ବାଲେଶ୍ୱର ଅଫିସ,୨୬।୭-ବାଲେଶ୍ୱର ସହର ରାସ୍ତା ତଥା ନୟନଯୋରୀକୁ ଜବରଦଖଲ କରି ବହୁ ବ୍ୟକ୍ତିବିଶେଷ, ବ୍ୟବସାୟୀମାନେ ସଙ୍କୁଚିତ କରିବା ଦ୍ୱାରା ସର୍ବସାଧାରଣ ଯାତାୟାତରେ ସମସ୍ୟା ଭୋଗୁଛନ୍ତି। ଏହାକୁ ଅନୁଭବ କରି ଗତ ୨୨ତାରିଖରୁ ନୂତନ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ନିର୍ଦ୍ଦେଶରେ ଆରମ୍ଭ କରାଯାଇଥିବା ମିଶନ ‘ବିୟୁଟି ସିଟି’କୁ ବିଭିନ୍ନ ସାମାଜିକ ସଂସ୍ଥା ପକ୍ଷରୁ ସ୍ବାଗତ କରାଯାଇଛି।
ସାମାଜିକ କର୍ମୀ ଗିରିଜା ଶଙ୍କର ଦାସଙ୍କ ଆବାହନରେ ସ୍ଥାନୀୟ ବ୍ରିଟ କଲ୍ୟାଣମଣ୍ଡପ ପରିସରରେ ସହର ପ୍ରାୟ ୧୫ଟି ସମାଜସେବୀ ଅନୁଷ୍ଠାନ ଏବଂ ୫୦ରୁ ଉର୍ଦ୍ଧ୍ୱ ସହରବାସୀମାନେ ଉପସ୍ଥିତ ହୋଇ ଜିଲାପାଳଙ୍କୁ ସହରର ରାସ୍ତାଘାଟ ପ୍ରଶସ୍ତିକରଣ ସହିତ ବାଲେଶ୍ୱର ସହରକୁ ପରିଷ୍କାର ପରିଚ୍ଛନ୍ନ ରଖାଯିବା ସଂକ୍ରାନ୍ତୀୟ ଏକ ଦାବିପତ୍ର ପ୍ରଦାନ କରିଥିଲେ। ସହରର ବୁଦ୍ଧିଜୀବୀ, ସମାଜସେବୀ, ବିଭିନ୍ନ ଅନୁଷ୍ଠାନର କର୍ମକର୍ତ୍ତାମାନଙ୍କ ଉପସ୍ଥିତିରେ ଦୀର୍ଘସମୟ ଆଲୋଚନା କରାଯାଇଥିଲା। ଏହି ପରିପ୍ରେକ୍ଷୀରେ ସହରର ସମସ୍ତ ଜବରଦଖଲକୁ ତୁରନ୍ତ ଉଚ୍ଛେଦ କରିବାର ଦାବି କରାଯାଇଥିଲା। ସର୍ବପ୍ରଥମ ଉଡ଼ନ୍ତା ପୋଲର ମରାମତି ସହ ତଳେ ଥିବା ଦୋକାନ ଘରଗୁଡିକୁ ଉଚ୍ଛେଦ କରିବା ଦାବି ହୋଇଥିଲା।
ସରକାରୀ ଅମିନଙ୍କ ଦ୍ୱାରା ହାଲ୍ ନକ୍ସା ଅନୁସାରେ ମାପ କରାଯାଇ ଦଖଲକାରୀଙ୍କୁ ନ୍ୟାୟୋଚିତ୍ତ ସ୍ଥାନ ଦିଆଯିବା ସଙ୍ଗେ ସଙ୍ଗେ ରାସ୍ତାଘାଟର ପ୍ରଶସ୍ତିକରଣ ପାଇଁ ଯଥାଶୀଘ୍ର ପଦକ୍ଷେପ ନିଆଯିବ ବୋଲି ଜିଲାପାଳ ଚକ୍ରବର୍ତ୍ତୀ ପ୍ରତିଶ୍ରୁତି ଦେଇଥିଲେ।