ନୟାଗଡ଼ ଅଫିସ/ଖଣ୍ଡପଡା,୧୦ା୨(ସ୍ବ.ପ୍ର.): ରବିବାର ଅପରାହ୍ନ ୪ଟାରେ ଖଣ୍ଡପଡା-ନୟାଗଡ଼ ପୂର୍ତ୍ତବିଭାଗ ରାସ୍ତାର କଇଁଥପଲ୍ଲୀ ଗ୍ରାମ ନିକଟରେ ମିନି ବସ୍ ଓଲଟି ଜଣଙ୍କର ମୃତ୍ୟୁ ଘଟିଛି । ସେ ହେଲେ ରାମଚନ୍ଦ୍ର ରଣା ଓରଫ ଝୁନା (୪୫), ଘର ଗଞ୍ଜାମ ଜିଲା ଛତ୍ରପୁର ଥାନା ସୁନ୍ଦରପୁର ଗଁାରେ। ମିନି ବସରେ ଯାତ୍ରା କରୁଥିବା ୧୦ ପରିବାରର ୩୫ ଜଣଙ୍କ ମଧ୍ୟରୁ ୨୦ ଆହତ ହୋଇଛନ୍ତି। ସେମାନଙ୍କ ମଧ୍ୟରେ ୧୦ଜଣ ଶିଶୁ ଅଛନ୍ତି। ଆହତମାନଙ୍କୁ ଉଦ୍ଧାର କରାଯାଇ ପ୍ରଥମେ ଖଣ୍ଡପଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ନୟାଗଡ଼ ଜିଲା ମୁଖ୍ୟ ଚିକତ୍ସାଳୟକୁ ସ୍ଥାନାନ୍ତର କରାଯାଇଛି। ସମସ୍ତେ ବର୍ତ୍ତମାନ ସୁସ୍ଥ ଥିବା ଜଣାପଡିଛି। ଗଁାରୁ ବସ୍ ଆସିବା ପରେ ଫେରିବେ ବୋଲି କହିଛନ୍ତି। ଅନ୍ୟପକ୍ଷେ ବସ୍ ତଳୁ ରାମଚନ୍ଦ୍ରଙ୍କ ମୃତଦେହ ଖଣ୍ଡପଡା ପୋଲିସ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ଖଣ୍ଡପଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଛି।
ପ୍ରାପ୍ତ ସୂଚନା ଅନୁସାରେ ଶନିବାର ରାତି ପ୍ରାୟ ୨ଟାରେ ଓଆର ୦୨କ୍ୟୁ-୦୫୦୨ନଂ. ବିଶିଷ୍ଟ ମିନିବସ୍ ଯୋଗେ ୧୦ ପରିବାରର ୩୫ ପର୍ଯ୍ୟଟକ ନୟାଗଡ଼ ଜିଲାର ପର୍ଯ୍ୟଟନସ୍ଥଳୀ ବୁଲିବାକୁ ବାହାରିଥିଲେ। ସେମାନେ ଓଡଗଁାର ରଘୁନାଥ ମନ୍ଦିର, ଶରଣକୁଳର ଲଡୁବାବା ଓ କଣ୍ଟିଲୋର ପ୍ରଭୁ ନୀଳମାଧବଙ୍କୁ ଦର୍ଶନ କରି ବୁଗୁଡା ବୁଦ୍ଧଖୋଲ ଦେଖିବାକୁ ଯାଉଥିଲେ। ସେଠାରୁ ଗଁାକୁ ଫେରିଥାନ୍ତେ। ଏପରିସ୍ଥଳେ ରବିବାର କଇଥପଲ୍ଲୀ ଗଡାଣିରେ ବସଟି କୌଣସି କାରଣରୁ ରାସ୍ତା ଉପରେ ଓଲଟି ପଡିଥିଲା। ବସ୍ ଚାଳକ ବୃନ୍ଦାବନ ସାହୁଙ୍କୁ ଖଣ୍ଡପଡ଼ା ପୋଲିସ ଥାନାରେ ଅଟକ ରଖି ପଚରାଉଚରା କରୁଛି ା
ଭାଇବ୍ରେଶନ ଘଟାଉଛି ଦୁର୍ଘଟଣା
କଇଥପଲ୍ଲୀ ଗଡାଣିରେ ଅଧିକାଂଶ ସମୟରେ ଦୁର୍ଘଟଣା ଘଟୁଛି। ଏଠାରେ ଗାଡି ଗଡିଲାବେଳେ ରାସ୍ତାରେ ଭାଇବ୍ରେଶନ ସୃଷ୍ଟି ହେଉଛି। ଚାଳକ ଏ ସମ୍ପର୍କରେ ନ ଜାଣି ଗାଡ଼ି ନେବାବେଳେ ଦୁର୍ଘଟଣା ଘଟିଥାଏ। ଆହତ ସୁନ୍ଦରପୁରର ଅଭି ନାହାକ(୪୭)ଙ୍କ ସୂଚନା ଅନୁସାରେ କଇଥପଲ୍ଲୀ ଗଡାଣି ନିକଟରେ ବସ୍ ଭିତରେ କ’ଣ ଶବ୍ଦ ହେଲା। ସଙ୍ଗେ ସଙ୍ଗେ ଦେଖିବା ବେଳକୁ ବସ୍ଟି ଓଲଟି ପଡିଲା। କ୍ଲିନରଙ୍କ ପାଖରେ ଠିଆ ହୋଇଥିବା ରାମଚନ୍ଦ୍ରଙ୍କ ଉପରେ ବସ୍ଟି ମାଡି ବସିଥିଲା। ପରେ ପୁଣି ଆଉଥରେ ଗାଡ଼ି ଓଲଟିଥିଲା। ଭଗବାନଙ୍କ କୃପାରୁ ଆମେ କେବଳ ଆହତ ହୋଇ ବର୍ତ୍ତି ଯାଇଛୁ । ବିଚରା ରାମଚନ୍ଦ୍ର ପ୍ରାଣ ହରାଇଲେ। ରାମଚନ୍ଦ୍ରଙ୍କ ସହ ପନତ୍ୀ ମାମି ଥିଲେ। ସ୍ବାମୀଙ୍କ ମୃତ୍ୟୁରେ ମାମି ଭାଙ୍ଗି ପଡିଥିବା ଅଭି କହିଛନ୍ତି।