ବରଗଡ଼ ଅଫିସ୍,୧୬।୪- କରୋନା(କୋଭିଡ୍-୧୯) ଭୂତାଣୁ ସଂକ୍ରମଣକୁ ପ୍ରତିହତ କରିବା ଲକ୍ଷ୍ୟରେ ମୁହଁରେ ମାସ୍କ, ଗାମୁଛା କିମ୍ବା ରୁମାଲ ବାନ୍ଧିବା ଉପରେ ଗୁରୁତ୍ୱ ଦିଆଯାଇଛି । ଏହି କ୍ରମରେ ଗୁରୁବାର ବରଗଡ଼ ଜିଲା ସୋହେଲା ବ୍ଲକ ଘେଁସ୍ ବଜାରରେ ପଦ୍ମଶ୍ରୀ ହଲଧର ନାଗ ଲୋକଙ୍କୁ ମାସ୍କ ବଣ୍ଟନ କରିଥିଲେ । ସେ କହିଛନ୍ତି, କରୋନା ମହାମାରୀ ରୂପ ନେଇଛି । ଏହାକୁ ରୋକିବା ପାଇଁ ସମ୍ମିଳିତ ଉଦ୍ୟମ ଲୋଡ଼ା । ଉଭୟ ରାଜ୍ୟ, କେନ୍ଦ୍ର ସରକାର ଏଥିପାଇଁ ସମାଜିକ ଦୂରତ୍ୱ, ମୁହଁରେ ମାସ୍କ ବାନ୍ଧିବା, ଜରୁରୀ ପରିସ୍ଥିତିରେ ଘରୁ ନ ବାହାରିବାକୁ ବାରମ୍ବାର ପରାମର୍ଶ ଦେଉଛନ୍ତି । ଆମେ ବଞ୍ଚିଲେ ଯାଇ ଦେଶ ବଞ୍ଚିବ । ଫଳରେ ସରକାରଙ୍କ ଏହି ବାର୍ତ୍ତା ଲୋକଙ୍କ ପାଖକୁ ପହଞ୍ଚାଇବା ସହିତ ସେ ମାସ୍କ ବଣ୍ଟନ କରିଥିବା କହିଥିଲେ । ଭାଜପା ନେତା ଇରାସିସ୍ ଆଚାର୍ଯ୍ୟଙ୍କ ସହାୟତାରେ ଏହା ଲୋକଙ୍କୁ ବଣ୍ଟନ କରାଯାଇଥିଲା ବୋଲି ହଲଧର କହିଛନ୍ତି ।