ବିଜେପୁର, ୨୧।୪(ଡି.ଏନ୍.ଏ.): କରୋନା ମହାମାରୀକୁ ପ୍ରତିହତ କରିବାକୁ ସରକାରଙ୍କ ପକ୍ଷରୁ ବ୍ୟାପକ ସଚେତନାମୂଳକ ପଦକ୍ଷେପ ଗ୍ରହଣ କରାଯାଉଛି । ଏହି କ୍ରମରେ ବାହାରକୁ ବାହାରିବା ସମୟରେ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ହେଲେ କିଛି ଅମାନିଆ ଏହାକୁ ଉଲଂଘନ କରୁଥିବା ଦେଖାଯାଉଛି। ବରଗଡ଼ ଜିଲା ବିଜେପୁର ତହସିଲ ପ୍ରଶାସନ ପକ୍ଷରୁ ମଙ୍ଗଳବାର ଲାଉମୁଣ୍ଡା ସାପ୍ତାହିକ ବଜାରରେ ଚଢାଉ ହୋଇଥିଲା। ବଜାରରେ ପରିବା କିଣୁଥିବା ଅନେକ ଲୋକ ମାସ୍କ ପିନ୍ଧି ନ ଥିବାବେଳେ କେତେକ ଦୋକାନୀ ମଧ୍ୟ ଏହାର ଉଲ୍ଲଂଘନ କରୁଥିବା ଚଢାଉବେଳେ ଜଣାପଡିଥିଲା। ସମୁଦାୟ ୬୦ଜଣ ମାସ୍କ ପିନ୍ଧି ନ ଥିବାରୁ ୧୨୦୦୦ଟଙ୍କା ଜରିମାନା ଗଣିଥିଲେ। ମାଜିଷ୍ଟ୍ରେଟ ଦାୟିତ୍ୱରେ ତହସିଲଦାର କୁଳମଣି ରଣବିଡାଙ୍କ ନେତୃତ୍ୱରେ ଆଇଆଇସି ରାଜେନ୍ଦ୍ର ସିଆଲଙ୍କ ସମେତ ବିଭାଗୀୟ କର୍ମଚାରୀ ଉକ୍ତ ଚଢାଉରେ ସାମିଲ ହୋଇଥିଲେ। ଲାଉମୁଣ୍ଡା ସାପ୍ତାହିକ ବଜାରଟିର ସ୍ଥାନ ସଂକୀର୍ଣ୍ଣ ହୋଇଛି। ତେଣୁ ବଜାରକୁ ଅନ୍ୟତ୍ର ସ୍ଥାନାନ୍ତର କରିବା ସହ ସାମାଜିକ ଦରତ୍ୱ ଓ ମାସ୍କ ଲଗାଇବା ଦିଗରେ ଜନସାଧାରଣଙ୍କୁ ସଚେତନ କରିବାକୁ ସରପଞ୍ଚ ସୁବର୍ଣ୍ଣ ମେହେରଙ୍କୁ ତହସିଲଦାର କୁଳମଣି ରଣବିଡା ପରାମର୍ଶ ଦେଇଥିଲେ। ଗୋଟିଏ ଦିନରେ ୬୦ଜଣ ମାସ୍କ ନ ପିନ୍ଧି ୧୨୦୦୦ଟଙ୍କା ତଣ୍ଡ ଗଣିଥିବାରୁ ଅଞ୍ଚଳରେ ଭୟ ସୃଷ୍ଟି ହୋଇଛି।