କେନ୍ଦୁଝର,୧୫।୧୦ (ସ୍ବ.ପ୍ର.): କେନ୍ଦୁଝର ଜିଲା କୋର୍ଟ ପରିସରରୁ ଦୁଇଜଣ ମୁଦାଲା ଫେରାର ଘଟଣାରେ ପୋଲିସ କୋର୍ଟର ଜଣେ ସିଏସଆଇ ଓ ତିନି ଜଣ କନେଷ୍ଟବଳଙ୍କୁ ଏସପି ମିତ୍ରଭାନୁ ମହାପାତ୍ର ମଙ୍ଗଳବାର ନିଲମ୍ବିତ କରିଛନ୍ତି। ସେମାନେ ହେଲେ ସିଏସଆଇ ଦୁଷ୍ମନ୍ତ ସିଂ, କନେଷ୍ଟବଳ ରେଣୁବାଳା ମହାନ୍ତି, ଶିବାନୀ ନାୟକ, ମନୋରମା ସେଠୀ। ଦାୟିତ୍ୱରେ ଖିଲାପ କରିଥିବା ଅଭିଯୋଗରେ ସେମାନଙ୍କୁ ନିଲମ୍ବିତ କରାଯାଇଥିବା ସୂଚନା ମିଳିଛି। ଏହି ଘଟଣାର ତଦନ୍ତ କରିବା ପାଇଁ କେନ୍ଦୁଝର ଏସପି କ୍ରାଇମ ଡିଏସପିଙ୍କୁ ଆଦେଶ ଦେଇଛନ୍ତି। ଫେରାର ଦୁଇ ଜଣ ମୁଦଲା ବାପ ଓ ପୁଅ ବୋଲି ଜଣାପଡିଛି। ସେମାନେ ଏକ ଜାତିଆଣ ମାମଲାରେ ଫେରାର ଥିଲେ । ସୋମବାର କୋର୍ଟରେ ଆତ୍ମସମର୍ପଣ କରିବାକୁ ଆସିଥିଲେ। ତେବେ ଜାମିନ ଖାରଜ ହୋଇଯିବାରୁ ପୋଲିସ ହେପାଜତକୁ ଯାଇଥିଲେ। ତେବେ ସେଠାରୁ ସେମାନେ ଫେରାର ହୋଇଯାଇଥିଲେ। ଏସପି ଘଟଣା ଜାଣିବା ପରେ ତଦନ୍ତ ଆଦେଶ ଦେଇଥିଲେ। ଏନେଇ ଡିଏସପି କ୍ରାଇମ କହିଛନ୍ତି, ଦୁଇ ଜଣ ଆସାମୀ ହେଉଛନ୍ତି ବାପ ଦାଶରଥି ଖୁଣ୍ଟିଆ ଓ ତାଙ୍କ ପୁଅ ଅବିଲ ଖୁଣ୍ଟିଆ। ସେମାନଙ୍କ ଘର ତେଲକୋଇ ଥାନା ସରୁଆଳି ଗ୍ରାମରେ। ପୁଅକୁ ପୋଲିସ ଘରୁ ଧରିବାରେ ସଫଳ ହୋଇଥିବାବେଳେ ବାପା ଏବେ ବି ଫେରାର ଥିବା ପୋଲିସ କହିଛି।