ଅନୁଗୋଳ ଅଫିସ୍, ୧୫।୩ – ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟର ଯକ୍ଷ୍ମା ୱାର୍ଡରୁ ଜଣେ ରୋଗୀ ଶୁକ୍ରବାର ରାତି ସାଢ଼େ ୧୦ଟାରେ କେଉଁ ଆଡ଼େ ଚାଲିଯାଇଥିବା ଥାନାରେ ଅଭିଯୋଗ ହୋଇଛି। କିନ୍ତୁ ମେଡିକାଲ କର୍ତ୍ତୃପକ୍ଷ ସମ୍ପୃକ୍ତ ରୋଗୀଙ୍କ ପରିବାର ଲୋକଙ୍କ ଠାରୁ ଜବରଦସ୍ତି ଦସ୍ତଖତ ରଖିଥିବା ସେମାନେ ଅଭିଯୋଗ କରିଛନ୍ତି।
ଅଭିଯୋଗରୁ ପ୍ରକାଶ ଯେ, ତାଳଚେର କଲିୟରୀ ଥାନା ଘଣ୍ଟପଡ଼ା ଗ୍ରାମର ରଞ୍ଜିତ ସାହୁ(୪୫) ଗତ ୧୧ ତାରିଖରେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ତାଙ୍କ ଦେଖାଶୁଣା କରିବାକୁ ସ୍ତ୍ରୀ ନିରୁପମା ସାହୁ ମେଡିକାଲରେ ରହୁଥିଲେ। କିନ୍ତୁ ଶୁକ୍ରବାର ରାତି ସାଢ଼େ ୧୦ଟାରେ ନିରୁପମା ଶୌଚ ପାଇଁ ଯାଇଥିବାବେଳେ ରଞ୍ଜିତ ଡାକ୍ତରଖାନା ବେଡରୁ ଉଠି କେଉଁଆଡ଼େ ଚାଲିଯାଇଥିଲେ। ଏ ନେଇ ନିରୁପମା ମେଡିକାଲ କର୍ତ୍ତୃପକ୍ଷଙ୍କୁ ଅବଗତ କରିଥିଲେ ମଧ୍ୟ କେହି କର୍ଣ୍ଣପାତ କରି ନ ଥିଲେ। ରାତିରେ ବିଭିନ୍ନ ସ୍ଥାନରେ ଖୋଜାଖୋଜି କରି ପରିବାର ଲୋକେ ନିରାଶ ହୋଇଥିବା ବେଳେ ରଞ୍ଜିତଙ୍କୁ ଡିସ୍ଚାର୍ଜ କରାଯାଇଥିବା ମେଡିକାଲ କର୍ତ୍ତୃପକ୍ଷ କହିବାରୁ ଶନିବାର ପୂର୍ବାହ୍ନରେ ଉତ୍ତେଜନା ସୃଷ୍ଟି ହୋଇଥିଲା। ପରିସ୍ଥିତି ଜଟିଳ ହେଉଥିବା ଦେଖି ୱାର୍ଡରେ କାର୍ଯ୍ୟରତ ନର୍ସ ଓ ସୁରକ୍ଷାକର୍ମୀ କାହାରି ନିକଟରେ ଅଭିଯୋଗ କରନାହିଁ ରୋଗୀଙ୍କୁ ଆମେ ଖୋଜିଆଣି ଦେବୁ ବୋଲି ଆଶ୍ୱାସନା ଦେଇଥିଲେ। ପରେ ଜିଲା ମୁଖ୍ୟ ଚିକିତ୍ସାଳୟ ଭାରପ୍ରାପ୍ତ ସିଡିଏମ୍ଓ ପ୍ରତାପ କୁମାର ବେହେରା ପହଞ୍ଚି ଘଟଣାର ତଦନ୍ତ କରି ରିପୋର୍ଟ ପ୍ରଦାନ କରିବାକୁ ଏଡିଏମ୍ଓ(ମେଡିକାଲ) ଶ୍ୟାମ ପ୍ରସାଦ ଦାସଙ୍କୁ ନିର୍ଦ୍ଦେଶ ଦେଇଥିଲେ। ଏଥିପାଇଁ ଦୋଷୀ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଡିଏମ୍ଓ ବେହେରା କହିଛନ୍ତି। ଅନ୍ୟପକ୍ଷରେ ମେଡିକାଲରୁ ଗାଏବ ହୋଇଥିବା ରୋଗୀଙ୍କ ପୁତୁରା ନିରଞ୍ଜନ ସାହୁ ଲିଖିତ ଅଭିଯୋଗ କରିବା ସହ ଏଡିଏମ୍ଓ(ମେଡିକାଲ) ମଧ୍ୟ ମେଡିକାଲରୁ ରୋଗୀ ଗାଏବ ଥିବା ନେଇ ଥାନାରେ ଅଭିଯୋଗ କରିଛନ୍ତି। ତେବେ ଗାଏବ ହୋଇଯାଇଥିବା ରୋଗୀଙ୍କୁ ସ୍ଥାନୀୟ ଲୋକେ ଆଙ୍କୁଲାରୁ ଉଦ୍ଧାର କରିବା ଖବରପାଇ ଆମ୍ବୁଲାନ୍ସ ଯୋଗେ ମେଡିକାଲ ଅଣାଯାଇଥିବା କର୍ତ୍ତୃପକ୍ଷ ରାତିରେ ସୂଚନା ଦେଇଛନ୍ତି। ସୂଚନାଯୋଗ୍ୟ ଯେ, ଏହାପୂର୍ବରୁ ମଧ୍ୟ ମେଡିକାଲରୁ ରୋଗୀ ଗାଏବ ପରି ଘଟଣା ଘଟିଥିଲା ଓ ଅବହେଳା ପାଇଁ ଦୁଇଜଣ ନର୍ସଙ୍କୁ ନିଲମ୍ବନ କରାଯାଇଥିଲା।