ପାଟଣା,୧୯।୫(ସ୍ବ.ପ୍ର.)-କରୋନା ଭାଇରସ୍ ସଂକ୍ରମଣ ପାଇଁ ସାରା ଦେଶରେ କଟକଣା ଘୋଷଣା କରାଯାଇଛି। ମେ ୧୮ ତାରିଖରୁ ଚତୁର୍ଥ ପର୍ଯ୍ୟାୟ ଲକ୍ଡାଉନ୍ ଆରମ୍ଭ ହୋଇଛି। ଏହି ସମୟରେ ବିବାହ କାର୍ଯ୍ୟ ପାଇଁ ଅନୁମତି ମିଳିଛି। ମାସ୍କ ପିନ୍ଧି, ସାମାଜିକ ଦୂରତ୍ୱ ପାଳନ କରି ବିବାହ କାର୍ଯ୍ୟ କରିବାକୁ ଗାଇଡ୍ଲାଇନ୍ ଜାରି କରାଯାଇଛି। କେନ୍ଦୁଝର ଜିଲା ପାଟଣା ବ୍ଲକ ତୁରୁମୁଙ୍ଗା ପଞ୍ଚାୟତ କଈଣ୍ଡା ଗ୍ରାମରେ ରବିବାର ନିଆରା ଢଙ୍ଗରେ ଏକ ବିବାହ କାର୍ଯ୍ୟ ସମ୍ପନ୍ନ ହୋଇଛି। ସଦର ବ୍ଲକ ଅଞ୍ଜର ଗ୍ରାମର ସଚ୍ଚିଦାନନ୍ଦ ସାହୁଙ୍କ ଝିଅ ରିତାରାଣୀଙ୍କ ସହ ଚମ୍ପୁଆ ବ୍ଲକ ଷଡଙ୍ଗୀ ଗ୍ରାମର ମଧୁସୂଦନ ସାହୁଙ୍କ ସାନପୁଅ ମିତ୍ର ସୁନ୍ଦରଙ୍କ ମଧ୍ୟରେ ବୈଦିକ ରୀତିରେ ସମ୍ପନ୍ନ ହୋଇଛି। ବାହାଘର ସମ୍ପୂର୍ଣ୍ଣ ନିରାଡମ୍ବର ଭାବେ ହୋଇଥିଲା। ବାହାଘରରେ ନା ଥିଲା ରୋଶଣି ନା ବାଜିଥିଲା ସାହନାଇ ନା ସାଥିରେ ଥିଲେ ବରଯାତ୍ରୀ, କେବଳ ବର କନ୍ୟାଙ୍କ ସହ ବ୍ରାହ୍ମଣ ଓ କନ୍ୟା ମାତା ପିତା ଓ ବର ମାତା ପିତା। ସାମାଜିକ ଦୂରତା ଅବଲମ୍ବନ କରାଯାଇ ମୁହଁରେ ମାସ୍କ ବାନ୍ଧି ବିବାହ କାର୍ଯ୍ୟ ସମ୍ପନ୍ନ କରାଯାଇଥିଲା। କେବଳ ଶଙ୍ଖ ହୁଳ ହୁଳି ଆଉ ବ୍ରାହ୍ମଣଙ୍କ ମନ୍ତ୍ର ଉଚ୍ଚାରଣ ମଧ୍ୟରେ ଶେଷ ହୋଇଥିଲା ବିବାହ କାର୍ଯ୍ୟ। କରୋନା ପାଇଁ ଉପସ୍ଥିତ ଲୋକଙ୍କୁ ନବଦମ୍ପତି ମାସ୍କ, ସାନିଟାଇଜର ସହିତ ଅସହାୟ ଲୋକଙ୍କୁ ଶୁଖିଲା ଖାଦ୍ୟ ବଣ୍ଟନ କରିଥିଲେ। ଏଥିସହ ଏହି ନବଦମ୍ପତି ବିବାହକୁ ସ୍ମରଣୀୟ କରିବା ପାଇଁ ପ୍ରଧାନମନ୍ତ୍ରୀଙ୍କ କେୟାର ଫଣ୍ଡ ଓ ମୁଖ୍ୟମନ୍ତ୍ରୀଙ୍କ ରିଲିଫ ଫଣ୍ଡକୁ ୫ହଜାର ଟଙ୍କା ଲେଖାଏଁ ଚେକ୍ ଆକାରରେ ସହାୟତା ରାଶି ପ୍ରଦାନ କରିଛନ୍ତି।
