ଅଦା ଚା’ ଥଣ୍ଡା କିମ୍ବା ବର୍ଷା ଦିନେ ବିଭିନ୍ନ ରୋଗରୁ ରକ୍ଷା କରିଥାଏ। ଏହି ଚା’ ସେବନ ଦ୍ୱାରା ଚିଡଚିଡାପଣ ଦୂରେଇଯାଏ। ଏବେ ଏକ ଗବେଷଣାରୁ ଜଣାପଡ଼ିଛି, ଅଦା ଚା’ ମୁଖ ଦୁର୍ଗନ୍ଧ ଦୂର କରିବାରେ ମଧ୍ୟ ବିଶେଷ ଭୂମିକା ନିର୍ବାହ କରିଥାଏ। ବିଶେଷଜ୍ଞଙ୍କ ଅନୁସାରେ, ଏଥିପାଇଁ ଅଦାରେ ଥିବା ଜିଞ୍ଜେରୋଲ୍ ରସାୟନ ଦାୟୀ। ଏହି ରସାୟନ ପାଟି ଭିତରେ ମହଜୁଦ ଏନ୍ଜାଇମ୍କୁ ନିୟନ୍ତ୍ରିତ କରିଥାଏ। ଯାହା ପ୍ରଭାବରେ ପାଟି ଦୁର୍ଗନ୍ଧ ହେବା ସହ ବ୍ୟାକ୍ଟେରିଆ ଜନ୍ମ ନେଇଥାନ୍ତି। ଜର୍ମାନୀର ଟେକ୍ନିକାଲ୍ ୟୁନିଭର୍ସିଟି ଅଫ୍ ମ୍ୟୁନିକ୍ରେ ହୋଇଥିବା ଗବେଷଣାରେ କୁହାଯାଇଛି, ଖାଦ୍ୟରେ ମହଜୁଦ ସଲ୍ଫର୍ ମଧ୍ୟ ଅନେକ ସମୟରେ ଦୁର୍ଗନ୍ଧର କାରଣ ସାଜିଥାଏ। ଏହି କାରଣରୁ ଅନେକ ଲୋକଙ୍କୁ ମୁଖ ଦୁର୍ଗନ୍ଧଜନିତ ରୋଗ ଅର୍ଥାତ୍ ହାଲିଟୋସିସ୍ ହୋଇଥାଏ। ବିଶେଷଜ୍ଞଙ୍କ ମତରେ, ଅଦାରେ ଥିବା ଜିଞ୍ଜେରୋଲ୍ ରସାୟନ ସେବନ ଦ୍ୱାରା ଶରୀରର ସେହି ଏନ୍ଜାଇମ୍ ଚକ୍ର ସକ୍ରିୟ ହୋଇଥାଏ, ଯାହା ତତ୍କ୍ଷଣାତ୍ ମୁଖ ଦୁର୍ଗନ୍ଧକୁ ଦୂର କରିଥାଏ।
