ମା’ ଜଣେ ଆଇଏଏସ୍ ଅଫିସର। ବାପା ବିଚାରପତି। ହେଲେ ଲଣ୍ଡନରେ କରିଥିବା ଚାକିରିକୁ ଛାଡ଼ି ବିଧାୟିକା ହେବାକୁ ମନ ବଳାଇଛନ୍ତି ଝିଅ। ଏପରି ଏକ ଘଟଣା ଏବେ ଜାତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି।
ହରିଆଣାରେ ହେବାକୁ ଥିବା ବିଧାନସଭାରେ ପୁନ୍ହାନା ବିଧାନସଭା ଆସନରୁ ନିର୍ବାଚନ ମଇଦାନକୁ ଓହ୍ଲାଉଛନ୍ତି ନୌକ୍ଷମ ଚୌଧୁରୀ। ନୌକ୍ଷମଙ୍କ ଶିକ୍ଷାଗତ ଯୋଗ୍ୟତାକୁ ଯଦି ଦେଖାଯାଏ, ତେବେ ସେ ତିନୋଟି ବିଷୟରେ ଏମ୍ଏ କରିଛନ୍ତି। ପ୍ରଥମେ ଦିଲ୍ଲୀ ବିଶ୍ୱବିଦ୍ୟାଳୟରେ ଦୁଇଟି ବିଷୟରେ ଏମ୍ଏ କରିବା ପରେ ସେ ଲଣ୍ଡନ ଚାଲିଯାଇଥିଲେ। ସେଠାରେ ପଢ଼ୁଥିବା ସମୟରେ ତାଙ୍କୁ ଏକ କମ୍ପାନୀରେ କାମ କରିବାକୁ ସୁଯୋଗ ମିଳିଥିଲା। ହେଲେ ଏବେ ସେ ସବୁକିଛି ଛାଡ଼ି ବିଧାୟିକା ହେବାକୁ ନିଷ୍ପତ୍ତି ନେଇଛନ୍ତିି। ତାଙ୍କୁ ଭାଜପା ପକ୍ଷରୁ ଟିକେଟ ମଧ୍ୟ ମିଳି ସାରିଛି।
ତେବେ ରାଜନୀତିରେ ନୂଆ ନୁହନ୍ତି ନୌକ୍ଷମ। ସେ ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଥିବା ସମୟରେ ଛାତ୍ର ରାଜନୀତିରେ ସାମିଲ ଥିଲେ। ସେଠାରୁ ପଢ଼ା ଶେଷ କରିବା ପରେ ସେ ଲଣ୍ଡନ ଚାଲିଯାଇଥିଲେ। ତିନି ବର୍ଷ ଧରି କାମ କରିବା ପରେ ତାଙ୍କୁ ସ୍ବଦେଶକୁ ଫେରିବାକୁ ଇଚ୍ଛା ହୋଇଥିଲା। ସେ ନିଜର ଘର, ପରିବାର ତଥା ରାଜ୍ୟବାସୀଙ୍କପାଇଁ କିଛି କରିବାକୁ ଚାହୁଁଥିଲେ। ଏଣୁ ସେ ଶେଷରେ ଭାରତ ଫେରିଥିବା କୁହାଯାଉଛି। ଏବେ ତାଙ୍କୁ ମାତ୍ର ୨୬ ବର୍ଷ। ଏକ ମାସ ପୂର୍ବେ ସେ ଭାଜପାରେ ଯୋଗ ଦେଇଥିବା ବେଳେ ଏବେ ନିର୍ବାଚନରେ ଲଢ଼ିବା ପାଇଁ ଟିକେଟ ପାଇଛନ୍ତି।
