ବିଜେପୁର, ୧୬।୧୦(ଡି.ଏନ୍.ଏ.): ବରଗଡ଼ ଜିଲା ବିଜେପୁର ଉପନିର୍ବାଚନ ପ୍ରଚାର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁକ୍ରବାର ବିଜେପୁର ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହା ପୂର୍ବରୁ ବରଗଡ଼ ଚିନିକଳର ଅସନ୍ତୁଷ୍ଟ କର୍ମଚାରୀମାନେ ସ୍ଥାନୀୟ ବିଜେପୁର-ବରଗଡ଼ ରାସ୍ତାର ପ୍ରେମାବନ୍ଧ ସମ୍ମୁଖରେ ବୁଧବାର ଧାରଣା ଦେଇଛନ୍ତି।
ପ୍ରକାଶ ଯେ, ବରଗଡ଼ ତୋରାସ୍ଥିତ ଚିନିକଳର କର୍ମଚାରୀମାନେ ଦୀର୍ଘ ୨୫ମାସ ହେଲା ଦରମା ପାଇନାହାନ୍ତି। ତେଣୁ ସେମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଚଳିତ ବର୍ଷ ଉକ୍ତ ଚିନିକଳକୁ କାର୍ଯ୍ୟକ୍ଷମ କରିବାକୁ ଗତ ଫେବୃୟାରୀ ମାସରେ ମୁଖ୍ୟମନ୍ତ୍ରୀ ୧୧ କୋଟି ଟଙ୍କା ଘୋଷଣା କରିଥିଲେ ସୁଦ୍ଧା ଏଯାଏ ତାହା ମିଳିପାରି ନାହିଁ। ଏହାର ସମାଧାନ ପାଇଁ ଗତ ସୋମବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କର୍ମଚାରୀମାନେ ଧାରଣା ଦେଇଥିଲେ। ମାତ୍ର କୌଣସି ସୁଫଳ ମିଳିପାରି ନ ଥିଲା। ତେଣୁ ପୂର୍ବ ନିର୍ଦ୍ଧାରିତ ଘୋଷଣା ଅନୁସାରେ କର୍ମଚାରୀଗଣ ଉପସଭାପତି ବ୍ରିଜବଲ ରାୟଙ୍କ ନେତୃତ୍ୱରେ ସାଧାରଣ ସମ୍ପାଦକ ସୁବ୍ରତ ସାହୁ, ଯୁଗ୍ମ ସମ୍ପାଦକ ପ୍ରସନ୍ନ କୁମାର ମହାରଣା, ଉଦ୍ଧବ ସାହୁ, ପୁଷ୍ପଜିତ ପ୍ରଧାନ, ମହମ୍ମଦ ସିକନ୍ଦର, ଅରୁଣ କୁମାର ସାହୁ, ନରସିଂହ ସାହୁ, ଚିତ୍ତରଞ୍ଜନ ମହାପାତ୍ର, ରାମ ନାରାୟଣ ମିଶ୍ର ପ୍ରମୁଖ କର୍ମଚାରୀ ଧାରଣାରେ ସାମିଲ ହୋଇଛନ୍ତି। ପିସିସି ସଭାପତି ନିରଞ୍ଜନ ପଟ୍ଟନାୟକ ଧାରଣାସ୍ଥଳରେ ପହଞ୍ଚି କର୍ମଚାରୀଙ୍କୁ ସମର୍ଥନ କରିଥିବା ଜଣାପଡ଼ିଛି।