ଗୁଡଭେଲା,୯ା୫(ଡି.ଏନ୍.ଏ.) : ବୌଦ୍ଧ ଜିଲା କଣ୍ଟାମାଳ ଥାନା ଅଞ୍ଚଳର ୫ ଯୁବ ଶ୍ରମିକ ସାଇକେଲରେ ବମ୍ବେରୁ ନିଜ ଗାଁକୁ ଫେରୁଥିବା ବେଳେ ତୁଷୁରା ସହର ଦେଇ ଯାଇଥିବା ଦେଖିବାକୁ ମିଳିଛି। ତୁଷୁରା ସହରରେ ଲକ୍ଡାଉନ୍ ଚାଲିଥିବାରୁ ସହର ସୀମାରେ ସିଲ୍ କରାଯାଇଥିବା ଅସ୍ଥାୟୀ ଗେଟ୍ରେ ପୋଲିସ ଅଟକାଇବାରୁ ଏହି ଘଟଣା ଜଣାପଡ଼ିଥିଲା। ଉକ୍ତ ଯୁବକମାନେ କଣ୍ଟାମାଳ ଥାନା ଅନ୍ତର୍ଗତ ଆମ୍ବଗାଁ ଗ୍ରାମର ପ୍ରଭାସ ରଣା, କୁଲେଶ୍ୱର ରଣା, ପଞ୍ଚାୟତ ରଣା, ଦୀପକ ରଣା, ସୂର୍ଯ୍ୟକାନ୍ତ ରଣା ବୋଲି ଜଣାପଡ଼ିଛି। ଏମାନେ ମେ ୨ରୁ ମୁମ୍ବାଇରୁ ୫ଟି ସାଇକେଲରେ ନିଜ ଗାଁକୁ ବାହରିଥିଲେ। ବାଟରେ ଆର୍ଥିକ ଅସୁବିଧା ହେବାରୁ ଦୁଇଟି ସାଇକେଲ ବିକ୍ରି କରି ଆଉ ତିନୋଟି ସାଇକେଲରେ ନିଜ ଗାଁ ଅଭିମୁଖେ ବାହାରିଥିବା ଉକ୍ତ ଯୁବକମାନେ ପ୍ରକାଶ କରିଛନ୍ତି। ଏପରିକି ତୁଷୁରା ଅସ୍ଥାୟୀ ଗେଟ୍ରେ ଥିବା ପୋଲିସ ଏଏସ୍ଆଇ ଯୁବରାଜ କୁମ୍ଭାର ଓ ନବୀନ ମିଶ୍ର ଉକ୍ତ ଯୁବକମାନଙ୍କୁ ମୁଢ଼ି, ମିକ୍ସଚର, ବିସ୍କୁଟ ଓ ପିଇବା ପାଣି ଦେଇଥିଲେ।