ଅନୁଗୋଳ ଅଫିସ, ୨୫।୮ – ଅନୁଗୋଳ ଜିଲା ବଅଁରପାଳ ଥାନା ତଳମୂଳ ପଞ୍ଚାୟତର ଶିମିଳିଛୁଇଁ ଗ୍ରାମରେ ମୁଣ୍ଡ ଉପରେ ଝୁଲି ରହିଛି ବିଦ୍ୟୁତ୍ ତାର। ଏ ନେଇ ବାରମ୍ବାର ସେସୁ ଅଫିସ୍ରେ ଅଭିଯୋଗ ପରେ ବି କେହି କର୍ଣ୍ଣପାତ କରୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି।
ଗ୍ରାମବାସୀଙ୍କ କହିବା ମୁତାବକ, ଭୂଇଁଠାରୁ ୬ ଫୁଟ ଉଚ୍ଚରେ ବିଦ୍ୟୁତ୍ ତାର ଝୁଲୁଛି। ଖୁଣ୍ଟ ମଧ୍ୟରେ ବ୍ୟବଧାନ ଅଧିକ ରଖାଯାଇଥିବାରୁ ତାର ତଳକୁ ଓହଳି ପଡୁଛି। ଏଥିଯୋଗୁ ଯେ କୌଣସି ମୁହୂର୍ତ୍ତରେ ଦୁର୍ଘଟଣା ଆଶଙ୍କାରେ ଲୋକେ ଭୟଭୀତ ରହୁଛନ୍ତି। କେତେକ ସ୍ଥାନରେ ବାଉଁଶ, ଶୁଖିଲା ଡାଳ ଆଦି ଦିଆଯାଇ ତାରକୁ ଉଠାଯାଇଛି। ଏ ନେଇ ସେସୁ କର୍ମଚାରୀଙ୍କୁ ବାରମ୍ବାର ଅବଗତ କରାଇବା ସତ୍ତ୍ୱେ କେହି ଦୃଷ୍ଟି ଦେଉନାହାନ୍ତି। ଏପରି କି ପବନ ବୋହିଲେ ଶର୍ଟସର୍କିଟ ହୋଇ ଗ୍ରାମରେ ଥିବା ଘରଗୁଡ଼ିକରେ ନିଅଁ। ଲାଗିବାର ମଧ୍ୟ ଆଶଙ୍କା ରହିଛି। ଉକ୍ତ ରାସ୍ତା ଦେଇ କୌଣସି ଯାନବାହାନ ମଧ୍ୟ ଭୟରେ ଯାତାୟାତ କରିପାରୁନାହିଁ। ଏହା ଅନୁଗୋଳ ଓ ହିନ୍ଦୋଳର ମୁଖ୍ୟ ରାସ୍ତା ହୋଇଥିବାରୁ ଲୋକେ ସମସ୍ୟାରେ ପଡ଼ୁଛନ୍ତି। ଅନ୍ୟପକ୍ଷରେ ନିର୍ବାଚନ ପୂର୍ବରୁ ଗ୍ରାମରେ ଥିବା ବିଜୁଳି ଖୁଣ୍ଟିରେ କେବୁଲ ତାର ଟଣା ଯାଇଥିଲେ ମଧ୍ୟ ଏଥିରେ ବିଜୁଳି ସଂଯୋଗ ଦିଆଯାଉ ନାହିଁ। ଏହାଦ୍ୱାରା ତୀବ୍ର ଅସନ୍ତୋଷ ସୃଷ୍ଟି ହୋଇଛି। ଏଥିପ୍ରତି ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ନ ଦେଲେ ଆଗାମୀ ଦିନରେ ଗ୍ରାମବାସୀ ଆନ୍ଦୋଳନ ପାଇଁ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦିଆଯାଇଛି। ଏ ନେଇ ତାଳଚେର ଡିଭିଜନ୍ ଏକଜିକ୍ୟୁଟିଭ ଇଞ୍ଜିନିୟର ନିହାର ରଞ୍ଜନ ପାଣିଗ୍ରାହୀ କହିଛନ୍ତି, ଉକ୍ତ ଗ୍ରାମରେ ଏହା କାହିଁକି ହୋଇନାହିଁ ତାହାର ତଦାରଖ କରାଯିବ। ତେବେ ଏଲଟି ଲାଇନ୍ ହୋଇଥିବାରୁ ଏନ୍ଜେଏନ୍ ଅଧିକାରୀଙ୍କୁ ଅବଗତ କରିବି ବୋଲି ସେ କହିଛନ୍ତି।
