ବସ୍ତା, ୨୬।୫(ସ୍ବ.ପ୍ର.)-ବାଲେଶ୍ୱର ଜିଲା ବସ୍ତା ବ୍ଲକ ଅନ୍ତର୍ଗତ ବସ୍ତା, ଗାନ୍ଧୀଛକ, ବାହାର୍ଦ୍ଦାଠାରେ ନୂତନ ପୋଲ ନିର୍ମାଣ କାର୍ଯ୍ୟ ଚାଲିଥିବାରୁ ତିନି ପଟୁ ରାସ୍ତା ବନ୍ଦ କରାଯାଇଛି। ଫଳରେ ଯାତାୟାତରେ ସମସ୍ୟା ଦେଖାଦେଇଛି। ଏଥିସହିତ ଠିକାଦାରମାନେ ନିର୍ମାଣ କାର୍ଯ୍ୟ ମନ୍ଥର ଗତିରେ କରୁଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ା
୬୦ନମ୍ବର ଜାତୀୟ ରାଜପଥର ବସ୍ତା ବାଇପାସ୍ଠାରୁ ମଥାନୀ ବାଇପାସ୍ ପର୍ଯ୍ୟନ୍ତ ରାସ୍ତା ସମ୍ପ୍ରସାରଣ ସାଙ୍ଗକୁ ଦୁର୍ବଳ ପୋଲସବୁ ଭଙ୍ଗାଯାଇ ନୂତନ ପୋଲ ଓ ରାସ୍ତା ନିର୍ମାଣ ଚାଲିଛି ା ଏଥିସହିତ ବସ୍ତାରୁ ରାଜପଥ ଓ ଗାନ୍ଧୀଛକକୁ ସଂଯୋଗ କରୁଥିବା ମୁଖ୍ୟରାସ୍ତାର ବସ୍ତା ଛକ ନିକଟରେ ଏକ ପୋଲ ନିର୍ମାଣ ଚାଲିଛି ା ଏହି ପୋଲ କାମ ଦୀର୍ଘଦିନ ଧରି ଚାଲୁଛି। ଫଳରେ ରାସ୍ତା ପାର୍ଶ୍ୱରେ ଠିକାଦାର ଟ୍ରକ୍ ଟ୍ରକ୍ ବାଲି ଏବଂ ନିର୍ମାଣ ସାମଗ୍ରୀ ଜମା କରିଛନ୍ତି। ଫଳରେ ଯାତାୟାତରେ ବାଧା ଉପୁଜୁଥିଲା। ଏବେ ଏହି ରାସ୍ତାକୁ ସମ୍ପୂର୍ଣ୍ଣ ବନ୍ଦ କରାଯାଇ କାମ କରାଯାଉଛି। ମୁଖ୍ୟ ରାସ୍ତା ବନ୍ଦ ଯୋଗୁ ଲୋକେ ନାହଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବାହାର୍ଦ୍ଦା ତହସିଲ ଅଫିସ ଓ ଗାନ୍ଧୀ ଛକ ନିକଟରେ ଥିବା ଦୁଇଟି ପୋଲ ନିର୍ମାଣ ହେଉଥିବାରୁ ଏହି ପୋଲ ନିକଟ ରାସ୍ତାରେ ଭାରିଯାନ ଚଳାଚଳ ବନ୍ଦ କରିଦିଆଯାଇଛି ା ଫଳରେ ଯାତାୟାତ କରୁଥିବା ବସ୍ ତଥା ଅନ୍ୟ ଭାରିଯାନ ସବୁ ମଥାନୀ, ବାହାର୍ଦ୍ଦା, ଗାନ୍ଧୀ ଛକ ମଧ୍ୟକୁ ନ ଆସି ଜାତୀୟ ରାଜପଥରେ ଯାଆସ କରୁଛି। ଅଧିକାଂଶ ଯାତ୍ରୀ ଏ ବିଷୟରେ ଜାଣି ନ ପାରିବା ଯୋଗୁ ଅଯଥା ହୀନସ୍ତା ହେଉଛନ୍ତି। ପୁଣି ଅତ୍ୟଧିକ ଗରମ ଏବଂ ଖରା ଯୋଗୁ ଜାତୀୟ ରାଜପଥ ପାର୍ଶ୍ୱରେ ଖରାରେ ଘଣ୍ଟା ଘଣ୍ଟା ଧରି ଅପେକ୍ଷା କରୁଥିବା ଦେଖିବାକୁ ମିଳୁଛି। ପୁଣି ଯାତାୟାତ ବନ୍ଦ ନେଇ କୌଣସି ବିଧିବଦ୍ଧ ଫଳକ ମଧ୍ୟ ଲଗାଯାଇନାହିଁ। ଯେଉଁ ରାସ୍ତା ଦେଇ ଏବେ ଗାଡ଼ିମୋଟର ଯାତାୟାତ କରୁଛି ତାହା ଅତ୍ୟନ୍ତ ଅଣଓସାରିଆ ସହିତ ଜନବସତି ମଧ୍ୟ ଦେଇ ଯାଉଥିବାରୁ ଭାରିଯାନ ସାଙ୍ଗକୁ ଆମ୍ବୁଲାନ୍ସ ତଥା ଦମକଳ ଆଦି ଯିବା ଆସିବାରେ ବହୁ ଅସୁବିଧା ହେଉଛି। ତୁରନ୍ତ ଏହାର ବିକଳ୍ପ ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
