱାଡି ପଡା ଓ ତୁରୀପଡା, ପଣ୍ଡରିପଥର, ମୁଣ୍ଡାଢ଼ିପାର ବଗିଚାପଡା, ନୂଆଁଡିହି, ମୁଣ୍ଡାଢ଼ିପା ଛକ ଓ ଷ୍ଟେସନବସ୍ତିରେ ଥିବା ଗୋଟିଏ ଲେଖାଏଁ ନଳକୂଅ ସଂପୂର୍ଣ୍ଣ ଅଚଳ ହୋଇ ପଡି ରହିଛି । ଏ ନେଇ ସରପଞ୍ଚଙ୍କୁ ପଚାରିବାରୁ ବାମରା ବିଡିଓ ଏଥିରେ କୌଣସି ସହଯୋଗ କରୁନାହାନ୍ତି । ନ ହେଲେ ସେ ଏଥିପାଇଁ ସଦାବେଳେ ଚେଷ୍ଟିତ ବୋଲି ସଫେଇ ଦେଇଥିଲେ । ଅପରପକ୍ଷେ, ବିଡିଓ ସୁଶୀଲ କୁଜୁରଙ୍କୁ ପଚାରିବାରୁ ସରପଞ୍ଚ ମିନାକ୍ଷୀ ମାଝୀ ଜାଣିଶୁଣି ଏହିଭଳି କରୁଛନ୍ତି ବୋଲି କହିଥିଲେ । ପଞ୍ଚାୟତ ଫଣ୍ଡରୁ ଟଙ୍କା ଟ୍ରାନ୍ସଫର କଲାପରେ ନଳକୂଅର ବିଭିନ୍ନ ସରଞ୍ଜାମ ଯୋଗାଇବାର ନିୟମ ରହିଛି । ମାତ୍ର ସେ ଏହିଭଳି ନ କରି ଦୋଷାରୋପ କରୁଛନ୍ତି ବୋଲି ପାଲଟା ଅଭିଯୋଗ ରଖିଛନ୍ତି।