ପାରାଦୀପ,୫ା୧(ସ୍ବ.ପ୍ର.): ପାରାଦୀପ ବନ୍ଦର ପ୍ରତିଷ୍ଠା ଦିବସ ଅବସରରେ ଶନିବାର ସନ୍ଧ୍ୟାରେ ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ ପାରାଦୀପ ଗସ୍ତ କରିଥିଲେ। ଏହି ସମୟରେ ସେ ବନ୍ଦର ନିଷିଦ୍ଧାଞ୍ଚଳ ବୁଲିବା ସହ କେତେକ ନୂତନ ପ୍ରକଳ୍ପକୁ ଉଦ୍ଘାଟନ କରିଥିଲେ। ପ୍ରକଳ୍ପଗୁଡ଼ିକ ମଧ୍ୟରେ ସବ୍ଷ୍ଟେସନ ଛକରେ ଏକ ଅତ୍ୟାଧୁନିକ ଯାତ୍ରୀ ବିଶ୍ରାମଗାର, ସୌନ୍ଦର୍ଯ୍ୟ କରଣ ଆଲୋକ, ବନୀକରଣ ପାଇଁ ଫଳକ ଆଦି ଅନ୍ତର୍ଭୁକ୍ତ। ଏହା ପରେ ବନ୍ଦର ପ୍ରଶାସନିକ ଭବନର ବୋର୍ଡ ରୁମ୍ରେ ବନ୍ଦର ବିକାଶ ସମ୍ପର୍କରେ ଆଲୋଚନା କରିଥିଲେ। ବୈଠକ ପରେ ତ୍ରିପାଠୀ କହିଥିଲେ, ପାରଦୀପ ବନ୍ଦର ଏବେ ଦେଶର ଦ୍ୱିତୀୟ ବୃହତ୍ ବନ୍ଦର ଭାବେ ମାନ୍ୟତା ପାଇଛି। ଆହୁରି ଅଧିକ ପଣ୍ୟ କାରବାର ପାଇଁ ଅନେକ ଭିତ୍ତିଭୂମି ରହିଛି। ଯାହା ରାଜ୍ୟର ବିକାଶରେ ସହାୟକ ହେବ। ଏଥିସହ ପର୍ଯ୍ୟାବରଣ ଓ ସୌନ୍ଦର୍ଯ୍ୟକରଣ କ୍ଷେତ୍ରରେ ଉଲ୍ଲେଖନୀୟ କାମ କରିଛି। ଯାହା ଗସ୍ତ ସମୟରେ ସେ ଅନୁଭବ କରିଛନ୍ତି। ଏହି ଗସ୍ତବେଳେ ବନ୍ଦର ଅଧ୍ୟକ୍ଷ ରିଙ୍କେଶ ରାୟ ସଚିବଙ୍କୁ ବନ୍ଦର ସମ୍ପର୍କରେ ଅବଗତ କରାଇଥିଲେ। ଅନ୍ୟମାନଙ୍କ ମଧ୍ୟରେ ଜିଲାପାଳ ସଂଗ୍ରାମ କେଶରୀ ମହାପାତ୍ର, ଏସ୍ପି ପ୍ରକାଶ ଆରଙ୍କ ସମେତ ରାଜ୍ୟ ଓ ବନ୍ଦର ପ୍ରଶାସନର ବିଭାଗୀୟ ମୁଖ୍ୟମାନେ ଉପସ୍ଥିତ ଥିଲେ। ସୂଚନାଥାଉକି ପାରାଦୀପ ବନ୍ଦର ପ୍ରତିଷ୍ଠା ଦିବସ ଶୁକ୍ରବାର ପାଳିତ ହୋଇଥିଲା। ଏଥିରେ ସଚିବ ତ୍ରିପାଠୀ ଯୋଗଦେବାର କାର୍ଯ୍ୟକ୍ରମ ଥିଲା। ତେବେ ବିଶେଷ କାରଣ ପାଇଁ ସେ ଆସି ପାରି ନ ଥିବାରୁ ଶନିବାର ଆସିଥିଲେ। ବନ୍ଦରର ନୂତନ ପ୍ରକଳ୍ପ ନିମନ୍ତେ ୭୦୦୦ କୋଟି ଟଙ୍କା ଖର୍ଚ୍ଚ ହେବାକୁ ଥିବା ପ୍ରସ୍ତାବକୁ ସେ ସ୍ବାଗତ କରିବା ସହ ଏହା ରାଜ୍ୟର ଅର୍ଥନୀତି କ୍ଷେତ୍ରରେ ସହାୟକ ହେବ ବୋଲି କହିଥିଲେ। ସ୍ବରେଜ ଟ୍ରିଟ୍ମେଣ୍ଟ ପ୍ଲାଣ୍ଟ ଓ ଅବଲଣୀକର କାରଖାନା ପ୍ରକଳ୍ପକୁ ସ୍ବାଗତ କରିଥିଲେ।