465089615
ଏବେକା ସମୟରେ ଶିଶୁମାନେ ଖୋଲା ପରିବେଶରେ ଖେଳିବା ଏବଂ ବୁଲିବା ବଦଳରେ ଘର ମଧ୍ୟରେ ମୋବାଇଲ୍ ଏବଂ କମ୍ପ୍ୟୁଟର୍ରେ ଖେଳିବା ଦେଖିବାକୁ ମିଳୁଛି। ତେବେ ମୁକ୍ତ ବାୟୁ ଶିଶୁମାନଙ୍କୁ ବିଭିନ୍ନ ପ୍ରକାର ନକାରାତ୍ମକ ଭାବନାଠାରୁ ଦୂରରେ ରଖିବାରେ ସାହାଯ୍ୟ କରିଥାଏ। ଏହା ଏକ ଗବେଷଣାରୁ ସ୍ପଷ୍ଟ ହୋଇଥିବା ଜଣାପଡ଼ିଛି। ପିଲାଙ୍କ ମନରେ ଅନେକ ସମୟରେ ନକାରାତ୍ମକ ଭାବନା ଜାଗ୍ରତ ହୋଇଥାଏ। ଯଦ୍ଦ୍ବାରା ସେମାନେ ମାନସିକ ଚାପର ଶିକାର ହେବା ସହ ସ୍ବାସ୍ଥ୍ୟ ଖରାପ ହେବା ଆଶଙ୍କା ମଧ୍ୟ ରହିଛି। ଏପରି ସ୍ଥିତିରେ ସେମାନଙ୍କ ମନୋବଳ ମଧ୍ୟ ଦୁର୍ବଳ ହୋଇଥାଏ। ସାଉଥ୍ ଚିଲିରେ ୨୭୧ ମାତାପିତା ଏବଂ ଶିକ୍ଷୟିତ୍ରୀ ଶିକ୍ଷକଙ୍କୁ ନେଇ ଗବେଷଣା କରାଯାଇଥିବାବେଳେ ଏଥିମଧ୍ୟରୁ ୧୦୬ ଜଣ ସ୍ଥାନୀୟ ଆଦିମ ମାପୁଚେ ଗୋଷ୍ଠୀର ଥିଲେ। ଅଧ୍ୟୟନ ପାଇଁ ପିଲା ଏବଂ ସେମାନଙ୍କ ଭାବନାକୁ ନେଇ ପ୍ରଶ୍ନପତ୍ର ପ୍ରସ୍ତୁତ ହୋଇଥିବାବେଳେ ସେମାନେ ଏହାର ଉତ୍ତର ଦେଇଥିଲେ। ଆମେରିକାର ନର୍ଥ କାରୋଲିନା ଷ୍ଟେଟ୍ ୟୁନିଭର୍ସିଟିର ପ୍ରଫେସର୍ ଏମି ହୋଲ୍ବର୍ଷ୍ଟଙ୍କ କହିବା ହେଲା, ପ୍ରକୃତିର ଖୋଲା ପରିବେଶ ତଥା ମୁକ୍ତ ବାୟୁ ମଧ୍ୟରେ ରହିବା ଦ୍ୱାରା ଶିଶୁମାନେ ଶାନ୍ତ ରହୁଥିବା ମାପୁଚେ ସମ୍ପ୍ରଦାୟର ଅଭିଭାବକମାନଙ୍କ ବିଶ୍ୱାସ। ଏହାଦ୍ୱାରା ପିଲାମାନେ ଶାନ୍ତ ରହିବା ସହ ଚାପ ଓ ନକାରାତ୍ମକ ଭାବନାକୁ ନିୟନ୍ତ୍ରଣ କରିବାରେ ସଫଳ ହୋଇଥାନ୍ତି ବୋଲି ସେମାନେ କହିଛନ୍ତି। ତେଣୁ ଶିଶୁଙ୍କ ବିକାଶ ଓ ସଫଳତା ପାଇଁ ଅଭିଭାବକମାନେ ଏହାକୁ ଅପଣାଇବା ଉଚିତ୍ ବୋଲି ପ୍ରଫେସର୍ ହୋଲ୍ବର୍ଷ୍ଟ କହିଛନ୍ତି।