ତାଳଚେର,୨୬।୩(ନି.ପ୍ର.)- ଲକ୍ଡାଉନ ବେଳେ ଅତ୍ୟାବଶ୍ୟକ ସାମଗ୍ରୀର ଅଭାବ ରହିବ ନାହିଁ ବୋଲି ସରକାରଙ୍କ ପକ୍ଷରୁ କୁହାଯାଇଥିଲେ ହେଁ ଗୁରୁବାର ଅନୁଗୋଳ ଜିଲା ତାଳଚେର ଥର୍ମାଲ ସାପ୍ତାହିକ ହାଟରେ ଆଳୁ, ପିଆଜ ମିଳିନାହିଁ। ଫଳରେ ଏହି ହାଟ ଉପରେ ନିର୍ଭରଶୀଳ ବହୁ ପଞ୍ଚାୟତବାସୀ, ପରଜଙ୍ଗ ଓ ବଅଁରପାଳ ଅଞ୍ଚଳର ଅନେକ ଗଁା ଲୋକେ ନିରାଶରେ ଫେରି ଯାଇଥିବା ଅଭିଯୋଗ ହୋଇଛି। ପ୍ରତିଥର ଏହି ସାପ୍ତାହିକ ହାଟକୁ ୪/୫ ଟ୍ରକ୍ ଆଳୁ ଓ ୪ ଟ୍ରକ୍ ପିଆଜ ଆସିଥାଏ। କିନ୍ତୁ ସକାଳୁ କେତେଜଣ ପରିବା ବ୍ୟବସାୟୀ ଆସିଥିଲେ ବି ଆଳୁ କି ପିଆଜ ହାଟରେ ଉପଲବ୍ଧ ନ ଥିଲା। ଏହାର ସୁଯୋଗ ନେଇ କେତେକ ରାଶନ ଦୋକାନୀ ଆଳୁ, ପିଆଜର ମୂଲ୍ୟ ବଢ଼ାଇ ଦେଇଥିବାରୁ ଖାଉଟିଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏ ସମ୍ପର୍କରେ ଆର୍ଏମ୍ସି ସମ୍ପାଦକ ହରମୋହନ ପ୍ରଧାନ କହିଛନ୍ତି, ହଠାତ ଏଭଳି କାହିଁକି ହେଲା ତାହାର କାରଣ ଜଣାପଡୁ ନାହିଁ। ଜିଲା ପ୍ରଶାସନ ଓ ଯୋଗାଣ ବିଭାଗ ଏଥିପ୍ରତି ଦୃଷ୍ଟି ଦେବାକୁ ଦାବି ହେଉଛି। ତାଳଚେର ଉପଜିଲାପାଳ ପରେଶ ଚନ୍ଦ୍ର ନାୟକ କହିଛନ୍ତି, ଖୁବ୍ଶୀଘ୍ର ଏ ଦିଗରେ ପଦକ୍ଷେପ ନିଆଯିବ।