ଥିରୁଭାନନ୍ତପୁରମ୍,୭।୧୨: କେରଳର ଥିରୁଭାନନ୍ତପୁରମ୍ରେ ମାଟି ତଳୁ ମିଳିଛି ଗୁପ୍ତଧନର ସନ୍ଧାନ। ଶହେ ବର୍ଷ ପୁରୁଣା ମାଟି ପାତ୍ରରେ ୨,୫୯୫ ତମ୍ବା ମୁଦ୍ରା ବନ୍ଦ ଅବସ୍ଥାରେ ମିଳିଛି। ଏସବୁର ଓଜନ ୨୦ କିଲୋ ୪ଶହ ଗ୍ରାମ୍। ଏଥିରେ କଳଙ୍କି ଲାଗି ଯାଇଥିବାରୁ ଏସବୁକୁ ସଫା ପାଇଁ ଲ୍ୟାବ୍କୁ ପଠାଯାଇଛି। ସ୍ଥାନୀୟ ନିଲିମିନୁର୍ ଅଞ୍ଚଳରେ ବାସ କରୁଥିବା ବି. ରତ୍ନାକର ପିଲାଇ ଏକ ଲଟେରୀ କିଣିଥିଲେ। ଏଥିରେ ସେ ୬ କୋଟି ଟଙ୍କାର ପୁରସ୍କାର ଜିଣି ଥିଲେ। ଏହି ଟଙ୍କାରେ ସେ ଏକ ଜମି କିଣି କିଛି ଦିନ ପରେ ଏହାର ଖନନ ବେଳେ ଏହି ଗୁପ୍ତଧନ ମିଳିଥିଲା। ଏସବୁ ମୁଦ୍ରା ତ୍ରାଭାଙ୍କୋରର ଦୁଇ ରାଜାଙ୍କ ଶାସନ ସମୟରେ ୧୮୮୫ରୁ ୧୯୪୯ ମଧ୍ୟରେ ପ୍ରଚଳିତ ହେଉଥିବା କୁହାଯାଉଛି। ୧୮୮୫ରୁ ୧୯୨୪ ପର୍ଯ୍ୟନ୍ତ ଏଠାରେ ରାଜା ମୁଲମ୍ ଥିରୁନଲ୍ ରାମ ବର୍ମା ଶାସନ କରୁଥିଲେ। ସେହିପରି ୧୯୨୪ରୁ ୧୯୪୯ ପର୍ଯ୍ୟନ୍ତ ଏଠାରେ ଶେଷ ରାଜା ଭାବେ ଚିଥୁରା ଥିରୁନଲ୍ ବାଲା ରାମ ବର୍ମା ଶାସନ ଭାର ସମ୍ଭାଳିଥିଲେ।
