ଗଞ୍ଜାମ,୨୫ା୪(ଡି.ଏନ୍.ଏ.): ଗଞ୍ଜାମ ବିଜ୍ଞାପିତ ଅଞ୍ଚଳ ପରିଷଦ ୪ ନଂ ଓ୍ବାର୍ଡର ରାଉଳସାହି ନିକଟସ୍ଥ ୟୁଏଇ ହଲ୍ ସମ୍ମୁଖରେ ଥିବା ଟ୍ରାନ୍ସଫର୍ମରଟି ଦୀର୍ଘବର୍ଷ ଧରି ମୁକୁଳାପଡ଼ିଛି। ଏହାର ଚତୁଃପାର୍ଶ୍ୱରେ ସୁରକ୍ଷାବାଡ଼ା ନ ଥିବାରୁ ଲୋକେ ଭୟଭୀତ ଅବସ୍ଥାରେ ଯାତାୟାତ କରୁଛନ୍ତି। ଏଥିସହିତ ଏହି ଟ୍ରାନ୍ସଫର୍ମର ନିକଟରେ ଏକ ବିଦ୍ୟାଳୟ ରହିଛି। ବର୍ତ୍ତମାନ ବିଦ୍ୟାଳୟ ବନ୍ଦ ଥିବାରୁ ପିଲାମାନେ ଆସୁନାହାନ୍ତି। ମାତ୍ର ବିଦ୍ୟାଳୟ ଖୋଲିଲେ କୁନିକୁନି ପିଲାମାନେ ଏହି ଟ୍ରାନ୍ସଫର୍ମର ନିକଟ ଦେଇ କିପରି ଯାତାୟାତ କରିବେ ସେନେଇ ଅଭିଭାବକମାନେ ଚିନ୍ତାରେ ପଡ଼ିଛନ୍ତି। କେତେବେଳେ ଅଘଟଣ ଘଟିବ କହି ହେବନାହିଁ। ଗଞ୍ଜାମ ସେକ୍ସନ ବିଦ୍ୟୁତ ବିଭାଗୀୟ କନିଷ୍ଠଯନ୍ତ୍ରୀ ଜିତେନ୍ଦ୍ର କୁମାର ରାଏଙ୍କୁ ପଚାରିବାରୁ ସେ କହିଛନ୍ତି, ପୂର୍ବରୁ ସେଠାରେ ଏକ ୧୦୦ କେଭି ଟ୍ରାନ୍ସଫର୍ମର ଥିଲା। ନିଅଣ୍ଟ ପଡ଼ିବାରୁ ୩୧୫ କେଭି ଟ୍ରାନ୍ସଫର୍ମର ଆଇପିଡିଏସ୍ ପକ୍ଷରୁ ବସାଯାଇଛି। କିନ୍ତୁ ସୁରକ୍ଷାବାଡ଼ା ନିର୍ମାଣ କରିବା ଆଇପିଡିଏସ୍ର ନିୟମ ନାହିଁ। ତେଣୁ ତାହା ସାଉଥ୍କୋ କରିବ। ବର୍ଷେ ହେବ ନିର୍ମାଣ କାର୍ଯ୍ୟ ସରିଥିବାବେଳେ ୬ ମାସ ହେବ ଚାର୍ଜ କରାଯାଇଛି। ଏନେଇ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି। ଖୁବ୍ଶୀଘ୍ର ସୁରକ୍ଷାବାଡ଼ା ନିର୍ମାଣ କରାଯିବ ବୋଲି ସେ କହିଛନ୍ତି। ପ୍ରକାଶ ଯେ, ଏହି ଟ୍ରାନ୍ସଫର୍ମରରୁ ଦୁର୍ଗାଦେବୀ ସାହି, ଆଖଡ଼ାବନ୍ଧ ସାହି ଏବଂ ରାଉଳ ସାହିକୁ ବିଦ୍ୟୁତ ଯୋଗାଣ ହୋଇଛି।