ଭବାନୀପାଟଣା, ୩।୬(ଡି.ଏନ୍.ଏ.): ବିମାନ ଉଡ଼ାଉଥିବା ପାଇଲଟରୁ ରାଜନେତା ବନିଥିବା କ୍ୟାପଟେନ୍ ଦିବ୍ୟଶଙ୍କର ମିଶ୍ରଙ୍କୁ ଏଥର ମନ୍ତ୍ରିମଣ୍ଡଳରେ ସ୍ଥାନ ଦେଇଛନ୍ତି ମୁଖ୍ୟମନ୍ତ୍ରୀ। ମିଶ୍ରଙ୍କୁ ରାଷ୍ଟ୍ରମନ୍ତ୍ରୀ ପଦ ମିଳିଛି। କ୍ୟାପଟେନଙ୍କୁ ଶକ୍ତି ଭଳି ଚାଲେଞ୍ଜିଂ ବିଭାଗ ସହ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ଓ ଶିଳ୍ପ ବିଭାଗର ସ୍ବାଧୀନ ଦାୟିତ୍ୱ ମଧ୍ୟ ମିଳିଛି । ମୁଖ୍ୟମନ୍ତ୍ରୀ ତାଙ୍କ ଦକ୍ଷତା ଉପରେ ଆସ୍ଥା ଓ ବିଶ୍ୱାସ ପ୍ରକଟକରି ଏଭଳି ଚାଲେଞ୍ଜିଂ ଦାୟିତ୍ୱ ଦେଇଥିବାରୁ ନିଜକୁ ଧନ୍ୟ ମନେକରିବା ସହ ଏହାକୁ ସଫଳତାର ସହ ସାମ୍ନା କରିବି ବୋଲି କହିଛନ୍ତି ମନ୍ତ୍ରୀ ମିଶ୍ର । ମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରେ ମିଶ୍ର ଭବାନୀପାଟଣା ଗସ୍ତ ସମୟରେ କହିଲେ, ନୂଆ କରି ମନ୍ତ୍ରୀ ହୋଇଥିବାରୁ ତାଙ୍କ ପାଇଁ ଅନେକ ଚାଲେଞ୍ଜ ରହିଛି । ସବୁଠୁ ବଡ ଚାଲେଞ୍ଜ ଶକ୍ତି ବିଭାଗ । ନିକଟରେ ‘ଫନୀ’ ବାତ୍ୟାରେ ପୁରୀ ଜିଲା ସମେତ ଉପକୂଳ ଅଞ୍ଚଳରେ ବିଜୁଳି ବିଭାଗର ବ୍ୟାପକ କ୍ଷୟକ୍ଷତି ହୋଇଛି । ଭିତ୍ତିଭୂମି ପୁନରୁଦ୍ଧାର ସହ ଲୋକଙ୍କୁ ଉତ୍ତମ ସେବା ଯୋଗାଇବା ପ୍ରଥମ କାମ ହେବ । ଆଗାମୀ ଦିନରେ ବାତ୍ୟା ପ୍ରତିରୋଧ କରିପାରୁଥିବା ଭୂତଳ କେବୁଲ ଓ ଅନ୍ୟାନ୍ୟ ବ୍ୟବସ୍ଥା ଉପରେ ବିଭାଗ ଗୁରୁତ୍ୱ ଦେବ। ମାତ୍ର ଏହା ଏତେ ସହଜ । ବ୍ୟାପକ ପାଣ୍ଠି ଦରକାର। ତେଣୁ ପର୍ଯ୍ୟାୟ କ୍ରମେ ନୂଆ ପଦକ୍ଷେପ ନିଆଯିବ। ସେହିପରି ଏମ୍ଏସ୍ଏମ୍ଇ ମାଧ୍ୟମରେ ଯୁବପିଢ଼ିଙ୍କ ପାଇଁ କିଭଳି ଅଧିକରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହୋଇପାରିବ ସେ ଦିଗରେ ଯୋଜନା କରାଯିବ ବୋଲି ମନ୍ତ୍ରୀ କହିଛନ୍ତି। ଶିଳ୍ପ କ୍ଷେତ୍ରରେ ମଧ୍ୟ ଅନେକ କାମ କରିବାକୁ ଯୋଜନା ରହିଛି। ଗୃହ ବିଭାଗ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱକୁ ସୁଚାରୁ ରୂପେ ପାଳନ କରିବାକୁ ହେବ। ମୁଖ୍ୟମନ୍ତ୍ରୀ ତାଙ୍କ ପ୍ରତି ଆସ୍ଥା ପ୍ରକଟ କରି ଗୁରୁ ଦାୟିତ୍ୱ ଦେଇଛନ୍ତି। ତେବେ ସବୁ ଚାଲେଞ୍ଜକୁ ସଫଳତାର ସହ ସାମ୍ନା କରିବାକୁ ପ୍ରସ୍ତୁତ ବୋଲି ମିଶ୍ର କହିଛନ୍ତି। କଳାହାଣ୍ଡି ଜିଲାକୁ ମଧ୍ୟ ଗୁରୁତ୍ୱ ଦେବି ବୋଲି ମନ୍ତ୍ରୀ ପ୍ରକାଶ କରିଛନ୍ତି।