ଭୁବନ, ୨୯।୪(ଡି.ଏନ.ଏ.) – ଚାଷୀଙ୍କ ଉପରେ ଚଡ଼କ ପକାଇଛି କାଳବୈଶାଖୀ ବର୍ଷା। ଅମଳ ପାଇଁ ଉପାଡ଼ି ଖଳାରେ ରଖାଯାଇଥିବା ମୁଗ ଅଦିନିଆ ବର୍ଷାରେ ଭିଜି ଗଜା ହୋଇଯାଇଛି, ଯାହାକୁ ନେଇ ଚିନ୍ତାରେ ପଡ଼ିଛନ୍ତି ଢେଙ୍କାନାଳ ଜିଲା ଭୁବନ ଏନ୍ଏସିର ୩୦ ଚାଷୀ। ଏପରି ଦୁର୍ଦ୍ଦିନରେ ଜିଲା କୃଷି ବିଭାଗ ସହାୟତାରେ ହାତ ବଢ଼ାଇବାକୁ କ୍ଷତିଗ୍ରସ୍ତ ଚାଷୀମାନେ ଜିଲା କୃଷି ଅଧିକାରୀଙ୍କୁ ଲିଖିତ ଭାବେ ଜଣାଇଛନ୍ତି।
ମିଳିଥିବା ସୂଚନା ଅନୁଯାୟୀ, ସ୍ଥାନୀୟ କୃଷକ ବିକାଶ ପରିଷଦର ୩୦ଜଣ ଚାଷୀ ଗୋମରଗୋଳ ମୌଜାରେ ମିଳିମିଶି ୩୦ ଏକରରେ ମୁଗଚାଷ କରିଥିଲେ। ଜଣକା ୧୦ ହଜାର ଟଙ୍କା ଲେଖାଏ ବିନିଯୋଗ କରିଥିଲେ। ଚଳିତବର୍ଷ ଅନୁକୂଳ ପାଗ ଯୋଗୁ ଭଲ ଫସଲ ହୋଇଥିଲା। ୨୪ ଏକର ଜମିରେ ହୋଇଥିବା ମୁଗ ଉପାଡ଼ି ସେମାନେ ଖଳାରେ ରଖିଥିଲେ। ହେଲେ ଚଳିତମାସରେ ଲଗାତର ହୋଇଥିବା ବର୍ଷାରେ ସବୁ ଫସଲ ଗଜା ହୋଇଯାଇଛି। ଏଥିରେ ହାରାହାରି ୫ ଲକ୍ଷ ଟଙ୍କାର କ୍ଷତି ହୋଇଥିବା ସମ୍ପୃକ୍ତ ଚାଷୀମାନେ ଅଭିଯୋଗ କରିଛନ୍ତି। ଅନ୍ୟପଟେ ଚାଷ ପାଇଁ ସେମାନେ ବିଭିନ୍ନ ଘରୋଇ ସଂସ୍ଥାରୁ ଋଣ ଆଣିଥିଲେ। ଏବେ ଫସଲ ନଷ୍ଟ ହୋଇଯିବା ପରେ ସେମାନଙ୍କ ମୁଣ୍ଡରେ ଚଡ଼କ ପଡ଼ିଛି। ଏ ସଂକ୍ରାନ୍ତରେ ସେମାନେ ଜିଲା କୃଷି ଅଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି। ଏଥିସହ କ୍ଷତିପୂରଣ ପ୍ରଦାନ କରିବାକୁ ପରିଷଦର ସଭାପତି ସୁରେନ୍ଦ୍ର କୁମାର ପୃଷ୍ଟି, ସମ୍ପାଦକ ରଥ ସେଠୀ ପ୍ରମୁଖ ନିବେଦନ କରିଛନ୍ତି।
ଏ ନେଇ ବ୍ଲକ କୃଷି ଅଧିକାରୀ ଦିଲୀପ କୁମାର ମିଶ୍ର କୁହନ୍ତି, ଅଭିଯୋଗ ମିଳିବା ପରେ ତଦନ୍ତ କରାଯାଇଛି। ରାଜସ୍ବ ବିଭାଗ ରିପୋର୍ଟ ପ୍ରଦାନ କରିବା ପରେ ଏହାକୁ ସରକାରଙ୍କ ନିକଟକୁ ପଠାଯିବ। କ୍ଷତିପୂରଣ ରାଶି ମଞ୍ଜୁର ହେଲେ ଚାଷୀଙ୍କୁ ପ୍ରଦାନ କରାଯିବ।
