ଭବାନୀପାଟଣା/କୋକସରା,(ସ୍ବ.ପ୍ର/ଡିଏନ୍.ଏ): କଳାହାଣ୍ଡି ଜିଲା କୋକସରା ବ୍ଲକ ମୂଷାପାଲି ପଞ୍ଚାୟତ ଅନ୍ତର୍ଗତ ଖପ୍ରାମାଲ ଗ୍ରାମର କହ୍ନେଇ ମାଝୀ (୨୩) ନାମକ ଜଣେ ଦାଦନ ଶ୍ରମିକଙ୍କ ମୁମ୍ବାଇରେ ମୃତ୍ୟୁ ଘଟିଛି। ସେଠାରେ ବିଦ୍ୟୁତ ଆଘାତରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି। ମିଳିଥିବା ସୂଚନା ଅନୁଯାୟୀ, ଲକ୍ଡାଉନ ପୂର୍ବରୁ କହ୍ନେଇ ମୁମ୍ବାଇକୁ ଦାଦନ ଖଟିବାକୁ ଯାଇ ସେଠାରେ ସେ ଏକ ଘରୋଇ କମ୍ପାନୀରେ କାମ କରୁଥିଲେ। ଗତ ୨୪ ତାରିଖ ରାତିରେ ସେ ଘର ଲୋକଙ୍କ ସହ ମୋବାଇଲରେ କଥା ହୋଇଥିଲେ। ଏହି ସମୟରେ ସେ ଗାଁକୁ ଫେରିବା ପାଇଁ ତାଙ୍କ ନାମ ପଞ୍ଜୀକରଣ କରିଦେବାକୁ ଘର ଲୋକଙ୍କୁ କହିଥିଲେ। ତେବେ ଉକ୍ତ ରାତିରେ ବିଦ୍ୟୁତ୍ ଆଘାତରେ ତାଙ୍କର ମୃତ୍ୟୁ ହୋଇଥିବା ପରିବାର ସୂତ୍ରରୁ ଜଣାପଡିଛି। ବର୍ତ୍ତମାନ କମ୍ପାନୀ ପକ୍ଷରୁ ଏକ ଆମ୍ବୁଲାନ୍ସ ଯୋଗେ କହ୍ନେଇଙ୍କ ମୃତଦେହ ଗାଁକୁ ଆସୁଥିବା ଖବର ଜଣାପଡିବା ପରେ ଅଞ୍ଚଳରେ ଅଜଣା ଭୟ ଦେଖିବାକୁ ମିଳିଛି। କାରଣ ମହାରାଷ୍ଟ୍ରରେ କରୋନା ସଂକ୍ରମିତ ରୋଗୀ ସଂଖ୍ୟା ସାରା ଦେଶରେ ଅଧିକ ରହିଛି। ଏ ନେଇ ମୂଷାପାଲି ସରପଞ୍ଚ ରଶ୍ମିରେଖା ରାଉତଙ୍କୁ ପଚାରିବାରୁ ଏ ବିଷୟରେ କୋକସରା ବ୍ଲକ ପ୍ରଶାସନକୁ ଅବଗତ କରାଇଛି । ଏହାସହ ମୃତକଙ୍କ ପରିବାରକୁ ହରିଶ୍ଚନ୍ଦ୍ର ଯୋଜନାରେ ୨ ହଜାର ଟଙ୍କା ସହାୟତା ମଧ୍ୟ ଯୋଗାଇ ଦିଆଯାଇଛି ବୋଲି ସେ ପ୍ରକାଶ କରିଥିଲେ।