ବଇଣ୍ଡା, ୧୨ା୩(ଡି.ଏନ.ଏ.) ଜଙ୍ଗଲ ଅଧ୍ୟୁଷିତ ଅଞ୍ଚଳକୁ ଗମନାଗମନ ସୁବିଧା ପାଇଁ ସରକାର ପକ୍କା ରାସ୍ତା ନିର୍ମାଣର ଯୋଜନା କରିଥିଲେ ହେଁ କେତେଜଣ ବିଭାଗୀୟ ଅଧିକାରୀ ଓ ଠିକାଦାରଙ୍କ ଯୋଗୁ ଲୋକେ ଏହାର ସୁଫଳ ପାଇପାରୁ ନ ଥିବା ଅଭିଯୋଗ ହେଉଛି। ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ ଥାନା ପୀତାବଳିବାହାଳ ଛକ(କନ୍ତପଡା)ଠାରୁ ବିପ୍ରଡିହ ପର୍ଯ୍ୟନ୍ତ ନିର୍ମାଣ ହେଉଥିବା ପକ୍କାରାସ୍ତା ନିମ୍ନମାନର ବୋଲି ଅଭିଯୋଗ ହୋଇଛି। ବୁଧବାର ଏ ନେଇ ଗୋପୀନାଥପୁର ଗ୍ରାମଠାରେ ପୀତାବଳିବାହାଳ, ବିପ୍ରଡିହ, କେଞ୍ଚୁଆନାଳୀ, ଗୋପୀନାଥପୁର ଆଦି ୪ ଗ୍ରାମବାସୀଙ୍କୁ ନେଇ ଏକ ବୈଠକ ବସିବା ପରେ ଜିଲାପାଳଙ୍କଠାରେ ଅଭିଯୋଗ କରାଯାଇଛି। ଅଭିଯୋଗପତ୍ରର ନକଲ ଗ୍ରାମ୍ୟ ନିର୍ମାଣ ଉନ୍ନୟନ ବିଭାଗ ମନ୍ତ୍ରୀ ଓ ବିଭାଗୀୟ ଉଚ୍ଚ ପଦାଧିକାରୀଙ୍କୁ ପଠାଯାଇଛି।
ଗ୍ରାମବାସୀଙ୍କ ଅଭିଯୋଗ ମୁତାବକ, ପୀତାବଳିବାହାଳ ଛକ(କନ୍ତପଡା)ଠାରୁ ବିପ୍ରଡିହ ୧୨ କିମି ପର୍ଯ୍ୟନ୍ତ ମୁଖ୍ୟମନ୍ତ୍ରୀ ସଡ଼କ ଯୋଜନରେ ପକ୍କା ରାସ୍ତା ନିର୍ମାଣ କରାଯାଉଛି। ଏଥିପାଇଁ ୭ କୋଟି ୯୯ ଲକ୍ଷ ଟଙ୍କା ଅଟକଳ ହୋଇଛି। ୧୮ ଜାନୁୟାରୀ ୨୦୨୦ ସୁଦ୍ଧା ନିର୍ମାଣ ସରିବାକୁ ଧାର୍ଯ୍ୟ ହୋଇଥିଲେ ହେଁ ଏ ପର୍ଯ୍ୟନ୍ତ କାମର ୫୦ ପ୍ରତିଶତ ମଧ୍ୟ ଶେଷ ହୋଇନାହିଁ। ଏଥିସହ ରାସ୍ତା ନିର୍ମାଣ ନିମ୍ନମାନର କରାଯାଉଛି। ଠିକ୍ ଭାବେ ମେଟାଲ ପକାଯାଉ ନ ଥିବାବେଳେ ଜଙ୍ଗଲରୁ ବେଆଇନ ଭାବେ ମାଟି ମୋରମ ପକାଯାଇ ଏହାକୁ ସମତଳ କରାଯାଉଛି। କ୍ରଶର ଗୁଣ୍ଡ ସହ ମେଟାଲ ମିଶାଯାଉ ନ ଥିବାବେଳେ ବଡ ବଡ ମେଟାଲ ସହ ମୋରମ ପକାଯାଉଛି। ସେହିପରି ଗୋପୀନାଥପୁର ନାଳ ନିକଟରେ ଏକ ପୋଲ ନିର୍ମାଣ ହୋଇଥିବାବେଳେ ଆବଶ୍ୟକ ପରିମାଣର ରଡ୍ ଲଗାଯାଇନାହିଁ। ସାଇଡ ଓ୍ବାଲ ମଧ୍ୟ ତିଆରି କରାଯାଇ ନ ଥିବାରୁ କିଛି ଦିନ ପୂର୍ବେ ବର୍ଷାରେ ରାସ୍ତା ଧୋଇଯାଇଛି। ବିଭାଗୀୟ ଅଧିକାରୀ ତଦାରଖ କରୁ ନ ଥିବାରୁ ଠିକାଦାର ମନଇଚ୍ଛା କାମ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ନେଇ ଗତ ମାସ ୫ ତାରିଖରେ ବିଭାଗୀୟ ଯନ୍ତ୍ରୀଙ୍କୁ ଅଭିଯୋଗ କରିଥିତ୍ଲେ ମଧ୍ୟ କିଛି ସୁଫଳ ମିଳି ନ ଥିବା ସେମାନେ ପ୍ରକାଶ କରିଛନ୍ତି। ଏଥିପ୍ରତି ଜିଲାପାଳ ଦୃଷ୍ଟିଦେଇ ଭିଜିଲାନ୍ସ ତଦନ୍ତ କରିବାକୁ ଗୋପୀନାଥପୁର ଗ୍ରାମର ପ୍ରଦୀପ କୁମାର ପ୍ରଧାନ, ଗୁରୁଚରଣ ପ୍ରଧାନ, ଅଜିତ କୁମାର ପ୍ରଧାନ, ଅଶ୍ୱିନୀ କୁମାର ପ୍ରଧାନ, ବାବାଜୀ ବେହେରା, ନବକୃଷ୍ଣ ସାହୁ ପ୍ରମୁଖ ଦାବି କରିଛନ୍ତି।
ଏ ସମ୍ପର୍କରେ ବଇଣ୍ଡା ଗ୍ରାମ୍ୟ ନିର୍ମାଣ ଉନ୍ନୟନ ବିଭାଗ କନିଷ୍ଠ ଯନ୍ତ୍ରୀ ବସନ୍ତ କୁମାର ବସ୍ତିଆ କୁହନ୍ତି, ରାସ୍ତା କାମ ନିମ୍ନମାନର ହୋଇନାହିଁ। ଯଦି ରାସ୍ତା ଧୋଇ ହୋଇଯାଇଥିବ ଏହାର ମରାମତି କରିବାକୁ ଠିକାଦାରଙ୍କୁ ନିର୍ଦ୍ଦେଶ ଦିଆଯିବ।