ଦଶମନ୍ତପୁର,୧୪।୩(ଡି.ଏନ୍.ଏ.)ଦଶମନ୍ତପୁର ବ୍ଲକ ପିଣ୍ଡାପଦର ପଞ୍ଚାୟତ ଅଙ୍ଗାରଗୁଡ଼ାରେ ଦୁଇ ଭଉଣୀ, ଭାଇ ମା’-ବାପାଙ୍କ ମୃତ୍ୟୁ ପରେ ଏବେ ବେସାହାରା ହୋଇପଡ଼ିଛନ୍ତି। ସେମାନେ ହେଲେ ମୃତ ଲିମଦାଶ ଜାନୀ ଓ ସ୍ତ୍ରୀ ରୁକମଣି ଜାନୀଙ୍କ ବଡ଼ ଝିଅ ମୋତି ଓ ପୁଅ ଦୁକୁ (୧୧)। ମୋତିଙ୍କୁ ୬ ବର୍ଷ ହୋଇଥିବା ବେଳେ ପିତା ଲିମଦାଶ ଅଜଣା ରୋଗରେ ଆକ୍ରାନ୍ତ ହୋଇ କୋରାପୁଟ ଜିଲା ମୁଖ୍ୟ ଚିକିତ୍ସାଳୟରେ ମାସାଧିକ କାଳ ଚିିକିତ୍ସିତ ହେବା ପରେ ଆଖି ବୁଜିଥିଲେ। ସେତେବେଳେ ପୁଅ ଦୁକୁ ଜନ୍ମ ହେବାର ମାତ୍ର ୮ ଦିନ ହୋଇଥାଏ। ବାପାଙ୍କୁ ଦେଖି ଚିହ୍ନିବା ଓ ତାଙ୍କ ସ୍ନେହ ପାଇବା ପୂର୍ବରୁ ସେ ଆରପାରିକୁ ଚାଲିଗଲେ। ଏହାପରେ ସ୍ତ୍ରୀ ରୁକମଣିଙ୍କ ମୁଣ୍ଡରେ ୩ ପ୍ରାଣୀ କୁଟୁମ୍ବର ବୋଝ ପଡ଼ିଥିଲା। ୮ ଦିନର ଶିଶୁକୁ ନିଜ ପିଠି ପଛରେ ବାନ୍ଧି ଗାଁରେ କୁଲି କରି ବହୁ କଷ୍ଟରେ ଅର୍ଥ ରୋଜଗାର କରି ସମସ୍ତଙ୍କ ପେଟକୁ ଦାନା ଦେଉଥିଲେ ରୁକମଣି। ପୁଅ ଦୁକୁ ଗାଁ ନିକଟସ୍ଥ ଖଜୁରିଗୁଡ଼ା ବିଦ୍ୟାଳୟରେ ଷଷ୍ଠ ଶ୍ରେଣୀରେ ପଢ଼ିବା ବେଳକୁ ଗତ ୧ ତାରିଖ ଅସୁସ୍ଥ ଥାଇ ଆଖି ବୁଜିଛନ୍ତି ରୁକମଣି। ଫଳରେ ଦୁଇ ଝିଅ, ପୁଅ ଏବେ ମା’-ବାପାଛେଉଣ୍ଡ ହେବା ସହ ବେସାହାରା ପାଲଟି ଯାଇଛନ୍ତି। ଗାଁ ଲୋକେ ଅର୍ଥ ଆଦାୟ କରି ଶବଦାହ କରିଛନ୍ତି। ଉଭୟ ଭଙ୍ଗା ଦଦରା ଘରେ କେମିତି ଚଳିବେ, ତାହା ଏବେ ବଡ଼ ପ୍ରଶ୍ନ। ପ୍ରଶାସନ ଏମାନଙ୍କୁ ସହଯୋଗର ହାତ ବଢ଼ାଇବାକୁ ଦାବି ହୋଇଛି।