ବେଜିଂ,୪।୨: ଚାଇନାରେ କରୋନା ଭାଇରସ୍କୁ ନେଇ ଆତଙ୍କ ଖେଳିଯାଇଛି। ଏହି ଭୂତାଣୁ ସଂକ୍ରମଣରେ ଏପର୍ଯ୍ୟନ୍ତ ଚାଇନାରେ ୪୨୬ ଜଣଙ୍କ ମୃତ୍ୟୁ ଘଟିଲାଣି। ଚାଇନା ସରକାର ଏହି ଭୂତାଣୁ ନ ବ୍ୟାପିବା ପାଇଁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରୁଛନ୍ତି। ଏପରିକି ସମସ୍ତଙ୍କୁ ମାସ୍କ ପିନ୍ଧିବା ପାଇଁ ନିର୍ଦ୍ଦେଶ ଦିଆଯାଇଛି। ଚାଇନାରେ ଜଣେ ମହିଳା ବଜାରକୁ ମାସ୍କ ପିନ୍ଧି ଆସି ନ ଥିବାରୁ ପୋଲିସ ତାଙ୍କୁ ହାତକଡି ପକାଇ ହସ୍ପିଟାଲକୁ ନେଇଥିଲା। ସେଠାରେ ସମ୍ପୃକ୍ତ ମହିଳାଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ତାଙ୍କୁ କରୋନା ଭାଇରସ୍ ସଂକ୍ରମଣ ହୋଇ ନ ଥିବା ଜଣାପଡିବା ପରେ ପୋଲିସ ଛାଡିଦେଇଥିଲା। ଦକ୍ଷିଣ ଚାଇନାର ଗୁଆନଡୋଙ୍ଗ ପ୍ରାନ୍ତରେ ଏଭଳି ଘଟଣା ଘଟିଛି। ସୂଚନାଯୋଗ୍ୟ, ଗୁଆନଡୋଙ୍ଗ ପୋଲିସ ଜାନୁୟାରୀ ୨୬ରେ ମାସ୍କ ନ ପିନ୍ଧିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଘୋଷଣା କରିଥିଲା।