ବ୍ରହ୍ମପୁର ଅଫିସ୍,୧୬ା୭-ଦିନ ଥିଲା, ବ୍ରହ୍ମପୁର ସହରସ୍ଥିତ ବିଦ୍ୟାଳୟଗୁଡ଼ିକରେ ପ୍ରଥମଠାରୁ ଦଶମ ଶ୍ରେଣୀ ପର୍ଯ୍ୟନ୍ତ ହଜାର ହଜାର ଛାତ୍ରୀଛାତ୍ର ତେଲୁଗୁ ଭାଷାରେ ଅଧ୍ୟୟନ କରୁଥିଲେ ।
ହେଲେ ଇଂଲିଶ ମାଧ୍ୟମର ଗୁରୁତ୍ୱ ଏବଂ ଆବଶ୍ୟକତା ଅନୁଯାୟୀ ତେଲୁଗୁ ପାଠ୍ୟ ପୁସ୍ତକ ନ ମିଳିବାରୁ ଧୀରେ ଧୀରେ ତେଲୁଗୁ ଭାଷାରେ ଅଧ୍ୟୟନ ପ୍ରତି ଛାତ୍ରୀଛାତ୍ରଙ୍କ ରୁଚି କମିବାରେ ଲାଗିଲା।
ସରକାରୀସ୍ତରରେ ତେଲୁଗୁ ଭାଷାର ପାଠ୍ୟ ପୁସ୍ତକ ଯୋଗାଣ ଦିଗରେ ଠୋସ୍ ପଦକ୍ଷେପ ନିଆଗଲା ନାହିିଁ । ଏଭଳି ଏକ ସମୟରେ ତେଲୁଗୁ ଭାଷା ସୁରକ୍ଷା ଏବଂ ପ୍ରସାର ଦିଗରେ ଉଦ୍ୟମ କରୁଛି ମହାମତ୍ା ହେଲ୍ପିଂ କ୍ଲବ । ଗତ ୫ ବର୍ଷ ହେଲା ଏହି ସଂଗଠନ ପକ୍ଷରୁ ତେଲୁଗୁ ଭାଷାର ପାଠ୍ୟ ପୁସ୍ତକ ମାଗଣାରେ ବଣ୍ଟାଯାଉଛି ।
ସୋମବାର ସହରର ତିନିଟି ପ୍ରମୁଖ ତେଲୁଗୁ ମାଧ୍ୟମ ବିଦ୍ୟାଳୟରେ ପାଠ୍ୟ ପୁସ୍ତକ ବଣ୍ଟନ କରାଯାଇଥିଲା। ମା’ ଯେମିତି ଆମର ଅତି ଆପଣାର, ସେମିତି ମାତୃଭାଷା ମଧ୍ୟ ଆମର ଆପଣାର। ମା’ଙ୍କୁ ଯେମିତି ଆଦର କରୁଛ, ସେମିତି ମାତୃଭାଷାକୁ ମଧ୍ୟ ଆଦର କର । ଅନ୍ୟ ଭାଷା ଶିଖିବା ଭଲ । କିନ୍ତୁ ନିଜ ମାତୃଭାଷାକୁ କେବେ ଭୂଲିବା କିମ୍ବା ଛାଡ଼ିବା ଉଚିତ ନୁହଁ ବୋଲି ତେଲୁଗୁ ଭାଷାରେ ଅଧ୍ୟୟନ କରୁଥିବା ଛାତ୍ରୀଛାତ୍ରଙ୍କୁ ସଂଗଠନ ପକ୍ଷରୁ ପରାମର୍ଶ ଦିଆଯାଇଥିଲା । ଏଥି ସହ ଦ୍ୱିତୀୟରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୩୭ ଛାତ୍ରୀଛାତ୍ରଙ୍କୁ ତେଲୁଗୁ ଭାଷାର ପାଠ୍ୟ ପୁସ୍ତକ ବଣ୍ଟନ କରାଯାଇଥିଲା।
କୋମଲଭାରୀ ସାହି ସ୍ଥିତ ପ୍ରାଥମିକ ବିଦ୍ୟାଳୟରେ ପାଠ୍ୟ ପୁସ୍ତକ ବଣ୍ଟନ କରାଯାଇଥିଲା।
୭ ଛାତ୍ରୀଛାତ୍ରଙ୍କୁ ପାଠ୍ୟ ପୁସ୍ତକ ପ୍ରଦାନ କରାଯାଇଥିଲା। ଶିକ୍ଷୟିତ୍ରୀ ପୁଷ୍ପା କାର୍ଯ୍ୟକ୍ରମକୁ ସଂଯୋଜନା କରିଥିଲେ।
ପରେ ରେଲୱେ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷୟିତ୍ରୀ ଗୀତାଞ୍ଜଳି ପାତ୍ରଙ୍କ ତତ୍ତ୍ୱାବଧାନରେ ୧୫ଜଣ ଛାତ୍ରୀଛାତ୍ରଙ୍କୁ ପାଠ୍ୟ ପୁସ୍ତକ ବଣ୍ଟା ଯାଇଥିଲା । ଶେଷରେ ସିଟି ଉଚ୍ଚ ପ୍ରାଥମିକ ବିଦ୍ୟାଳୟର ୧୫ଜଣ ଛାତ୍ରୀଛାତ୍ରଙ୍କୁ ବହି ଦିଆଯାଇଥିଲା। ପ୍ରଧାନ ଶିକ୍ଷକ କାଳୁ ଚରଣ ପ୍ରଧାନଙ୍କ ତତ୍ତ୍ୱାବଧାନରେ ଶିକ୍ଷୟିତ୍ରୀ ପ୍ରମିଳା କୁମାରୀ ସାହୁ ଉପସ୍ଥିତ ଥିଲେ । ମହାତ୍ମା ହେଲପିଂ କ୍ଲବର ଏମ୍. ରାଜଗୋପାଳମ୍, ଭୀଷ୍ମଚାର୍ଯ୍ୟ ଚୌଧୁରୀ, ଟି.ରାଜେଶ୍ୱରୀ ଏବଂ ଟି.ମୂର୍ତ୍ତି ଉପସ୍ଥିତ ଥିଲେ। ଏମ୍.ଭେଙ୍କେଟରାମଣା ଏବଂ ଏ. ସୁରେଶଙ୍କ ସଂଯୋଜନାରେ ସମସ୍ତ କାର୍ଯ୍ୟକ୍ରମ ଆୟୋଜିତ ହୋଇଥିଲା।
ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ କାଳୁ ଚରଣ ପ୍ରଧାନ କୁହନ୍ତି, ତେଲୁଗୁ ମାଧ୍ୟମ ପିଲାଙ୍କ ପାଠ୍ୟପୁସ୍ତକ ନେଇ ସମସ୍ୟା ଦେଖାଦେଉଛି। ଏମ୍ଆଇଏଲ୍(ତେଲୁଗୁ)ବହି ଆନ୍ଧ୍ରପ୍ରଦେଶ ସରକାର ଛପାଇବା ପରେ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଜରିଆରେ ପିଲାଙ୍କୁ ମାଗଣାରେ ବଣ୍ଟନ କରାଯାଉଛି।
ସର୍ବ ଶିକ୍ଷା ଅଭିଯାନ ଜରିଆରେ ଇଂଲିଶ ବହି ମିଳୁଛି । ହେଲେ ଅନ୍ୟ ବିଷୟର ବହି ମିଳୁନି । ମହାତ୍ମା ହେଲପିଂ ହ୍ୟାଣ୍ଡ ମାଗଣାରେ ବହି ପ୍ରଦାନ କରିବା ପରେ ପିଲାମାନେ ବର୍ତ୍ତମାନ ସହଜରେ ପଢ଼ିପାରିବେ। ମହାତ୍ମା ହେଲପିଂ କ୍ଲବର ଏମ୍.ଭେଙ୍କେଟରାମଣା କୁହନ୍ତି, ତେଲୁଗୁ ପିଲାମାନଙ୍କ ସମସ୍ୟା ଜାଣିବା ପରେ ଗତ ୫ ବର୍ଷ ହେଲା ପାଠ୍ୟ ପୁସ୍ତକ ପ୍ରଦାନ କରାଯାଉଛି । ସରକାର ନିଜସ୍ବ ଉଦ୍ୟମରେ ତେଲୁଗୁ ବହି କିଣି, ପିଲାମାନଙ୍କୁ ମାଗଣାରେ ବାଣ୍ଟିଲେ ଭଲ ହେବ ବୋଲି ସେ କହିଛନ୍ତି ।