ଓ୍ବାଶିଂଟନ, ୬।୬: ପୃଥିବୀରେ କରୋନା ମହାମାରୀ ସଂକ୍ରମଣ ଯୋଗୁ ଅଚଳାବସ୍ଥା ସୃଷ୍ଟି ହୋଇଛି। ନୂଆ ଆକ୍ରାନ୍ତଙ୍କ ସଂଖ୍ୟା ଏବଂ ମୃତକଙ୍କ ସଂଖ୍ୟା ପ୍ରତିଦିନ ବଢ଼ିଚାଲିଛି। ଶିଶୁ, ଗର୍ଭବତୀ ଏବଂ ବୟସ୍କ ବ୍ୟକ୍ତିଙ୍କ କ୍ଷେତ୍ରରେ ସଂକ୍ରମଣ ଆଶଙ୍କା ଅଧିକ ଥିବା ବିଶେଷଜ୍ଞ କହିଛନ୍ତି। ତେବେ ଆମେରିକାର ବ୍ରାଉନ୍ ବିଶ୍ୱ ବିଦ୍ୟାଳୟରେ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି ଯେ, ମୁଣ୍ଡରେ କେଶ ନ ଥିବା ପୁରୁଷଙ୍କୁ କରୋନା ସଂକ୍ରମଣ ଆଶଙ୍କା ଅଧିକ ରହିଥାଏ। ଏନେଇ ସ୍ପେନ୍ର ମାଦ୍ରିଦ୍ ହସ୍ପିଟାଲରେ ୧୨୨ ଜଣ କରୋନା ସଂକ୍ରମିତ ପୁରୁଷଙ୍କ ଉପରେ ଅଧ୍ୟୟନ କରାଯାଇଥିଲା। ଜଣାପଡ଼ିଥିଲା ସେମାନଙ୍କ ମଧ୍ୟରେ ୭୯ ପ୍ରତିଶତଙ୍କ ମୁଣ୍ଡରେ କେଶ ନ ଥିଲା। ପୂର୍ବରୁ ହୋଇଥିବା ଅଧ୍ୟୟନରେ ୪୧ ଜଣ ପୁରୁଷଙ୍କ ମଧ୍ୟରୁ ୭୧ ପ୍ରତିଶତଙ୍କ ମୁଣ୍ଡରେ କେଶ ନ ଥିବା ରିପୋର୍ଟରେ ପ୍ରକାଶ ପାଇଛି ବୋଲି ଗବେଷକ ପ୍ରଫେସର କାର୍ଲୋସ୍ ଓ୍ବେମ୍ବିଏର୍ କହିଛନ୍ତି। ଏଭଳି ପୁରୁଷଙ୍କ କ୍ଷେତ୍ରରେ ଆଣ୍ଡ୍ରୋଜେନ୍ ହରମୋନ୍ କ୍ଷରଣ ସ୍ବାଭାବିକ ଭାବେ ହୋଇ ନ ଥାଏ। ଏହି ହରମୋନ୍ର ଅଭାବଥିବା ପୁରୁଷଙ୍କ କ୍ଷେତ୍ରରେ କରୋନା ସଂକ୍ରମଣ ହାର ଅଧିକ ରହିଥାଏ ବୋଲି ବ୍ରିଟେନ୍ର ଚିକିତ୍ସକ ଡ. ଫ୍ରାଙ୍କ୍ ଗାବ୍ରିନ୍ କହିଛନ୍ତି। ଚାଇନାର ଉହାନରେ ଜାନୁୟାରୀରେ କରୋନା ସଂକ୍ରମିତ ମୃତକଙ୍କ ମଧ୍ୟରେ ଅଧିକ ପୁରୁଷ ରହିଥିଲେ। ସେମାନଙ୍କ ମଧ୍ୟରେ ବହୁ ମୃତକଙ୍କ ମୁଣ୍ଡରେ କେଶ ନ ଥିବା ଜଣାପଡ଼ିଛି। ଏବେ ଏନେଇ ଅଧିକ ପରୀକ୍ଷା ଜାରି ରହିଛି।