ଆନନ୍ଦପୁର/ଘସିପୁରା, ୧।୨ (ସ୍ବ.ପ୍ର./ଡି.ଏନ.ଏ.)- ଆପଣ ମାନେ ଖୁସି ତ-ସଦ୍ୟ ସମାପ୍ତ ନିର୍ବାଚନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଭିନ୍ନ ନିର୍ବାଚନୀ ସଭାରେ ଜନ ସାଧାରଣ ଉଦ୍ଦେଶ୍ୟରେ ଦେଇଥିବା ନାରା ”ଆପଣ ମାନେ ଖୁସି ତ“ ଏଠାରେ ମଧ୍ୟ ଶୁଣିବାକୁ ମିଳିଥିଲା। କିନ୍ତୁ ଏହି ନାରା ମୁଖ୍ୟମନ୍ତ୍ରୀ ନୁହଁ ବରଂ ଜନସାଧାରଣ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦେଇଥିଲେ। ବ୍ୟାରେଜ ପ୍ରକଳ୍ପ ଉଦଘାଟନୀ ସ୍ଥଳରେ ଉପସ୍ଥିତ ଶତାଧିକ ଲୋକେ ମୁଖ୍ୟମନ୍ତ୍ରୀଙ୍କ ବ୍ୟାରେଜ ପରିଦର୍ଶନ ସମୟରେ ଉତ୍ସାହିତ ହୋଇ କିଛି ଏଭଳି ନାରା ଦେଇଥିଲେ।
ନିରଞ୍ଜନ ବଦ୍ରି ଗପସପ- ବିଏନ ହାଇସ୍କୁଲ ପ୍ଲାଟିନମ ଜୁବୁଲି ଅବସରରେ ଗୋଟିଏ ମଞ୍ଚରେ ଏକାଠି ହୋଇଥିଲେ ଜିଲାର ଦୁଇ ପ୍ରମୁଖ ରାଜନୈତିକ ପ୍ରତିଦ୍ୱନ୍ଦ୍ୱୀ ପିସିସି ସଭାପତି ନିରଞ୍ଜନ ପଟ୍ଟନାୟକ ଓ ଘସିପୁରା ବିଧାୟକ ବଦ୍ରି ନାରାୟଣ ପାତ୍ର। ସଭାସ୍ଥଳରେ ଏହି ଦୁଇ ଜଣ ନେତା ପାଖାପାଖି ବସି ଢେର କିଛି ସମୟ ଧରି ପରସ୍ପର କାନରେ ଫୁସୁରୁଫାସର ହୋଇଥିଲେ। ମଞ୍ଚରେ ଏହି ରୋଚକ ଦୃଶ୍ୟକୁ ଦେଖି ଉପସ୍ଥିତ ଥିବା ଜନସାଧାରଣ ଚାପା ଗୁଞ୍ଜରଣ କରୁଥିବା ବେଳେ ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି। ଖାଲି ସେତିକି ନୁହଁ ଏହି ସଭାରେ ବିଧାୟକ ପାତ୍ର ନିଜ ବକ୍ତବ୍ୟରେ କେତେକ ପ୍ରସଙ୍ଗରେ ନିରଞ୍ଜନଙ୍କୁ ସମର୍ଥନ ଜଣାଇବା ସହ ଧନ୍ୟବାଦ ମଧ୍ୟ ଦେଇଥିଲେ।
ନେତାଙ୍କ ଦୌଡ଼ ପ୍ରତିଯୋଗିତା- ମୁଖ୍ୟମନ୍ତ୍ରୀଙ୍କ ଏହି ବ୍ୟସ୍ତ ବହୁଳ ଗସ୍ତ ଅବସରରେ ତିନୋଟି ପୃଥକ ପୃଥକ ସ୍ଥାନରେ କାର୍ଯ୍ୟକ୍ରମ ରହିଥିଲା। ବ୍ୟାରେଜ ପ୍ରକଳ୍ପ ସ୍ଥଳରୁ ବିଏନ ହାଇସ୍କୁଲ ପୁଣି ସେଠାରୁ ଆନନ୍ଦପୁର ଷ୍ଟାଡିୟମ ପଡ଼ିଆକୁ ଯିବା ପାଇଁ ସମସ୍ତ ମନ୍ତ୍ରୀ, ଏମ୍ପି ଓ ବିଧାୟକ ମାନେ ଯେଉଁଭଳି ନିଜ ନିଜ ଗାଡ଼ି ଧରିବାକୁ ଦୌଡ଼ି ଯାଉଥିଲେ ଏହା ଉପସ୍ଥିତ ଲୋକଙ୍କୁ ଦୌଡ଼ ପ୍ରତିଯୋଗିତାର ଭ୍ରମ ଲାଗିଥିଲା। ତେବେ ଏହି ଦୌଡ଼ରେ ଏମ୍ପି ଚନ୍ଦ୍ରାଣୀ ମୁର୍ମୁ ସମସ୍ତଙ୍କୁ ପଛରେ ପକାଇଦେଇଥିଲେ।
ବୋହିନେଲେ ବିସ୍କୁଟ- ଷ୍ଟାଡିୟମ ପଡ଼ିଆଠାରେ ଆୟୋଜିତ ମୁଖ୍ୟମନ୍ତ୍ରୀଙ୍କ ସଭାରେ ଯୋଗଦେଇଥିବା ହଜାର ହଜାର ଲୋକଙ୍କ ପାଇଁ ଆସିଥିବା ବିସ୍କୁଟ କାର୍ଟୁନ ଗୁଡ଼ିକୁ ବିଜୁ ଯୁବ ବାହିନୀ ପୋଷାକରେ ଥିବା ସ୍ବେଚ୍ଛାସେବୀ ମାନେ ବୋହି ନେବା ଘଟଣା ଚର୍ଚ୍ଚାର ବିଷୟ ହୋଇଛି। ଚାରିଜଣ ଯୁବ ବାହିନୀ ସ୍ବେଚ୍ଛାସେବୀ ଚାରି କାର୍ଟୁନ ବିସ୍କୁଟ ଷ୍ଟାଡିୟମରୁ ନେଇ ବାହାରେ ଥିବା ଏକ ଦୋକାନରେ ରଖିବା ପରେ ବାଇକରେ ବୋହି ନେଇଯିବା ଦେଖିବାକୁ ମିଳିଥିଲା।