ଢେଙ୍କାନାଳ ଅଫିସ, ୨୫।୪ – ସମ୍ପ୍ରତି ମିଛ, ତ୍ରୁଟିପୂର୍ଣ୍ଣ ଖବର ଭୟଙ୍କର ବିପଦ ଭାବେ ଉଭା ହୋଇଛି। ସୋସିଆଲ ମିଡିଆର ବହୁଳ ପ୍ରଚଳନ ଏପରି ମିଛ ଖବରର ବାହାକ ସାଜିଛି। ଏପରି ମିଥ୍ୟା ଖବର ରୋକିବାକୁ ଢେଙ୍କାନାଳସ୍ଥିତ ଭାରତୀୟ ଜନସଞ୍ଚାର ସଂସ୍ଥାନ (ଆଇଆଇଏମ୍ସି) ପକ୍ଷରୁ ମାର୍ଗଦର୍ଶିକା ପ୍ରସ୍ତୁତ କରାଯାଇଛି। ହିନ୍ଦୀ, ଓଡ଼ିଆ ଏବଂ ବଙ୍ଗଳା ଭାଷାରେ ଅନୁବାଦିତ ଏହି ମାର୍ଗଦର୍ଶିକା ଶୁକ୍ରବାର ଉନ୍ମୋଚନ କରାଯାଇଛି। ସଂସ୍ଥାନର ଆଞ୍ଚଳିକ ନିର୍ଦ୍ଦେଶକ ପ୍ରଫେସର ଡ. ମୃଣାଳ ଚାଟ୍ଟାର୍ଜୀ ଏହାକୁ ଉନ୍ମୋଚନ କରିଥିଲେ। ଏହି ଅବସରରେ ସେ କହିଲେ, ଜାଲ୍ ବା ମିଥ୍ୟା ଖବର ସାମାଜିକ ବ୍ୟବସ୍ଥା ପାଇଁ ଗୁରୁତର ସମସ୍ୟା। ଏଥିରେ ଅଙ୍କୁଶ ଲଗାଇବା ପାଇଁ ମାର୍ଗଦର୍ଶିକା ପ୍ରସ୍ତୁତ କରାଯାଇଛି। ସଂଖ୍ୟାଧିକ ଲୋକ ଏବଂ ସାମ୍ବାଦିକଙ୍କ ପାଖରେ ପହଞ୍ଚାଇବା ଲାଗି ଏହାକୁ ୩ଟି ଭାଷାରେ ଅନୁବାଦ କରାଯାଇଛି। ଏହାର ତେଲୁଗୁ ସଂସ୍କରଣ ଖୁବ୍ଶୀଘ୍ର ପ୍ରକାଶ ପାଇବ। ଆଇଆଇଏମ୍ସି ଢେଙ୍କାନାଳ ଓ ପ୍ରେସ୍ କ୍ଲବ କଲିକତା ପକ୍ଷରୁ ଏହା ପ୍ରସ୍ତୁତ ହୋଇଛି। ପ୍ରେସ୍ କ୍ଲବ କଲିକତା ସଭାପତି ସ୍ନେହାଶିଷ ସୁର ଆବଶ୍ୟକ ସହାୟତା କରିଛନ୍ତି। ବଙ୍ଗଳା ଅନୁବାଦ ସହକାରୀ ପ୍ରଫେସର ସମ୍ବିତ ପାଲ, ଓଡ଼ିଆ ଅନୁବାଦ ସହକାରୀ ପ୍ରଫେସର ଡ. ଜ୍ୟୋତି ପ୍ରକାଶ ମହାପାତ୍ର ଏବଂ ହିନ୍ଦୀ ଅନୁବାଦ ଛାତ୍ରୀ ପ୍ରାଚୀ ରାଠି କରିଛନ୍ତି। ଜିତେନ୍ଦ୍ର ପତି ଏହାର ଡିଜାଇନ କରିଥିବା ଆଞ୍ଚଳିକ ନିର୍ଦ୍ଦେଶକ ସୂଚନା ଦେଇଛନ୍ତି।