ଭୁବନେଶ୍ୱର, ୬।୨ (ବ୍ୟୁରୋ):ରାଜ୍ୟରେ ମିଶନ ଶକ୍ତି ଅଧୀନରେ ଅନେକ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ସରକାରୀ ପ୍ରୋତ୍ସାହନରେ କ୍ଷୁଦ୍ର ଓ ମଧ୍ୟମ ଉଦ୍ୟୋଗୀ(ଏସ୍ଏମ୍ଇ)ରେ ପରିଣତ ହେଉଛନ୍ତି। ଏହାର ଉଦାହରଣ ପାଲଟିଛି ଭୁବନେଶ୍ୱର ମହାନଗର ନିଗମ ୩୭ ନମ୍ବର ୱାର୍ଡ ଅନ୍ତର୍ଗତ ନୟାପଲ୍ଲୀ ବେହେରା ସାହିର ସ୍ବୟଂ ଶ୍ରଦ୍ଧା ମହିଳା ମହାସଂଘ। ଏହି ଏସ୍ଏଚ୍ଜିର ୧୮ଜଣ ସଦସ୍ୟା ପ୍ରଥମେ ନିଜ ଉଦ୍ୟମରେ ଘରୋଇ ଭାବେ ପିଠା ଓ ଅନ୍ୟାନ୍ୟ ହାତ ତିଆରି ସାମଗ୍ରୀ ପ୍ରସ୍ତୁତ କରି ବିକ୍ରି କରୁଥିଲେ। ମିଲେଟ୍ର ଚାହିଦାକୁ ଦେଖି ସେମାନେ ୨ବର୍ଷ ହେବ ବିଭିନ୍ନ ଛୋଟ ଛୋଟ କାର୍ଯ୍ୟକ୍ରମ ଏବଂ ଉତ୍ସବରେ ମିଲେଟ୍ରୁ ପ୍ରସ୍ତୁତ ପିଠା, ଲଡ଼ୁ ଓ ଅନ୍ୟାନ୍ୟ ସାମଗ୍ରୀ ଯୋଗାଇ ଜୀବିକା ଅର୍ଜନ କରୁଥିଲେ। ତେବେ ହକି ବିଶ୍ୱକପ୍ ସେମାନଙ୍କୁ ସୁଯୋଗ ଦେଇଥିଲା। ହକି ପାଇଁ କଳିଙ୍ଗ ଷ୍ଟାଡିୟମ୍ ଭିତରେ ଓଡ଼ିଶା ମିଲେଟ୍ ମିଶନ ଏବଂ ମିଶନ ଶକ୍ତି ବିଭାଗ ପକ୍ଷରୁ ଖୋଲାଯାଇଥିବା ମିଲେଟ ଶକ୍ତି କାଫେରେ ବିକ୍ରୟ ଓ ପରିଚାଳନା ନିମନ୍ତେ ସେମାନେ କାର୍ଯ୍ୟାଦେଶ ପାଇଲେ। ଜାନୁୟାରୀ ୧୨ରେ ଏହି କାଫେକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିଥିଲେ। ମ୍ୟାଚ ସମୟରେ ସେମାନେ ୨୫ରୁ ୩୦ ହଜାର ଟଙ୍କା ବ୍ୟବସାୟ କରୁଥିବାବେଳେ ମ୍ୟାଚ୍ ନ ଥିବା ଦିନରେ ୧୦ରୁ ୧୫ ହଜାର ଟଙ୍କାର ବିକ୍ରିବଟା ହୋଇଥିଲା। ଏଥିସହ କମିଶନରେଟ୍ ପୋଲିସ ଓ ବିଏମ୍ସି କର୍ପୋରେଟରଙ୍କ କାର୍ଯ୍ୟକ୍ରମ ନିମନ୍ତେ ଜଳଖିଆ ପ୍ୟାକେଟ ପ୍ରଦାନ କରି ୫୦ହଜାରରୁ ଊର୍ଦ୍ଧ୍ୱ ଟଙ୍କାର ବ୍ୟବସାୟ କରିଥିଲେ। ମାତ୍ର ୧୫ଦିନରେ ୪ ଲକ୍ଷ ଟଙ୍କାର ବ୍ୟବସାୟ ହୋଇଥିଲା। ଆଗାମୀ ଦିନରେ ସେମାନେ ଅନ୍ଲାଇନ୍ରେ ବ୍ୟବସାୟକୁ ସଂପ୍ରସାରିତ କରିବାର ଲକ୍ଷ୍ୟ ରଖିଛନ୍ତି। ମିଶନ ଶକ୍ତି ଏସ୍ଏଚ୍ଜିଙ୍କ ନିମନ୍ତେ ବିନା ସୁଧରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଘୋଷଣା ପରେ ମହାସଂଘଗୁଡିକ ଏପରି ଆଗକୁ ବଢିବାକୁ ସୁଯୋଗ ପାଉଛନ୍ତି।