ଖୋର୍ଦ୍ଧା ଅଫିସ,୧୧ା୬: ରାଜ୍ୟରେ କରୋନା ଭୂତାଣୁ କାୟା ବିସ୍ତାର କରିବାରେ ଲାଗିଛି। କରୋନା ମୁକାବିଲା ପରିବର୍ତ୍ତେ ରାଜ୍ୟରେ ମାସ୍କ କିଣାବିକା ଦୁର୍ନୀତି ଚାଲିଛି। ଏହାର ପ୍ରତିବାଦରେ ଗୁରୁବାର ଖୋର୍ଦ୍ଧା ଜିଲା କଂଗ୍ରେସ କମିଟି ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ ସହ ମୁଖ୍ୟମନ୍ତ୍ରୀ ଓ ସ୍ବାସ୍ଥ୍ୟମନ୍ତ୍ରୀଙ୍କ ଇସ୍ତଫା ଦାବି କରାଯାଇଛି। ସିବିଆଇ ତଦନ୍ତ ଦାବିରେ କଂଗ୍ରେସ କର୍ମୀମାନେ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି। ଏନେଇ ଜଟଣୀ ବିଧାୟକ ସୁର ରାଉତରାୟ କହିଛନ୍ତି, ଦୀର୍ଘ ୨୦ ବର୍ଷର ନିର୍ମଳ ସରକାର ଦୁର୍ନୀତିରେ ଫସିଛନ୍ତି। କରୋନା ଆତଙ୍କରେ ଆଜି ସାରା ଦେଶ ସଂଘର୍ଷ କରୁଥିବା ବେଳେ ନବୀନ ସରକାର କୋଭିଡ୍-୧୯ ମେଡିକାଲ ସାମଗ୍ରୀ ଓ ମାସ୍କ କିଣାବିକା ନାଁରେ କୋଟିକୋଟି ଟଙ୍କା ହେରଫେର୍ କରିଛନ୍ତି। ଗରିବ ଖଟିଖିଆଙ୍କ ଟଙ୍କାରେ ସଚିବ,ମନ୍ତ୍ରୀ ମଉଜ କରୁଛନ୍ତି। ଗତ ଅଢ଼େଇ ମାସ ହେଲାଣି ସାଧାରଣ ଜନତା କାମଧନ୍ଦା ନ ପାଇ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକଙ୍କ ଆହ୍ବାନରେ ସାରା ରାଜ୍ୟରେ କଂଗ୍ରେସ ପ୍ରତିବାଦ କରିବ। ଏଥିସହିତ ବିଧାୟକ ସୁର ରାଉତରାୟ ପ୍ରମିଳା ମଲ୍ଲିକଙ୍କୁ ଟାର୍ଗେଟ କରିଥିଲେ। ମାସ୍କ ଦୁର୍ନୀତିରେ ସେ ସଫେଇ ଦେବା ହାସ୍ୟାସ୍ପଦ। ସେ ସାଧାରଣ ଜନତାଙ୍କ ଉଦ୍ଦେଶ୍ୟରେ କହିଛନ୍ତି, ଖୋର୍ଦ୍ଧା ଓ ଜଟଣୀ ଅଞ୍ଚଳରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ନିଜେ ସଚେତନ ହୁଅ। କୌଣସି ସରକାର କାହାକୁ ରକ୍ଷା କରିପାରିବେନି। କାମ ନ ଥିଲେ ଘରେ ରୁହ। ମାସ୍କ ଓ ସାମାଜିକ ଦୂରତା ବଜାୟ ରଖି କାର୍ଯ୍ୟ କରିବାକୁ ପରାମର୍ଶ ସୁର ରାଉତରାୟ ପରାମର୍ଶ ଦେଇଛନ୍ତି ।