ବାସୁଦେବପୁର,୧୧ା୫(ଡି.ଏନ୍.ଏ.)-ବାସୁଦେବପୁର ଠାରେ ଭଦ୍ରକ ଏମ୍ପି ମଞ୍ଜୁଲତା ମଣ୍ଡଳ ତାଙ୍କ ଆଞ୍ଚଳିକ ଅନୁଦାନ ପାଣ୍ଠିରୁ କରୋନା ଯୁଦ୍ଧାଙ୍କୁ ମାସ୍କ, ସାନିଟାଇଜର୍, ଗ୍ଲୋବସ୍, କ୍ୟାପ ଆଦି ସାମଗ୍ରୀ ସୋମବାର ବଣ୍ଟନ କରିଛନ୍ତି। ବାସୁଦେବପୁର ଟାଉନହଲରେ ପ୍ରଥମେ ଏମ୍ପି ମଣ୍ଡଳ ଗଣମାଧ୍ୟମ ପ୍ରତିନିଧିଙ୍କୁ ଏହି ସାମଗ୍ରୀ ବଣ୍ଟନ କରିଥିଲେ। ପରେ ବାସୁଦେବପୁର ଡାକ୍ତରଖାନାରେ ପହଞ୍ଚି ମୁଖ୍ୟ ଚିକିତ୍ସାଧିକାରୀ ଡା. ସୁଶାନ୍ତ କୁମାର ସାମନ୍ତ, ବରିଷ୍ଠ ଡାକ୍ତର ଭଜହରି ସାହୁଙ୍କ ସମେତ ସମସ୍ତ ଡାକ୍ତର ସ୍ବାସ୍ଥ୍ୟ କର୍ମଚାରୀ, ଆଶାକର୍ମୀ, ଫାର୍ମାସିଷ୍ଟ, ଷ୍ଟାଫ୍ନର୍ସ ପ୍ରମୁଖ କରୋନା ଯୁଦ୍ଧାଙ୍କୁ ଏମ୍ପି ନିଜ ହାତରେ ଏହି ମାସ୍କ ପିନ୍ଧାଇବା ସହିତ ଅନ୍ୟ ଆନୁଷଙ୍ଗିକ ସାମଗ୍ରୀ ବଣ୍ଟନ କରି ସେମାନଙ୍କ ମନୋବଳକୁ ବୃଦ୍ଧି କରିଛନ୍ତି। ପରେ ବ୍ଲକ ପୌରପାଳିକା କାର୍ଯ୍ୟାଳୟ ଥାନାରେ କାର୍ଯ୍ୟରତ କର୍ମଚାରୀଙ୍କୁ ଏହି ସାମଗ୍ରୀ ଏମ୍ପି ବଣ୍ଟନ କରିଥିଲେ। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଧାମନଗର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ, ଏମ୍ପିଙ୍କ ପ୍ରତିନିଧି ସୁରେଶ ଚନ୍ଦ୍ର ମହାନ୍ତି, ଯୁବ ସାମାଜିକ କର୍ମୀ ଦେବଦର୍ଶନ ଦାଶ, ପୂର୍ବତନ ସରପଞ୍ଚ ଭାଗିରଥି ବଳ, ବିଡିଓ ପ୍ରଣବ କୁମାର ବେହେରା, ପୌର ନିର୍ବାହୀ ଅଧିକାରୀ ତାପସ ରଞ୍ଜନ ଜେନା, ଆଇଆଇସି ମଧୁମିତା ମହାନ୍ତି ପ୍ରମୁଖ ଉପସ୍ଥିତ ଥିଲେ।