ଢେଙ୍କାନାଳ ଅଫିସ, ୨୧।୮-ଢେଙ୍କାନାଳର ଶିଶୁ ପ୍ରତିଭା ମୁକ୍ତିକାନ୍ତ ଦାଶଙ୍କୁ ରାଜ୍ୟସ୍ତରୀୟ ରାଜୀବ ଗାନ୍ଧୀ ପ୍ରତିଭା ସମ୍ମାନ-୨୦୧୯ରେ ସମ୍ମାନିତ କରାଯାଇଛି। ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ୭୫ତମ ଜୟନ୍ତୀ ପାଳନ ଅବସରରେ ଭୁବନେଶ୍ୱର ଜୟଦେବ ଭବନରେ ଆୟୋଜିତ ସମାରୋହରେ ତାଙ୍କୁ ଏହି ପୁରସ୍କାର ପ୍ରଦାନ କରାଯାଇଛି। ‘ରାଜୀବ ଗାନ୍ଧୀ ଷ୍ଟୁଡେଣ୍ଟ ଫୋରମ୍ ଓ ଷ୍ଟଡି ସର୍କଲ ଓଡ଼ିଶା’ ଦ୍ୱାରା ମୁକ୍ତିକାନ୍ତ ଏଥି ଲାଗି ମନୋନୀତ ହୋଇଥିଲେ। କୁଳପତି ପ୍ରଫେସର ହରେକୃଷ୍ଣ ଶତପଥୀ, ସ୍ବାଧୀନତା ସଂଗ୍ରାମୀ ଭବାନୀ ପଟ୍ଟନାୟକ, କଣ୍ଟାବାଞ୍ଝି ବିଧାୟକ ସନ୍ତୋଷ ସିଂ ସାଲୁଜା, ଏଆଇସିସି ସମ୍ପାଦକ ରୁଦ୍ର ରାଜୁ ପ୍ରମୁଖ ଅତିଥିଭାବେ ଉପସ୍ଥିତ ରହି ଏହି ପୁରସ୍କାର ପ୍ରଦାନ କରିଥିଲେ।
ଢେଙ୍କାନାଳ ଦେଉଳସାହି ନିବାସୀ ଡ. ଚିତ୍ତରଞ୍ଜନ ଦାଶ ଏବଂ ଅଧ୍ୟାପିକା ଦୀପ୍ତିବାଳା ମିଶ୍ରଙ୍କ ଏକମାତ୍ର ସନ୍ତାନ ହେଉଛନ୍ତି ମୁକ୍ତିକାନ୍ତ। ପିଲାଟି ଦିନରୁ ନାଟକ ପ୍ରତି ରୁଚି ତାଙ୍କୁ ଜିଲାର ଜଣେ ଶିଶୁ କଳାକାର ଭାବେ ପରିଚିତ କରାଇଛି। ମାତ୍ର ୭ବର୍ଷ ବୟସରେ ସେ ଅଭିନୟ ଜଗତରେ ପାଦ ଥାପିଥିଲେ। ନାଟ୍ୟାନୁଷ୍ଠାନ ‘ଚାର୍ଲି ଚାପ୍ଲିନ କଲଚରାଲ କ୍ଲବ’ ପକ୍ଷରୁ ପରିବେଷିତ ନାଟକ ଅ ଆ ଇ..ରେ ସେ ପ୍ରଥମେ ନିଜର ଅଭିନୟର ଜାଦୁ ଦେଖାଇଥିଲେ। ଏହାପରେ ସେ ଆଉ ପଛକୁ ଚାହିଁନାହାନ୍ତି। ‘ମାୟା’, ‘ପୁନଶ୍ଚ ସତ୍ୟାଗ୍ରହ’, ‘ମୁକ୍ତିସଳିତା’, ‘ବାଘ ନେଇଗଲା ଦଉଡ଼ି ଆସ’ ନାଟକରେ ଅଭିନୟ ତାଙ୍କୁ ବେଶ୍ ଲୋକପ୍ରିୟତା ଦେଇଛି। କେବଳ ଏତିକି ନୁହେଁ, ରୁପେଲି ପରଦାରେ ମଧ୍ୟ ସେ ନିଜର ଅଭିନୟର ଛାପ ଛାଡ଼ିଛନ୍ତି। ଦୂରଦର୍ଶନର ବିଭିନ୍ନ ଧାରାବାହିକ ସମେତ ସାର୍ଥକ ଚ୍ୟାନେଲର ମେଗା ଧାରାବାହିକ ‘ବଧୂ’ରେ ରିମି ଚରିତ୍ରରେ ଅଭିନୟ କରି ସେ ବେଶ୍ ପ୍ରଶଂସିତ ହୋଇଛନ୍ତି। ଏହାକୁ ବାଦ୍ଦେଲେ ସେ ବିଭିନ୍ନ ରିଆଲିଟି ସୋ’ରେ ଲିଟିଲ ଆଙ୍କର ଭାବେ ମଧ୍ୟ ନିଜର ପ୍ରତିଭାର ପରିଚୟ ଦେଇଛନ୍ତି। ମୁକ୍ତିକାନ୍ତ ଏବେ ଢେଙ୍କାନାଳସ୍ଥିତ ଦିଲ୍ଲୀ ପବ୍ଲିକ ସ୍କୁଲର ଏକାଦଶ ଶ୍ରେଣୀରେ ପଢୁଛନ୍ତି।
